Dinanga ne dianyisha bidi nabi muntu kudi Yehowa bidi bimusaka bua kubatijibua

1-2. Bilondeshile Bienzedi 8:27-31, 35-38, ntshinyi tshivua tshisake muena Etshiopi bua kubatijibua?

UDI musue kubatijibua bua kulua muyidi wa Kristo anyi? Bantu ba bungi mbangate dipangadika adi bua dinanga ne muoyo wa kuleja dianyisha. Tuangate tshilejilu tshia muena mudimu kampanda wa mukalenge mukaji wa mu Etshiopi.

² Malu a mu Mifundu avua muena Etshiopi au mulonge akamusaka bua kuangata dipangadika musangu umue. (Bala Bienzedi 8:27-31, 35-38.) Ntshinyi tshivua tshimusake bua kuenza nanku? Bidi bimueneka patoke ne: uvua wangata Dîyi dia Nzambi ne mushinga; uvua wenda ubala mvese ya mu mukanda wa Yeshaya pavuaye mu ditempu ufumina ku Yelushalema mutangile kuabu. Pavua Filipo muyukile nende, wakaleja dianyisha bua tshivua Yezu mumuenzele. Kadi tshivua muntu eu muyile ku Yelushaleme ntshinyi? Ukavua munange Yehowa. Bua tshinyi tudi tuamba nanku? Bualu utshivua ubangilaku kutendelela Yehowa ku Yelushalema. Bidi bimueneka ne: uvua mulekele ntendelelu wa baledi bende ne mudisangishe ne tshisamba tshimuepele tshivua tshiditshipe kudi Nzambi mulelela. Dinanga diende dia Yehowa adi ke divua dimusake kabidi bua kuenza bualu bukuabu bua mushinga, tuambe ne: kubatijibua bua kulua muyidi wa Kristo.​—Mat. 28:19.

3. Ntshinyi tshidi mua kupangisha muntu bua kubatijibua? (Tangila kazubu ka “Udi ne muoyo wa mushindu kayi?”)

³ Dinanga diebe dia Yehowa didi mua kukusaka bua kubatijibua. Kadi dinanga didi mua kukupangisha kabidi bua kuenza nanku. Bua tshinyi? Tuangate bimue bilejilu. Udi mua kuikala munange bena mu dîku dienu anyi diebe anyi balunda bebe badi kabayi Bantemu bikole, ne bidi mua kuikala bikutonda wela meji ne: wewe mubatijibue nebakukine. (Mat. 10:37) Udi mua kuikala nansha munange bilele biudi mumanye ne: Nzambi mubikine, ne mumone ne: bidi bikukolela bua kubilekela. (Mis. 97:10) Udi kabidi mua kuikala mukole wenda usekelela bilele bidi bipetangana ne ntendelelu wa dishima. Mushindu unuvua nusekelela bilele abi udi mua kuikala utshidi ukusankisha. Nunku bidi mua kukukolela bua kulekela disekelela bilele bidi kabiyi bisankisha Yehowa. (1 Kol. 10:20, 21) Lukonko luudi ne bua kudiela ndua ne: “Ntshinyi anyi nnganyi undi munange bikole?”

MUNTU UUDI NE BUA KUNANGA BIKOLE

4. Mbualu kayi bunene budi ne bua kukusaka bua kubatijibua?

⁴ Udi ne malu a bungi audi mua kunanga ne kulejila dianyisha. Tshilejilu, uvua mua kuikala utumikila tshidi Bible wamba kuyi nansha muanji kubanga kulonga ne Bantemu to. Uvua mua kuikala kabidi munange Yezu. Mpindieu uukadi mufike ku dimanya Bantemu, udi mua kuikala musue kusomba nabu. Kadi kunanga malu mimpe aa nkayaku kakuakukusaka menemene bua kuditshipa kudi Yehowa ne kubatijibua to. Bualu bunene budi ne bua kukusaka bua kubatijibua ndinanga diebe dia Yehowa Nzambi nkayende. Wewe munange Yehowa kupita bintu bikuabu bionso, kuakulekela tshintu anyi muntu ukupangisha bua kumuenzela mudimu to. Dinanga diebe dia Yehowa nedikusake bua kubatijibua ne nedikuambuluishe bua kushala ne lulamatu kudiye pawabatijibua.

5. Ntshinyi tshituamona mu tshiena-bualu etshi?

⁵ Yezu wakamba ne: tudi ne bua kunanga Yehowa ne muoyo wetu wonso ne anyima wetu yonso ne lungenyi luetu luonso ne bukole buetu buonso. (Mâko 12:30) Mmunyi muudi mua kulonga mua kunanga Yehowa mushindu au ne kumunemeka bikole? Patudi tuelangana meji bua mudi Yehowa mutunange, bidi bitusaka bua tuetu petu kumunanga. (1 Yone 4:19) Tshiena-bualu etshi netshituleje ngenyi ya bungi yakuambuluisha bua kuenza nanku. Netumone kabidi muituikala tudiumvua ne malu makuabu atuikala tuenza patudi anu tunanga Yehowa.b

6. Bilondeshile Lomo 1:20, ngumue mushindu kayi uudi mua kulonga malu a Yehowa?

⁶ Longela malu a Yehowa ku bifukibua. (Bala Lomo 1:20; Buak. 4:11) Elangana meji bua meji a Yehowa adi amuenekela mu bikunyibua ne nyama bidiye mufuke. Mushindu wa dikema udi mubidi webe muenza ukulongeshaku nansha malu makese. (Mis. 139:14) Elangana kabidi meji bua bukole budi Yehowa muele mu dîba, mumanye ne: dîba ngumue wa ku mitoto idi bungi bu ntunta ne ngenena.c (Yesh. 40:26) Paudi wenza nanku, neunemeke Yehowa bikole. Kadi kumanya ne: Yehowa udi ne meji ne bukole bua bungi mbualu bumuepele tshianana bua ku malu adi akuambuluisha bua kudia nende malanda. Bua kunanga Yehowa bikole, bidi bikengela kumanya malu a bungi adi amutangila.

7. Bua wewe kunanga Yehowa bikole, bidi bikengela wikale mutuishibue ku tshinyi?

⁷ Bidi bikengela wikale mutuishibue ne: Yehowa udi ukutabalela menemene. Bitu bikukolela bua kuitabuja ne: Mufuki wa diulu ne buloba mmumanye ne: utuku ne udi ukutabalela anyi? Biobi nanku, umanye ne: Yehowa kena “kule ne yonso wa kutudi” to. (Bien. 17:26-28) Udi “ukonkonona mioyo yonso,” ne udi ukulaya anu muvua Davidi muambile Solomo ne: “Wewe mumukebe, neenze bua umupete.” (1 Kul. 28:9) Mu bulelela, udi ulonga Bible mpindieu bualu Yehowa mmuambe ne: “Ndi mukukoke kundi.” (Yel. 31:3) Paudi wenda ujingulula malu onso adi Yehowa mukuenzele, neulue kumunanga kabidi bikole.

8. Mmunyi muudi mua kuleja dianyisha bua dinanga dia Yehowa?

⁸ Umue mushindu wa kuleja ne: udi ne dianyisha bua dinanga dia Yehowa nkumusambila. Dinanga diebe dia Nzambi nedikole paudi umuambila malu adi makutonde ne umusakidila bua malu onso adiye mukuenzele. Bualu bukuabu, malanda enu ne Yehowa neakole paudi umona mudiye wandamuna masambila ebe. (Mis. 116:1) Neufike ku dituishibua ne: utu ukumvua. Kadi bua wewe kusemena pabuipi ne Yehowa, bidi bikengela ujingulule bidiye musue, bidiye kayi musue, ne tshituye wenzela amue malu. Bidi bikengela kabidi umanye malu adiye ukulomba. Mushindu umuepele uudi mua kupeta dimanya adi nkulonga Bible Dîyi diende.

9. Mmunyi muudi mua kuleja ne: udi wangata Bible ne mushinga?

⁹ Manya mua kuangata Bible Dîyi dia Nzambi ne mushinga. Anu Bible ke udi ne malu malelela adi atangila Yehowa ne tshidiye mukulongoluele kumpala eku. Paudi ubala Bible dituku dionso, udilongolola kumpala kua kukulongeshabu, ne utumikila biudi ulongamu, udi uleja ne: udi umuangata ne mushinga. (Mis. 119:97, 99; Yone 17:17) Utu ne programe wa kudibadila Bible anyi? Utu ubala Bible dituku dionso bilondeshile programe webe au anyi?

10. Mbumue bua ku malu kayi adi enza bua Bible ikale mukanda wa pa buawu?

¹⁰ Bumue bua ku malu adi enza bua Bible ikale mukanda wa pa buawu mbua ne: udi ne malu a Yezu adibu bambe kudi bantu bavua bamumone ne abu abidi. Yeye ke mukanda mujalame umuepele udi umvuija malu adi Yezu mukuenzele. Wewe ulonga malu avua Yezu muambe ne muenze, bidi mua kukusaka bua kudia nende bulunda.

11. Ntshinyi tshidi mua kukuambuluisha bua kunanga Yehowa?

¹¹ Longa mua kunanga Yezu. Wewe munange Yezu, neunange Yehowa bikole. Bua tshinyi? Bualu Yezu udi widikija ngikadilu ya Tatuende bimpe menemene. (Yone 14:9) Nanku paudi wenda ulonga malu adi atangila Yezu, neumvue Yehowa bimpe ne neumuangate ne mushinga wa bungi. Anji elabi meji bua muvua Yezu umvua luse bua bantu bavuabu balengulula kudi bakuabu; ku bantu abu kuvua bavua bapele, bavua basama, ne bavua kabayi ne wabu wa kubakuila. Ela kabidi meji bua mibelu mimpe idiye ukupesha ne mudi nsombelu webe ulengela paudi umutumikila.​—Mat. 5:1-11; 7:24-27.

12. Paudi ulonga malu adi atangila Yezu, bidi mua kukusaka bua kuenza tshinyi?

¹² Paudi welangana meji bikole bua mulambu udi Yezu mufile bua batubuikidile mpekatu, udi mua kulua kumunanga kabidi bikole. (Mat. 20:28) Dîba diudi ujingulula ne: Yezu uvua muitabe bua kukufuila, bidi mua kukusaka bua kunyingalala bua mpekatu yebe ne kulomba Yehowa luse. (Bien. 3:19, 20; 1 Yone 1:9) Paudi ufika kabidi ku dinanga Yezu ne Yehowa, wewe nkayebe neumvue bua kusomba ne bakuabu badi babanange pabu.

13. Yehowa neakubeneshe ne tshinyi?

¹³ Longa mua kunanga bena mu dîku dia Yehowa. Bena mu dîku dienu ne balunda bebe ba kale badi kabayi Bantemu kabena pamuapa mua kumvua tshiudi ujinga kuditshipila kudi Yehowa to. Badi nansha mua kukuluisha. Yehowa neakubeneshe ne dîku dia mu nyuma. Wewe mushale pamue ne benamu, neumone mudibu bakunange ne mudibu bakukuatshisha mudibi bikengela. (Mâko 10:29, 30; Eb. 10:24, 25) Mu bungi bua matuku, bena mu dîku dienu badi mua kukulonda pabu bua kuenzela Yehowa mudimu ne kutumikila mikenji yende.​—1 Pet. 2:12.

14. Anu mudi 1 Yone 5:3 uleja, ntshinyi tshiudi mulue kumona bua mikenji ya Yehowa?

¹⁴ Longa mua kunanga mikenji ya Yehowa ne kuyitumikila. Kumpala kua kufika ku dimanya Yehowa, uvua mua kuikala udielela yebe mikenji ya tshidi tshimpe ne tshidi tshibi; kadi lelu udi umona ne: mikenji ya Yehowa mmipite yebe kule ne kule. (Mis. 1:1-3; bala 1 Yone 5:3.) Elabi meji bua mibelu idi Bible ufila bua balume, bakaji, baledi, ne bana. (Ef. 5:22–6:4) Paudi utumikila mibelu eyi, kuenaku umona ne: nsombelu wa mu dîku dienu anyi diebe mmulongoloke anyi? Paudi utumikila mikenji ya Yehowa ya mua kumanya mua kusungula balunda bimpe, kuenaku mulue ne bikadilu bimpe anyi? Kuena mulue muntu wa disanka anyi? (Nsu. 13:20; 1 Kol. 15:33) Tudi tuela meji: newandamune ne: Eyowa ku nkonko eyi.

15. Ntshinyi tshiudi mua kuenza wewe dijinga ne kutumikila mêyi manene a mu Bible?

¹⁵ Imue misangu, bidi mua kukukolela bua kumanya mua kutumikila mêyi manene a mu Bible audi ulonga. Ke bualu kayi Yehowa udi wenza mudimu ne bulongolodi buende bua kukupesha mikanda idi yumvuija malu a mu Bible idi mua kukuambuluisha bua kujingulula tshidi tshimpe ne tshidi tshibi. (Eb. 5:13, 14) Wewe uyibala ne uyilonga, neumone mudiyi ikuambuluisha ne muudi mua kuyitumikila mu nsombelu webe, ne bidi pamuapa mua kukukoka kudi bulongolodi bua Yehowa.

16. Mmushindu kayi udi Yehowa mulongolole bantu bende?

¹⁶ Manya mua kunanga bulongolodi bua Yehowa ne kubutua mpanda. Yehowa mmulongolole bantu bende mu bisumbu bia bena Kristo; Muanende Yezu udi ku mutu kuabi bionso. (Ef. 1:22; 5:23) Yezu mmuteke kasumbu kakese ka bela manyi bua kulombola mudimu udiye musue bua wenzeke lelu. Mmukabikile ne: “mupika wa lulamatu udi mudimuke”; bantu aba kabatu banaya ne mudimu udibu babapeshe wa kukudisha ne kukukuba mu nyuma to. (Mat. 24:45-47) Mona umue mushindu udi mupika wa lulamatu wenza bua bakutabalele: mmuenze bua bateke bakulu badi bakumbane bua kukulama. (Yesh. 32:1, 2; Eb. 13:17; 1 Pet. 5:2, 3) Bakulu badi ne muoyo wa kudifila bua bualu buebe, kukukolesha, ne kukuambuluisha bua kusemena kabidi pabuipi menemene ne Yehowa. Kadi bumue bua ku malu manene a mushinga adibu mua kukuenzela nkukuambuluisha bua kulongesha bakuabu malu a Yehowa.​—Ef. 4:11-13.

17. Bilondeshile Lomo 10:10, 13, 14, bua tshinyi tudi tuambila bakuabu malu a Yehowa?

¹⁷ Ambuluisha bakuabu bua bamanye mua kunanga Yehowa. Yezu wakambila bayidi bende bua kulongesha bakuabu malu a Yehowa. (Mat. 28:19, 20) Udi mua kutumikila dîyi edi anu bualu mmbatutuminadi. Kadi padi dinanga diebe dia Yehowa dienda dikola, neufike ku dienza malu anu muvua mupostolo Petelo ne Yone benze. Bakamba ne: “Katuena mua kulekela kuakula bua malu atudi bamone ne bumvue to.” (Bien. 4:20) Bitu bitusankisha bikole patudi tuambuluisha muntu bua kufika ku dinanga Yehowa. Fuanyikijabi bungi bua disanka divua nadi muambi Filipo pakambuluishaye muena Etshiopi bua kumanya bulelela buvua mu Mifundu ne kubatijibua! Paudi widikija Filipo ne utumikila dîyi dia Yezu dia kuyisha, udi uleja ne: udi musue kulua pebe Ntemu wa Yehowa. (Bala Lomo 10:10, 13, 14.) Dîba adi, pamuapa newebeje pebe anu muvua muena Etshiopi muebeje ne: “Ntshinyi tshidi tshimpangisha bua meme kubatijibua?”​—Bien. 8:36.

18. Ntshinyi tshituamona mu tshiena-bualu tshialonda?

¹⁸ Dipangadika dia kubatijibua diudi wangata ndipangadika dia mushinga mukole mu nsombelu webe. Bu mudidi kadiyi dia bilele, udi ne bua kuelangana meji bikole bua tshididi diumvuija. Ntshinyi tshiudi ne bua kumanya bua batismo? Ntshinyi tshiudi ne bua kuenza kumpala kua kubatijibua ne paukadi mubatijibue? Netuandamune nkonko eyi mu tshiena-bualu tshialonda.