Nkonko ya babadi

Muambi 5:8 udi wakula anu bua bakokeshi ba pa buloba anyi, peshi udi wakula kabidi bua Yehowa?

Mvese eu utu ukoka ntema ya bantu, udi wamba ne: “Wewe mumone bakengesha mupele ne banyanga kulumbuluisha kuakane ne buakane mu tshitupa tshienu tshia buloba, kukemi bua bualu ebu to. Bualu mukokeshi munene au badi bamutangila kudi muntu udi munene kumupita yeye, ne kudi bakuabu badi pabu banene kubapita bobu.”​—Muam. 5:8.

Bilondeshile dimona dia bantu, mvese eu udi wakula bua bantu badi ne bukokeshi mu mbulamatadi. Kadi patudi tuela meji bimpe, udi uleja kabidi bulelela kampanda budi butangila Yehowa, budi mua kutukankamija ne kutukolesha ku muoyo.

Muambi 5:8 udi wakula bua mukokeshi udi ukengesha bapele ne kayi ukosa bilumbu biabu ne buakane to. Mukokeshi au udi ne bua kuvuluka ne: pamuapa kudi muntu udi ku mutu kuende anyi udi ne bukokeshi kumupita yeye udi umumona. Kudi kabidi mua kuikala bantu bakuabu badi ne muanzu mupite wabu bonso. Bia dibungama, bakokeshi ba mbulamatadi ya panu bonso badi mua kudia mishiku, ne bantu badibu bakokesha badi batata bua nkokeshilu wabu mubi.

Kadi nansha kakuyi mushindu wa kutekemena bualu bua nsongo, bidi bitukolesha ku muoyo patudi tumanya ne: Yehowa udi ‘utangila too ne bakokeshi banene’ ba mbulamatadi ya panu. Tudi mua kumudidila ne kumupuila bujitu buetu. (Mis. 55:22; Filip. 4:6, 7) Tudi bamanye ne: “mêsu a Yehowa adi akenzakana pa buloba bujima bua kuleja bukole buende kudi bantu badi ne muoyo mujima kudiye.”​—2 Kul. 16:9.

Nunku mêyi adi mu Muambi 5:8 adi atuvuluija bidi bakokeshi ba mbulamatadi ya panu benza; atuvuluija kabidi ne: kudi muntu udi ne bukokeshi mubapite bonso. Bualu bua mushinga menemene budi ne: mêyi aa adi mua kutuvuluija mudi Yehowa ku mutu kua bionso, muikale bushuwa Mukokeshi mutambe bunene. Udi ukokesha mpindieu ku butuangaji bua Muanende, Yezu Kristo udi Mukalenge wa Bukalenge bua Nzambi. Wa Bukole Buonso udi umona malu onso utu wenza malu ne buakane, ke mutu muanende pende wenza.