Malu adibu baledile mu Mabeji a tshisangilu tshia Nsombelu ne mudimu wetu
LUMINGU LUA DIA 2-8/11
BIUMA BIA MU DÎYI DIA NZAMBI | EKESODE 39-40
“Mose wakalonda mêyi matume bimpe menemene”
Udiku mumanyike kudi Yehowa anyi?
13 Kadi Mose yeye “uvua muena bupuekele kupita bantu bonso bavua pa buloba.” (Nom. 12:3) Wakaleja bupuekele ne budipuekeshi bualu uvua mudisuike bua kulonda bulombodi bua Yehowa. (Ekes. 7:6; 40:16) Kakuena bualu budi buleja ne: Mose uvua welesha mushindu uvua Yehowa wenza malu mpata anyi ne: bivua bimutonda bua kulonda mushindu uvua Yehowa uya ne malu to. Tshilejilu, Yehowa wakaleja too ne mu katoba mushindu wa kuasa ntenta wa kusambakena, kulejaye malu bu mudi mekala a manda ne bungi bua bilamakajilu bia kuasa ku bilamba bia ntenta. (Ekes. 26:1-6) Bidi mua kukutonda wewe muikale wenza mudimu ne muanetu kampanda udi ulombola mudimu kampanda mu bulongolodi bua Yehowa udi ukuleja too ne mu katoba tshiudi ne bua kuenza. Kadi Yehowa mmupuangane ne udi upesha bantu bende midimu ne disanka, mumanye ne: nebayenze bimpe. Padiye umvuija malu too ne mu katoba, udi ne tshidiye wenzela nanku. Nunku tumanyayi ne: Mose kavua mufikile Yehowa munda bua muvuaye mumuleje too ne mu katoba mua kuenza mudimu au bienze anu bu ne: Yehowa uvua umupetula anyi umupangisha bua kuenza mudimu mudilekelele. Kadi Mose wakaditatshisha bua bena mudimu ‘benze malu onso’ anu muvua Nzambi muambe. (Ekes. 39:32) Uvua muleje bushuwa budipuekeshi. Mose uvua mumanye ne: mudimu ngua Yehowa, ne Yehowa uvua ukuata nende mudimu anu bua kuukumbaja.
Udi ne lulamatu mu malu onso anyi?
3 “Ebelu 3:5 udi wamba ne: ‘Mose wakadi muena mudimu muena lulamatu.’ (MML) Ntshinyi tshiakavuija muprofete Mose muena lulamatu? Mu dienza ne mu dishimika ntenta wa kusambakena, “Mose wakenza nunku; wakenza malu onso akamuambila Yehowa.” (Ekesode 40:16) Tuetu batendeledi ba Yehowa tudi tuleja lulamatu luetu patudi tumutumikila mu malu onso. Bidi biumvuija kushala anu balamate Yehowa nansha mu ntatu minene anyi mateta makole. Kadi lulamatu luetu kaluena lumueneka anu patudi kumpala kua bilumbu binene nansha. Yezu wakamba ne: ‘Udi ne lulamatu mu bintu bikese, udi nalu kabidi ne mu bivule; udi ne buivi mu bintu bikese, udi nabu ne mu bivule.’ (Luka 16:10, MMM) Tudi ne bua kushala ne lulamatu nansha mu malu adi amueneka bu makese.
Dikeba bubanji bua mu Dîyi dia Nzambi
it-2-F 510 §4
Biseba bia nyama ya nkonga
Muvua bena Isalele babipete. Bu mudi muaku tachash udibu batele mu Bible uleja mushindu kampanda wa nyama wa nkonga, bidi bitusaka ku didiebeja ne: bena Isalele bavua bapetele biseba bia nyama ayi kuepi? Nansha mutu nyama ya nkonga itamba kusombela mu bitupa bia maloba bidi neje ilokela, mikuabu yoyi itu misue miaba idi luya. Lelu eu nyama ya nkonga ndambu itshidi anu mu tshitupa tshia Mbuu wa Mediterane, ne mu mâyi makuabu a luya. Mu kupita kua bidimu, bantu mbakepeshe bungi bua nkonga bikole, kabidi mu tshikondo tshivuabu bafunda Bible, nyama eyi ivua mua kuikala ya bungi mu Mbuu wa Mediterane ne mu Mbuu Mukunze. Calmet wakalua kufunda mu mukanda wende mu 1832 ne: “Nyama ya nkonga idi mu tubidiila tua bungi tua mu Mbuu mukunze pabuipi ne tshisanga tshia Sinai.”—Dictionary of the Holy Bible (dib. 139); tangila kabidi mu The Tabernacle’s Typical Teaching, wa A. J. Pollock, Londre, dib. 47.
w15-F 15/7 21 §1
Muntu udi umona mudimu webe udi ne mushinga anyi?
Pavuabu bajikije ntenta wa tshitendelelu, ditutu “diakatuadija kubuikila ntenta wa kusambakena, ne butumbi bua Yehowa buakuwula mu ntenta wa tshitendelelu.” (Eks 40:34) Tshivua tshimanyinu tshinene tshia dianyisha dia Yehowa! Buebe wewe, Besalele ne Oholiaba bavua mua kuikala bumvue munyi dîba adi? Nansha muvuabu kabayi bafunde mêna abu pa bintu bivuabu benze abi, bavua ne disanka dia kumanya ne: Nzambi uvua mubeneshe bionso bivuabu benze. (Nsu. 10:22) Mu bidimu biakalonda, bavua bushuwa basanke bikole bua kumona ne: batshivua anu benza mudimu ne bintu bivuabu benze abi mu mudimu wa Yehowa. Kakuyi mpata, pabishibua Besalele ne Oholiaba ku lufu mu ndongoluelu wa malu mupiamupia, nebasanke bikole pamanyabu ne: bavua benze mudimu ne ntenta wa tshitendelelu munkatshi mua bidimu bitue ku 500!
LUMINGU LUA DIA 9-15/11
BIUMA BIA MU DÎYI DIA NZAMBI | LEWITIKI 1-3
“Tshivuabu bafidila milambu”
it-2-F 847 §1
Milambu
Milambu ya kuosha. Bavua balambula Nzambi milambu ya kuosha anu ne bujima buayi; muntu uvua uyifila kavua mua kushala nansha ne katupa ka ku nyama ayi to. (Tangila kabidi Bal 11:30, 31, 39, 40.) Mulambu eu uvua dilomba Yehowa bua itabe, anyi bua aleje ne: uvua muanyishe mulambu wa mpekatu uvuabu imue misangu balambula tshiapamue nawu. Anu bu “mulambu wa kuosha,” Yezu Kristo wakadifila yeye yonso mujima.
it-2-F 849 §7
Milambu
Milambu ya ntete. Bavua bafila milambu ya ntete pamue ne milambu ya diumvuangana, ya kuosha, ne ya mpekatu; bavua bayifila pamuapa bu mamuma a kumpala; kuvua misangu ivuabu bayifila pa nkayayi. (Eks 29:40-42; Lew 23:10-13, 15-18; Nom 15:8, 9, 22-24; 28:9, 10, 20, 26-28; nshap 29) Ivua milambu ya kuleja nayi Nzambi dianyisha bua muvuaye mubalekeleele tshianza ne mabenesha ne bubanji. Misangu ya bungi bavua bayifila ne mafuta ne budimbu bua mupuya muimpe. Milambu ya ntete ivua ifidibua mu mishindu ya bungi bu mudi bukula bunefuke, ntete mikanga, mampa menza bu bikata anyi mikata ya bibetubetu miosha mu mfulu, mikangila mu mpanu anyi mu luesu luvua ne mafuta a nyama. Bavua bela imue milambu ya ntete pa tshioshelu tshia milambu ya kuosha, mikuabu bayidia kudi bakuidi, ne pavuayi ya diumvuangana, bantu bavua bayifila bavua pabu bayidia. (Lew 6:14-23; 7:11-13; Nom 18:8-11) Mulambu wa ntete nansha umue uvuabu balambula pa tshioshelu kawuvua ne bua kuikala ne luevene anyi ne “buitshi” (pamuapa badi bakula bua mâyi a tumuma tua mfigi anyi a bimuma bikuabu) bivua mua kumuma.—Lew 2:1-16.
it-2-F 847 §5
Milambu
Milambu ya diumvuangana (anyi milambu ya ditalala). Milambu ya diumvuangana ivua Yehowa wanyisha ivua tshimanyinu tshia ne: uvua wanyisha muntu uvua uyifila. Muntu au ne dîku diende bavua bayidia pabu (mu lubanza lua ntenta wa tshitendelelu; bilondeshile tshilele tshiabu, bavua basa bitanda binyunguluke mu lubanza dia muamua dia tshilamba tshia kukosolola natshi; mu ntempelo bavua balongololamu nzubu ya bidiilu). Muakuidi uvua uyilambula uvua wangata tshiende tshitupa, bakuidi bavua bamuambuluisha bangata pabu tshitupa tshikuabu. Yehowa yeye uvua upuyakana muishi muimpe wa mafuta a nyama avuabu buosha. Bu mudi mashi aleja muoyo, bavua baapesha Nzambi. Nunku bivua anu bu ne: mufidi wa mulambu au, ne muakuidi, ne Yehowa bavua badia tshiakudia atshi bonso, bileja ne: bavua mu ditalala. Muntu uvua udia biakudia abi pende kayi mukezuke (muikale ne bukoya nansha bua mushindu kayi bilondeshile Mikenji ya Mose) anyi uvua udia munyinyi pawu mumane kupitshisha matuku bilondeshile muvua mikenji yanyisha, bavua ne bua kumumbusha munkatshi mua tshisamba tshiabu. Uvua unyanga tshiakudia atshi bua dipanga diende dia bukezuke anyi bua didia biakudia bikavua binyanguke ku mêsu kua Yehowa Nzambi abi, bileja ne: muntu au kavua ne kanemu bua bintu bia tshijila nansha.—Lew 7:16-21; 19:5-8.
Dikeba bubanji bua mu Dîyi dia Nzambi
Malu manene a mu mukanda wa Lewitiki
2:13—Bua tshinyi bavua ne bua kufila luepu ne ‘milambu yonso’? Kabavua benza nunku bua kulengeja muenya wa milambu to. Pa buloba bujima, bantu batu bela luepu mu bintu bua kubilama. Bia muomumue, bavua bafila luepu ne milambu imue misangu bualu luvua luleja dibenga kunyanguka anyi kubola.
it-1-F 1003 §7
Mafuta a nyama
Tshivuabu belele mukenji eu. Bilondeshile Mikenji ya Mose, bavua bangata mashi ne mafuta a nyama bu bintu bivua anu bia Yehowa nkayende. Mu mashi mudi muoyo, pende anu Yehowa nkayende ke mufidi wa muoyo, ke bualu kayi mashi avua anu ende nkayende. (Lew 17:11, 14) Mafuta ke tshitupa tshia ku nyama tshitu tshimpe tshitambe. Pavuabu balambula mafuta a nyama bivua bua kuleja ne: Yehowa uvua muakanyine bintu bitambe buimpe bualu yeye ke utu upesha bantu bintu bia bungi; bivua bileja kabidi ne: muntu au uvua musue kupesha Nzambi tshintu tshiende tshitambe buimpe. Bu muvua bena Isalele balambula mafuta a nyama au bu tshintu tshiabu tshitambe buimpe, Bible udi wamba ne: bavua baafuimisha pa tshioshelu bu “biakudia,” bua umutumine “dipembu dimpe.” (Lew 3:11, 16) Nunku, pavua muntu udia mafuta a nyama, uvua udia tshintu tshivua tshijidila Yehowa, udia tshintu tshivua anu tshia Yehowa nkayende. Muntu uvua udia mafuta a nyama uvua mukumbanyine tshibawu tshia lufu. Kadi mafuta a nyama kaavua bu mashi to bualu wowu bavua mua kuenza nawu malu makuabu, nansha a nyama ivua midifuile anyi mishipa kudi nyama mikuabu.—Lew 7:23-25.
Malu manene a mu mukanda wa Lewitiki
3:17. Bu muvuabu bangata mafuta bu tshitupa tshitambe bulenga anyi tshia mushinga mukole, bidi bimueneka ne: dikandika kudia mafuta divua ne bua kuleja bena Isalele ne: tshitupa tshimpe menemene tshivua tshia Yehowa. (Genese 45:18) Bualu ebu budi butuvuluija ne: tudi ne bua kupesha Yehowa bintu bietu bidi bitambe bulenga.—Nsumuinu 3:9, 10; Kolosai 3:23, 24.
LUMINGU LUA DIA 16-22/11
BIUMA BIA MU DÎYI DIA NZAMBI | LEWITIKI 4-5
“Pesha Yehowa tshintu tshitambe buimpe tshiudi natshi”
it-2-F 848 §12
Milambu
Milambu ya dipila.
Bavua bafila milambu ya dipila bua mpekatu, bualu didipisha dionso didi anu ditangila mpekatu kampanda. Bavua bayifila bua mpekatu ya pa buayi ivua muntu mua kudiumvuila mupile, ne ivua mishilangane kakese ne milambu mikuabu ya mpekatu bualu bavua pamuapa bayifila bua kulongolola tshintu tshinyanga anyi kupingaja tshintu kampanda tshijimija. Tshintu atshi tshivua mua kuikala tshia Yehowa anyi tshia tshisamba tshiende. Muntu uvua ufila mulambu wa dipila bua kulongolola tshintu tshia Yehowa tshinyanga anyi kufuta bintu bia tshipungidi bua afuidibue luse ne kapetshi manyoka adi makumbanyine mpekatu wende to.—Tangila Yes 53:10.
w09-F 1/6 26 §3
Udi utabalela mikalu yetu
Bu muvua Mikenji ya Mose ileja mushindu uvua Yehowa utabalelangana ne dinanga dionso, ivua yamba ne: “Kadi bikalaye kayi ne mushindu wa kupeta mukoko, udi ne bua kulua ne tumanda nkutshi tubidi anyi bana ba nkudimba babidi kudi Yehowa bu mulambu wende wa dipila bua mpekatu, umue bua mulambu wa mpekatu ne mukuabu bua mulambu wa kuosha.” (Mvese wa 7) Tshiambilu tshia ne: “bikalaye kayi ne mushindu wa kupeta” badi mua kutshikudimuna kabidi ne: “bikalaye tshianza tshiende katshiyi mua kufika.” Pavua muena Isalele mupele menemene kayi ne mushindu wa kupeta mukoko, dîba adi Nzambi uvua witaba ne muoyo mujima tshintu tshivuaye natshi, mmumue ne: tumanda nkutshi tubidi anyi bana ba nkudimba babidi.
w09-F 1/6 26 §4
Udi utabalela mikalu yetu
Ntshinyi tshivua muena Isalele mua kuenza yeye kayi ne mushindu wa kupeta nansha tunyunyi tubidi? Mikenji ya Mose ivua yamba ne: “Udi ne bua kulua ne tshia dikumi tshia efa [makopo muanda mukulu anyi tshitema] wa bukula bunefuke bua mulambu wa mpekatu.” (Mvese wa 11) Bua mupele wa menemene, Yehowa uvua umuanyishila bua kufila mulambu wa mpekatu kakuyi mashi to. Mu Isalele, bupele kabuvua bupangisha muntu mabenesha a dibuikila mpekatu anyi diakalenga dia kuikala mu ditalala ne Nzambi nansha.
Dikeba bubanji bua mu Dîyi dia Nzambi
Longela malu kudi batendeledi ba Yehowa ba lulamatu
14 Wewe pebe udi mua kuanji kuikala ne lulamatu kudi Yehowa, ne pashishe kudi bakuabu pa kuikala ne bulenga. Tshilejilu, udi mua kuikala ne tshijadiki tshia ne: muanetu kampanda mmuenze mpekatu munene. Udi musue kuikala ne lulamatu kudiye, nangananga yeye muikale mulunda webe wa pa muoyo anyi muena mu dîku dienu. Kadi udi kabidi mumanye ne: bidi ne mushinga wa bungi bua kuikala ne lulamatu kudi Yehowa. Nunku anu bu Natana, tumikila Yehowa ne leja muena Kristo nebe bulenga. Ambila muanenu au bua alombe diambuluisha kudi bakulu ne abambile bualu abu pa lukasa. Yeye kayi muenze nanku, wewe udi ne bua kuambila bakulu. Paudi wenza nunku, udi ushala mulamate Yehowa. Udi kabidi uleja muanenu bulenga bualu bakulu nebamuambuluishe bua kuikalaye kabidi mu malanda mimpe ne Yehowa. Nebamubele mu mushindu muimpe ne lutulu luonso.—Bala Lewitiki 5:1; Galatiya 6:1.
it-1-F 861 §8
Bunsantu
Nyama ne bintu. Bavua bangata muanabute mulume wa muntu, wa ngombe, wa mukoko, ne wa mbuji bu bintu bia tshijila ku mêsu kua Yehowa, ne kabavua ne bua kubipikula nansha. Bavua ne bua kubilambula, ne bakuidi bavua bajidila bavua bangata tshitupa tshiabi. (Nom 18:17-19) Bintu bia kumpala bia pa madimi ne tshia dikumi bivua pabi bia tshijila anu bu muvua milambu ne mapa makuabu onso avuabu bajidila bua mudimu uvuabu benza muaba munsantu. (Eks 28:38) Bintu bionso bivuabu bajidila Yehowa bivua bia tshijila (binsantu) ne kabavua ne bua kubiangata ne mushinga mukese anyi kuenza nabi mudimu bu bintu bikuabu bionso peshi kubinyanga nansha. Tuangate tshilejilu tshia mukenji uvua utangila tshia dikumi. Pavua muntu uteka bintu bia kufila bu tshia dikumi ku luseke bu mudi ntete ya blé ivuaye mupole, yeye anyi muntu mukuabu wa mu nzubu muende yeye mulue kuambulamu ndambu tshilejilu bua kulamba kumbelu, muntu au uvua upeta dipila bua dishipa dia mukenji uvua utangila bintu bia tshijila. Mikenji ivua yamba ne: muntu au uvua ne bua kufila tshimpanga tshia mukoko tshimpe tshia mu tshisumbu tshia mikoko, kufuta kabidi muaba wa tshijila bintu bivuaye muangate abi bungi buvuaye mubiangate, usakidilaku ne bia pa lukama 20. Nunku bantu bavua ne bua kupeta kanemu kakole bua bintu bia tshijila bia Yehowa.—Lew 5:14-16.
LUMINGU LUA DIA 23-29/11
BIUMA BIA MU DÎYI DIA NZAMBI | LEWITIKI 6-7
“Tshienzedi tshiakuleja natshi dianyisha”
Malu adi mukanda wa Lewitiki mua kutulongesha
9 Dilongesha dibidi: Tudi tuenzela Yehowa mudimu bualu tudi ne dianyisha kudiye. Bua kumvua bualu ebu bimpe, tuanji tukonkonone bualu bukuabu bua mushinga mu ntendelelu mulelela mu Isalele wa kale; bualu abu mbua milambu ya diumvuangana. Mukanda wa Lewitiki udi utuleja ne: muena Isalele uvua mua kufila mulambu wa diumvuangana kudi Nzambi ‘bua kumuela tuasakidila.’ (Lew. 7:11-13, 16-18) Muntu uvua uwufila bualu uvua musue kuwufila, kadi ki mbualu bavua bamuenzeje to. Nanku eu uvua mulambu uvua muntu udifidila bualu uvua munange Yehowa Nzambi wende. Mufidi wa mulambu eu ne bena mu dîku diende ne bakuidi bavua badia munyinyi wa nyama wa mulambu. Kadi kuvua bitupa bikuabu bia nyama bivuabu bapesha anu Yehowa nkayende. Mbitupa kayi abi?
Milambu yakasankisha Nzambi
15 Mulambu mukuabu wa budisuile uvua mulambu wa buobumue, udibu bumvuije mu Lewitiki nshapita 3 (NW). Badi mua kukudimuna kabidi dîna edi ne: ‘mulambu wa bintu bifila bua ditalala.’ Mu tshiena-Ebelu, muaku “ditalala” utu utamba kumvuija malu a bungi kupita dibenga kuikala patupu mu mvita anyi mu ndululu. Mukanda mukuabu (Studies in the Mosaic Institutions) udi wamba ne: “Mu Bible, muaku eu udi umvuija bualu ebu, ne kabidi nsombelu anyi malanda a ditalala ne Nzambi, bubanji, disanka ne diakalenga.” Ke bua tshinyi bavua bafila milambu ya buobumue, kabiyi bua kukeba ditalala ne Nzambi, bienze bu bua kumutokesha munda, kadi bua kuleja dianyisha anyi kusanka bua nsombelu muimpe wa ditalala ne Nzambi uvua nende bantu bavuaye wanyisha. Bakuidi ne muntu uvua ulambula bavua badia mulambu au panyima pa bamane kulambula Yehowa mashi ne mafuta. (Lewitiki 3:17; 7:16-21; 19:5-8) Mu mushindu mulenga wa tshimfuanyi, mbienze anu bu se: muntu uvua ulambula, bakuidi ne Yehowa Nzambi bavua badia biakudia pamue, bileja malanda mimpe a ditalala avua pankatshi pabu.
Milambu ya kutumbisha nayi Yehowa idi imusankisha
8 Bivua munyi bua muntu uvua ufila mulambu? Mikenji ivua yamba ne: muntu yonso uvua ulua kumpala kua Yehowa uvua ne bua kuikala mukezuke ne kayi tshilema to. Muntu uvua udinyanga ku bualu kampanda, tshia kumpala uvua ne bua kufila mulambu wa bubi anyi wa disambuka dia mikenji bua kupetulula ngikadilu wende muimpe kumpala kua Yehowa bua Yeye itabe mulambu wende wa kuosha anyi wa buobumue. (Lewitiki 5:1-6, 15, 17) Tudiku tumona mpindieu mushinga wa kuikala misangu yonso ne ngikadilu muimpe kumpala kua Yehowa anyi? Bituasua bua Nzambi kuanyishaye ntendelelu wetu, tudi ne bua kulongolola ne lukasa malu onso atudi benze adi mikenji yende ibenga. Tudi ne bua kunyemena ne lukasa ku mishindu idi Yehowa mulongolole bua kutuambuluisha: “bakulu ba tshisumbu” ne ‘mulambu wa kubuikila nawu mibi yetu,’ Yezu Kristo.—Yakobo 5:14, NW; 1 Yone 2:1, 2.
Dikeba bubanji bua mu Dîyi dia Nzambi
it-1-F 889 §2
Kapia
Mudimu waku mu ntenta wa tshitendelelu ne mu ntempelo. Kapia kavua ne mushinga mu mudimu uvua wenzeka ku ntenta wa tshitendelelu, bakalua kuenza naku kabidi mudimu ku ntempelo. Mu dinda dionso ne pavua dîba pa kubuela kumpala kua butuku kuila, muakuidi munene uvua ne bua kuosha musenga wa manananshi pa tshioshelu tshia musenga wa manananshi. (Eks 30:7, 8) Mikenji ya Nzambi ivua ilomba bua kapia kikale anu katema pa tshioshelu tshia mulambu wa kuosha. (Lew 6:12, 13) Nansha mudi bantu ba bungi bitaba tshilele tshia buena Yuda tshidi tshiamba ne: kapia ka ntuadijilu ka pa tshioshelu kavua katemesha kudi Nzambi mu tshishima, bualu ebu kabuena bupetangana nansha kakese ne tshidi Bible wamba to. Bilondeshile mêyi avua Yehowa muambile Mose bua kulonda ku ntuadijilu, bana ba Alona bavua ne bua ‘kuteka kapia pa tshioshelu ne kulonga nkunyi pa kapia aku’ kumpala kua kutekapu nyama wa kulambula. (Lew 1:7, 8) Anu panyima pa bamane kubanjija buakuidi bua nzubu wa Alona ne bamane kulambula milambu ya dibanjija nayi ke pakatuluka kapia ka kudi Yehowa, pamuapa kafumina mu ditutu divua pa mutu pa ntenta wa tshitendelelu, koku kuosha mulambu uvua pa tshioshelu. Bilondeshile tshivua tshienzeke atshi, kapia ka mu tshishima kakavua kamueneke bua kutemesha nkunyi ivua pa tshioshelu to, kadi kakabanga “kuosha mulambu wa kuosha ne bitupa bia mafuta bivua pa tshioshelu.” Nunku bidi bimueneka ne: kapia kavua katungunuke ne kutema pa tshioshelu aku nkapia kakavuabu batemeshilapu kusangisha ne kavua kafume kudi Nzambi. (Lew 8:14–9:24) Bia muomumue, kapia kavua Yehowa mutume mu tshishima kakosha milambu anu panyima pa Solomo mumane kusambila bua kubanjija ntempelo.—2Ku 7:1; tangila kabidi Bal 6:21; 1Bk 18:21-39; 1Ku 21:26 bua kumanya misangu mikuanbu ivua Yehowa mutume kapia mu tshishima pavuaye muanyishe milambu ya batendeledi bende.
si-F 27 §15
Mukanda muisatu wa mu Bible: Lewitiki
15 3) Bavua bafila mulambu wa mpekatu bua mpekatu muenza kabiyi ku bukole, anyi muenza mu dipanga. Bavua balambula nyama mishilangane bilondeshile muntu uvua muenze mpekatu au, mmumue ne: bua mpekatu wa muakuidi, wa tshisamba tshijima, wa mfumu, anyi wa muntu kayi yonso. Mulambu wa mpekatu uvua mushilangane ne milambu ya diumvuangana ne milambu ya kuosha ivua bantu bafila ku budisuile, wowu muntu uvua muenzejibue bua kuwufila.—4:1-35; 6:24-30.
LUMINGU LUA DIA 30/11–6/12
BIUMA BIA MU DÎYI DIA NZAMBI | LEWITIKI 8-9
“Tshimanyinu tshia dibenesha dia Yehowa”
it-1-F 1189 §2
Dibanjijibua
Mose wakowesha Alona ne bana bende aba mâyi: Nadaba, Abihu, Eleazâ, ne Itamâ ku dilongo dia tshiamu tshia mitaku divua mu lubanza (anyi wakabambila bua buowe mâyi), kuvuadikaye Alona bilamba bia mushinga mukole bia muakuidi munene. (Nom 3:2, 3) Bakasakidila bintu bikuabu bilengele ku bilamba abi bivua bileja bulengele bua mudimu wende au ne bujitu buawu. Pashishe Mose wakela ntenta wa tshitendelelu manyi, kuelaye bintu bionso bivuamu ne biamu bia mudimu bivuamu manyi pamue ne tshioshelu tshia milambu ya kuosha, ne dilongo dinene ne bintu bionso bivuabu benza nabi mudimu kuntu aku. Tshienzedi atshi tshiakabivuija bia tshijila, biteka ku luseke bua mudimu wa Nzambi nkayawu. Ndekelu wa bionso Mose wakapongoluela Alona manyi pa mutu bua kuleja ne: uvua muedibue manyi.—Lew 8:6-12; Eks 30:22-33; Mis 133:2.
it-1-F 1190 §3
Dibanjijibua
Mu dituku dia muanda mukulu, bamane kubanjija bakuidi ne babapeshe bionso bivua bikengela, bakatuadija mudimu wabu (kakuyi diambuluisha dia Mose) bua musangu wa kumpala, kulambulabu milambu ya dibuikidila nayi tshisamba tshia Isalele mpekatu. Bena Isalele bavua dijinga ne kukezudibua bua dipanga diabu dia bupuangane, kabidi nangananga bualu bavua bafuma ku dibenga kutumikila Nzambi pavuabu benze kana ka ngombe ka or, bualu buvua kabuyi busankishe Yehowa nansha. (Lew 9:1-7; Eks 32:1-10) Ku ndekelu kua mudimu wa kumpala eu muenza kudi bakuidi bapiabapia bajadika, Yehowa wakatuma kapia ka mu tshishima bua kuleja ne: uvua mubanyishe ne mubajadike mu mudimu au; kapia aku kavua mua kuikala kafumina mu ditutu divua pa mutu pa ntenta wa tshitendelelu, kuoshaku milambu ivua pa tshioshelu.—Lew 9:23, 24.
Malu adi mukanda wa Lewitiki mua kutulongesha
13 Dilongesha dinayi: Yehowa udi ubenesha tshitupa tshia bulongolodi buende tshia pa buloba. Tangila tshiakenzeka mu 1512 kumpala kua Yezu pavuabu base ntenta wa tshitendelelu kuinshi kua mukuna wa Sinai. (Ekes. 40:17) Mose wakalombola tshibilu tshia diteka dia Alona ne bana bende mu mudimu wa buakuidi. Tshisamba tshia Isalele tshiakadisangisha bua kumona muvua bakuidi balambula nyama bua musangu wa kumpala. (Lew. 9:1-5) Mmunyi muvua Yehowa muleje ne: uvua muitabe bakuidi bavuabu bafuma ku diteka abu? Pavua Alona ne Mose benda babenesha bantu, kapia ka kudi Yehowa kakosha milambu ivua mishale pa tshioshelu.—Bala Lewitiki 9:23, 24.
Dikeba bubanji bua mu Dîyi dia Nzambi
Bua tshinyi tudi ne bua kuikala ba tshijila?
6 Mukenji uvua ulomba bakuidi ba mu Isalele bua kuikala bakezuke ku mubidi udi ne diumvuija dinene bua bantu ba Yehowa lelu. Bantu batutu tulonga nabu Bible batu misangu ya bungi bamona ne: miaba yetu ya ntendelelu itu ne mankenda ne kabidi mututu tuvuala bimpe. Kadi, bukezuke bua bakuidi budi butuambuluisha bua kumanya ne: muntu yonso udi ubanda ku mukuna mule wa Yehowa bua kumutendelela udi ne bua kuikala ne “mutshima mutoke.” (Bala Musambu wa 24:3, 4; Yesh. 2:2, 3.) Tudi ne bua kuenzela Nzambi mudimu wa tshijila ne lungenyi ne muoyo ne mubidi bikezuke. Ebi bidi bilomba kudikonkonona misangu yonso, ne bamue badi mua kumona ne: bidi bikengela kuakaja malu bua kuluabu ba tshijila. (2 Kol. 13:5) Tshilejilu, muntu ukadi mutambule udi utangila bimfuanyi bia bantu kabayi bilamba ku budisuile udi mua kudiebeja ne: ‘Ndiku wa tshijila anyi?’ Pashishe udi mua kukeba diambuluisha bua kulekela tshilele tshibi etshi.—Yak. 5:14.
it-2-F 310 §5
Mose
Nzambi wakateka Mose mutuangaji wa tshipungidi tshia mikenji tshivuaye mudie ne bena Isalele, mudimu uvua mumubueje mu malanda a pa buawu avua muntu mukuabu kayi mupete ne Nzambi pa kumbusha Yezu Kristo, mutuangaji wa tshipungidi tshipiatshipia. Mose wakamiamina mashi a nyama ivuabu balambule pa mukanda wa tshipungidi uvua uleja Yehowa bu umue wa ku bantu bavua mu tshipungidi atshi, kuamiaminaye kabidi bantu (bimueneka ne: mbakulu bavua baleji mpala ba tshisamba) bavua pabu mu tshipungidi atshi. Wakabadila bantu mukanda wa tshipungidi, bantu kuandamuna ne: “Tudi tuitaba bua kuenza bionso bidi Yehowa muambe, ne netutumikile.” (Eks 24:3-8; Eb 9:19) Bu muvua Mose mutuangaji, wakapeta diakalenga dia kulombola mudimu wa dienza ntenta wa tshitendelelu ne bintu bia kuenza nabi mudimu ku ntenta aku bilondeshile tshivua Yehowa mumuambile, ne kuela ntenta wa tshitendelelu ne Alona muakuidi munene manyi menza ne bintu bia pa buabi, ubanjija buakuidi. Pashishe kulombolaye mudimu wa kumpala wa dilambula milambu wakenza bakuidi bavuabu bafuma ku dijidila abu.—Eks nshap 25-29; Lew nshap 8, 9.