Tueleshangane diboko bua kuyisha mu teritware mudi miakulu ya bungi

Pa tshibidilu bantu batu basue kuteleja mukenji wa Bukalenge padibu babambilawu mu muakulu wabu wa ku dibele. Pamuapa ke bualu kayi Yehowa uvua muenze bua mu Pentekoste wa mu 33 P.Y., “bena Yuda bavua batshina Nzambi ba mu bisamba bionso bia muinshi mua diulu” bumvue lumu luimpe mu ‘muakulu wabu wa ku dibele,’ nansha muvuabu pamuapa bakula kabidi muakulu uvua bantu ba bungi bakula, bu mudi tshiena Ebelu anyi tshiena Greke. (Bz 2:5, 8) Lelu eu, bisumbu bitu bienza bisangilu mu miakulu mishilangane miaba itu bantu bakula miakulu ya bungi bidi mua kuikala ne teritware mu tshitupa tshimue. Mmunyi mudi bamanyishi ba mu bisumbu abi mua kueleshangana diboko bua kuyisha mu teritware amu, kadi bepuka bua kuyishamu misangu milondangane anyi anu matuku makese panyima pa bakuabu bamane kuyishamu, bifuane biatondesha bantu badimu nsombelu?

• 

  Shintakajayi ngenyi (Nsu 15:22): Batangidi ba mudimu ba mu bisumbu abi badi ne bua kushintakaja ngenyi bua kumanya mushindu mutambe buimpe wa kuyisha mu teritware amu. Bikala teritware wabu mukese, bisumbu bidi biyisha mu miakulu mikuabu bidi mua kulomba tshisumbu tshienu bua kubenga kuyisha ku nzubu ya bantu badi bakula muakulu wa tshisumbu tshiabu mu teritware amu. Kadi biobi kabiyi ne mushindu wa kuyisha ku nzubu yonso ayi pa tshibidilu bualu mmitangalake mu tshipapu tshinene bikole, badi mua kunulomba bua nuyishe ku nzubu yonso idi mu teritware wabu, ne nubamanyishe bikalaku muntu wa muakulu wa tshisumbu tshiabu udi muanyishe bulelela. (od-F 93 §37) Anyi badi mua kulomba tshisumbu tshienu bua nuenu bapete bantu badi bakula muakulu wa tshisumbu tshiabu, nubafundile adrese yabu bua baye kubatangila. (km 7/12 5, kazubu) Numanye kabidi ne: mu imue miaba, nudi mua kupeta bantu bakula miakulu ya bungi ku nzubu umue. Malu anudi nulongolola bua kuyisha mu teritware mujima, adi ne bua kupetangana ne mikenji idi itangila diamba malu a bende idiku.

• 

  Nukuatshishangane (Ef 4:16): Nulonde buludiki budi mutangidi wa mudimu wa tshisumbu tshienu unupesha bimpe menemene. Wewe ulonga Bible ne muntu udi musue muakulu udi kawuyi wa tshisumbu tshienu, manya ne: mulongi au udi mua kuya kumpala ne lukasa wewe mumukebele mulongeshi wa mu tshisumbu tshia muakulu udiye musue au tshidi pabuipi.

• 

  Udilongolole (Nsu 15:28; 16:1): Bikala muntu wa mu teritware webe wakula muakulu uudi kuyi mumanye, enza muebe muonso bua kumuyisha. Udi mua kudilongolola bua miakulu iudi mua kupeta mu teritware wenu, ne kudianjila kuambula Bible ne filme ya mu miakulu ayi kuyela mu tshiamu tshiebe. Udi kabidi mua kubuela mu programe wa JW Language bua kulonga mua kuelangana muoyo mu imue miakulu.