Tuendayi Mu Ditabuja
1 Miliyo ya bantu mbateke nsombelu wabu pa bintu bia ku mubidi, bateka dieyemena diabu ne matshimbu onso mu mashimi a biûma. (Mat. 13:22) Tshipeta tshibi tshituku patu biûma biabu bijimina, babiba, anyi bimueneka bia mushinga mukese. Tudi babedibue bikole bua kulonda njila wa meji, pa kukeba muetu muonso biûma bia mu nyuma. (Mat. 6:19, 20) Abi bidi biumvuija ne: ‘tuende bua ditabuja.’—2 Kol. 5:7.
2 Muaku “ditabuja” udi ukudimuna muaku wa tshiena-Greke udi ne diumvuija dia dieyemena, kumanya kujalame. Kuenda bua ditabuja kudi kumvuija kuakama ntatu mu dieyemena Nzambi, mu didifila ku bukokeshi buende bua kulombola bidia bietu ne ku disua diende dia kukumbaja majinga etu. Yezu udi ufila tshilejilu tshipuangane; wakashala mushindamena pa tshivua ne mushinga menemene. (Eb. 12:2) Bia muomumue, tudi ne bua kulama mutshima wetu mushindika pa bintu bia mu nyuma, bikena bimueneka ne mêsu. (2 Kol. 4:18) Tuikalayi misangu yonso bavuluke butekete bua nsombelu wa tshikondo etshi, ne tumanye dikokela dietu mu bionso kudi Nzambi.
3 Tudi kabidi ne bua kuikala batuishibue bikole ne: Yehowa udi utulombola ku diambuluisha dia bulongolodi buende budi bumueneka, muinshi mua bulombodi bua “mupika wa lulamatu ne wa budimu.” (Mat. 24:45-47) Tudi tuleja ditabuja dietu pa ‘kutumikila aba badi balombola’ tshisumbu. (Eb. 13:17) Kuenza malu ne budipuekeshi mu diumvuangana ne ndongoluelu ya teokrasi kudi kuleja dieyemena dietu kudi Yehowa. (1 Pet. 5:6) Tudi ne bua kudiumvua basakibue bua kutua mudimu muomekela bulongolodi nyama ku mikolo kakuyi dilekela. Nunku, basuikakaja ne bukole buonso kudi dinanga ne buobumue, netusemene pabuipi ne bana betu.—1 Kol. 1:10.
4 Mushindu wa kukolesha ditabuja dietu: Katulekedi ditabuja dietu dituya. Tudi ne bua kuluangana mvita mikole bua kudikolesha. Dilonga, disambila, ne dibuela mu bisangilu bienza pa tshibidilu nebituambuluishe bua kukolesha ditabuja dietu, mu mushindu wa se: ne dikuatshisha dia Yehowa, ditabuja dietu ditantamene ditetshibua kayi dionso. (Ef. 6:16) Tudiku benze programe muimpe wa dibala dia Bible dia ku dituku ne dilongolola dia bisangilu anyi? Tudiku tuelangana meji pa bitudi tulonga, ne tusemena pabuipi ne Yehowa mu disambila anyi? Ntshibidilu tshietu bua kubuela mu bisangilu bionso ne kufilamu mumvuija patudi ne mushindu anyi?—Eb. 10:23-25.
5 Ditabuja dikole didi dimueneka ku midimu milenga. (Yak. 2:26) Umue wa ku mishindu mitambe bulenga itudi mua kuleja ditabuja dietu nkuakula ne bakuabu bua ditekemena dietu. Tutuku tukebulula bikondo bia kuamba lumu luimpe anyi? Amue malongolola mu nsombelu wetu adi mua kutuambuluisha bua kuenza bivule mu buambi anyi? Tutuku tulonda mibelu itudi tupeta bua kulengeja ngikadilu ne ngenzelu wa mudimu wetu anyi? Tutuku tudifundila bipatshila bia mu nyuma ne tudienzeja bua kubikumbaja anyi?
6 Yezu wakatudimuija ku njiwu ya didiina ne kasuki mu malu a mu nsombelu, ne kulekela majinga manekesha a bintu anyi a budisui abondakaja mmuenenu wetu wa malu mu nyuma. (Luka 21:34-36) Tudi ne bua kudimuka mushindu utudi tuenda, bua kubenga kuinyibua mu mâyi pa bidi bitangila ditabuja dietu. (Ef. 5:15; 1 Tim. 1:19) Yonso wa kutudi mmutekemene bua kuamba dimue dituku ne: “Ndi muluangane mvita milenga, ngajikiji luendu luanyi, ndi mulame ditabuja.”—2 Tim. 4:7, NW.