Mmuenenu wa bena nkristo pa bukokeshi
“Kakuena bukokeshi pa kumusha ebu bua kudi Nzambi.”—LOMO 13:1, NW.
1. Muaku “bukokeshi” mmusuikakaja ku tshinyi, ne bua tshinyi bidi mua kuambibua se: Yehowa udi Mukokeshi mutambe bunene?
BUKOKESHI mmuaku udi musuikakaja ku bufuki. Muaku “bukokeshi” udi ufuma ku muaku “mfuki” udi umvuija eu udi uvuija tshintu ku dikalaku, mpokolo, muenji wa tshintu. Mutambe Bunene wakavuija dikalaku dia bifukibua bionso, bia-muoyo ne bikena-muoyo, udi Yehowa Nzambi. Kakuyi mpata, yeye udi Mukokeshi udi ku mutu kua bionso. Bena nkristo balelela badi ne mmuenenu wa muomumue ne wa bifukibua bia mu diulu bidi bimanyisha ne: “Wewe, Yehowa Nzambi wetu, udi muakanyine bua kupeta butumbi, buneme, ne bukole, bualu wewe wakafuka bintu bionso, ne bua disua diebe biakafika ku dikalaku ne biakafukibua.”—Buakabuluibua 4:11, NW.
2. Bua tshinyi bidi mua kuambibua se: mu ngumvuilu kampanda, bamfumu ba kale bavua bitaba muvuabo kabayi ne bukenji bua ku tshifukilu bua kukokesha bantu nabu, ne Yezu wakambila Pontio Pilate tshinyi?
2 Bu muvua bamfumu ba kale bavule bakeba mua kujadika bulelela bua bukokeshi buabu pa kudibala muvuabo banzambi peshi baleji-mpala ba nzambi kampanda, ebi bidi bileja se: bavua bitaba mushindu mububika mudi muntu nansha umue kayi ne bukenji bua ku tshifukilu bua kukokesha bakuabu.a (Yelemiya 10:23) Mpokolo umuepele wa bukokeshi bulelela udi Yehowa Nzambi. Kristo wakambila Pontio Pilate, nguvena muena Roma mu Yudeyi ne: “Bu bukokeshi kabui bukuhebue kudi wa mu diulu, wewe kuakadi kuikala n’abu bua kungenzela bualu.”—Yone 19:11.
“Kakuena bukokeshi pa kumusha ebu bua kudi Nzambi”
3. Mupostolo Paulo wakamba tshinyi bua “bakokeshi badi ku mutu,” ne mêyi a Yezu ne Paulo adi ajudija nkonko kayi?
3 Mupostolo Paulo wakafundila bena nkristo bavua muinshi mua bukokeshi bua Ampire wa bena Roma ne: “Anyima wonso akokele bakokeshi badi ku mutu, bualu kakuena bukokeshi pa kumusha ebu bua kudi Nzambi; ne makokeshi adiku mmalondangane amue ne makuabu mu mianzu yawu ku dilekelela dia Nzambi.” (Lomo 13:1, NW) Yezu uvua usua kumvuija tshinyi pakambaye ne: bukokeshi bua Pilate buvua bumupesha “mu diulu”? Ne mmu ngumvuilu kayi muvua Paulo wangata makokeshi a tshididi a mu tshikondo tshiende ne: avua malondangane mu mianzu yawu ku dilekelela dia Nzambi? Bavua basua kuamba ne: ditekibua pa muanzu dia mfumu yonso muena tshididi wa mu bulongolodi ebu didi dienzeka ne dianyisha dia Yehowa yeye muine anyi?
4. Yezu ne Paulo bakabikila Satana ku dîna kayi, ne mmêyi kayi a didikokola pa tshiadi a Satana avua Yezu kayi muvile?
4 Mmunyi mudibi mua kuenzeka nunku, bualu Yezu wakabikila Satana ne: “mfumu wa bulongolodi ebu,” ne mupostolo Paulo kumupa dîna disunguluji dia “nzambi wa bulongolodi ebu bua malu”? (Yone 12:31; 16:11; 2 Kolinto 4:4, NW) Kabidi, pavua Satana uteta Yezu, wakamulaya bua kumupesha “bukokeshi” pa “makalenge wonso a pa buloba budi bantu base,” wamba patoke muvua bukokeshi ebu bumupesha mu bianza. Yezu wakatolola dipa diende, kadi kakavila muvua buine bukokeshi abu mu bianza bia Satana.—Luka 4:5-8, NW.
5. (a) Nngumvuilu kayi wa mêyi a Yezu ne Paulo adi atangila bukokeshi bua bantu utudi ne bua kuikala nende? (b) Mmu ngumvuilu kayi mudi makokeshi adi ku mutu “malondangane amue ne makuabu mu mianzu yawu ku dilekelela dia Nzambi”?
5 Yehowa wakafila kukokeshibua kua bulongolodi ebu kudi Satana pa kumulekela bua kuikalaye ne muoyo kunyima kua ditomboka diende ne kua dibueja Adama ne Eve mu diteta pa kubafikisha ku ditombokela bumfumu Buende bukena-mikalu. (Genese 3:1-6; fuanyikija ne Ekesode 9:15, 16.) Nunku, miaku ya Yezu ne ya Paulo idi ne bua kumvuija se: kunyima kua dimanshibua dia teokrasi, peshi nkokeshilu wa Nzambi, kudi bena dibaka babidi ba kumpala mu Edene, Yehowa wakalekelela bantu, bakavua baditapulule kudiye, bua kufuimbabo mishindu kampanda ya ditumika ne bukokeshi ivua mua kubambuluisha bua kusomba mu nsangilu wa bantu mudi bulongame buikale. Mu kupita kua bidimu, ne kipatshila ka kukumbaja dilongolola diende, Yehowa wakakebesha kukuluka kua amue mamfumu peshi mbulamatadi. (Danyele 2:19-21) Wakalekela imue itungunuka ne kukokesha kuayi. Bua bamfumu badi Yehowa mulekelele dikalaku diabu, bidi mua kuambibua se: “mmalondangane amue ne makuabu mu mianzu yawu ku dilekelela dia Nzambi.”
Bena nkristo ba kumpala ne bakokeshi bena Roma
6. Mmunyi muvua bena nkristo ba kumpala bangata bakokeshi bena Roma, ne mbua tshinyi?
6 Bena nkristo ba kumpala kabakadisanga ne tusumbu tua bena Yuda tuvua tuela bifufu ne tuluisha bena Roma bavua bakuate Izalele mu bianza biabu nansha. Bilondeshile madikolela a bakokeshi ba bena Roma bavua, ku nkoselu wabu wa bilumbu mushindamene pa mikenji, bakuba bulongame pa buloba ne pa mbuu, biibaka minkoloji mivule ivua ibueja mâyi [mu bimenga], njila ne bilámbá, ne benza malu misangu mivule bua diakalenga dia bena ditunga buonso, bena nkristo bavua babangata bu ‘ministre [peshi musadidi] wa Nzambi bua disanka diabo.’ (Lomo 13:3, 4, NW) Mikenji ne bulongame bivua bipetesha nsombelu uvua wambuluisha bena nkristo bua kumanyisha lumu luimpe miaba ya kule, anu muvua Yezu mutume dîyi. (Matayi 28:19, 20) Ne kuondo ka muoyo kajalame, bavua mua kufuta bitadi bijadika kudi bena Roma, nansha muvuabo batumika ne tshimue tshitupa tshia mfranga eyi bua kulubuluja bipatshila bivua Nzambi kayi wanyisha.—Lomo 13:5-7.
7, 8. (a) Dibala ne ntema yonso dia Lomo 13:1-7 didi disokolola tshinyi, ne mvese eyi idi ileja tshinyi bilondeshile tshiena-bualu tshidibo basulakaja? (b) Mmu nsombelu kayi muvua bakokeshi bena Roma kabayi benze malu bu “ministre wa Nzambi,” ne mmuenenu kayi uvuabo nende kudi bena nkristo ba kumpala mu nsombelu eyi?
7 Dibala ne ntema yonso dia mvese muanda-mutekete ya kumpala ya Lomo nshapita wa 13 didi disokolola ne: “bakokeshi badi ku mutu” ba tshididi bavua “ministre wa Nzambi” bua kuela ka-lumbandi kudi aba bavua benza malu mempe ne kunyoka aba bavua benza malu mabi. Dikonkonona tshiena-bualu tshisulakaja mu nshapita eu didi dileja ne: Nzambi ke udi ujadika tshidi tshimpe ne tshidi tshibi, apo ki mbakokeshi badi ku mutu nansha. Nunku, pavua amperere wa Roma peshi mukokeshi mukuabu yonso muena tshididi ulomba dienza dia malu avua Nzambi upiisha, peshi ukandika aa avua Nzambi ulomba bua kuenza, kavua utungunuka ne kutumika bu ministre wa Nzambi to. Yezu wakamba ne: “Pingajilayi Kezare bintu bia Kezare, kadi nupingajile Nzambi bintu bia Nzambi.” (Matayi 22:21, NW) Pavua mbulamatadi wa Roma ulomba bintu bia Nzambi, bu mudi ntendelelu peshi muoyo wa muntu, bena nkristo balelela bavua balonda dîyi-diludiki dia bapostolo: “Tudi ne bua kutumikila Nzambi bu mfumu pamutu pa bantu.”—Bienzedi 5:29, NW.
8 Bu muvua bena nkristo ba kumpala babenga bua kukumbaja ntendelelu wa amperere peshi wa mpingu, bua kulekela dibuela mu bisangilu biabu bia bena nkristo, ne bua kuimanyika bumanyishi bua lumu luimpe, ebi biakabatuadila makengeshibua. Misangu mivule bantu badi bela meji se: mupostolo Paulo wakashipibua ku dîyi-dituma dia amperere Nero. Bakuabu ba-amperere, nangananga Domitian, Marcus Aurelius, Septimius Severus, Decius, ne Diocletian, bakakengesha pabo bena nkristo. Pavua ba-amperere aba ne bakokeshi-bindondi babo bakengesha bena nkristo, kabavua batumika bushuwa bu “ministre wa Nzambi” to.
9. (a) Mmuanda kayi mulelela ukena kushintulula udi mumanyike pa bidi bitangila bakokeshi badi ku mutu ba tshididi, ne nyama wa tshididi udi upetela bukole ne bukokeshi kudi nnganyi? (b) Kabiyi pa kutontolola, ntshinyi tshidi mua kuambibua bua dikokela bakokeshi badi ku mutu dia bena nkristo?
9 Bionso ebi bidi biambuluisha bua kuleja se: nansha mudi makokeshi adi ku mutu a tshididi atumika mu imue mishindu bu “ndongoluelu wa Nzambi” bua kukuba bulongame mu nsangilu wa bantu, adi’anu tshitupa tshia bulongolodi bua malu budi Satana muikale nzambi. (1 Yone 5:19, NW) Adi tshimue tshia ku bitupa bidi bienza bulongolodi bua tshididi bua pa buloba bujima buleja mu tshimfuanyi bu “nyama wa luonji” mu Buakabuluibua 13:1, 2. Nyama eu udi upetela bukole ne bukokeshi biende kudi “dragon munene,” Satana Diabolo. (Buakabuluibua 12:9) Nunku, mbuimvuike bua se: dikokela dia bena nkristo kudi makokeshi aa didi ne mikalu yadi, kadi ki ndijima to.—Fuanyikija ne Danyele 3:16-18.
Dinemeka dikumbanyine dia bakokeshi
10, 11. (a) Mmunyi muakaleja Paulo se: tudi ne bua kuleja kanemu kudi bantu badi bapeshibue bukokeshi kampanda? (b) Mmunyi ne bua tshinyi masambila adi mua kuenjibua “pa bidi bitangila bakalenge ne aba buonso badi pa mianzu minene”?
10 Kadi, abi kabiena biumvuija se: bena nkristo badi ne bua kukuna ngikadilu wa dikamakama peshi wa difunafuna kudi bakokeshi ba tshididi badi ku mutu to. Bushuwa, bavule ba ku bakokeshi aba ki mbakumbanyine kanemu menemene to, nangananga pa kutangila nsombelu wa muntu pa nkayende peshi wa mu tshibungi. Pabi, ku tshilejilu tshiabu ne ku mibelu yabu, bapostolo bakaleja se: aba badi bapeshibue bukokeshi kampanda badi ne bua kupeshibua kanemu. Pavua Paulo ulumbulula kumpala kua mukalenge Hérode Agrippa II, uvua mu nsombelu wa tshibindi, wakamuleja kanemu kende kuonso.—Bienzedi 26:2, 3, 25.
11 Kabidi, Paulo wakajadika se: mbikumbanyine bua kuteela bamfumu ba mu bulongolodi ebu mu masambila etu, nangananga padibi bikengela kunyemena kudibo bua bangate mapangadika adi atangila muoyo wetu peshi midimu ya bena nkristo. Wakafunda ne: “Nunku ndi nsengelela, kumpala kua malu wonso, bua misengelelu, masambila, milombo ya diakuila ne diela tuasakidila bienjibue bua bantu ba mishindu yonso, bua bakalenge ne aba buonso badi pa mianzu minene; bua tutungunuke ne kuikala ne nsombelu wa ditalala ne wa bupole, kabidi ne ditshina dia Nzambi ne didifila dijima. Bualu ebu mbuimpe ne buanyishibue ku mêsu kua Musungidi wetu, Nzambi, udi musue bua bantu ba mishindu yonso bapandishibue ne bafike ku dipeta dimanya dilelela dia bulelela.” (1 Timote 2:1-4, NW) Ngikadilu wetu wa dileja kanemu kudi bakokeshi aba udi mua kubasaka ku ditupetesha budikadidi bukumbanyine bua kukumbaja mudimu wetu utudi tuteta mua kupandisha “bantu ba mishindu yonso.”
12, 13. (a) Mmubelu kayi mutshintshikila uvua Petelo mufile pa bidi bitangila bukokeshi? (b) Mmunyi mutudi mua kupuwisha “ngakuilu wa dipanga udi kudi bantu babule lungenyi” udi ukebela Bantemu ba Yehowa disuyakajibua?
12 Mupostolo Petelo wakafunda ne: “Bua Mukalenge, nukokele tshifukibua tshionso tshia [mubidi wa] musunyi: nansha mukalenge bualu udi ku mutu peshi ba-nguvena bualu mbatumibue kudiye bua kunyoka benji ba malu mabi, kadi bua kutumbisha benji ba malu mempe. Bushuwa, bidi disua dia Nzambi bua pa kuenza malu mempe nuenu nenupuwishe ngakuilu wa dipanga udi kudi bantu babule lungenyi. Nuikale bu bantu badikadile, nulame misangu yonso budikadidi buenu, ki mbu tshibuikilu bua kuenza malu mabi, kadi bu bapika ba Nzambi. Nunemeke bantu ba mishindu yonso, nunange dîku dijima dia bana betu, nutshine Nzambi, nunemeke mukalenge.” (1 Petelo 2:13-17, NW) Mmubelu kayipu mutshintshikila! Tudi tukokela Nzambi ne dikokela dijima bualu tudi bapika bende, ne tudi tukokela ne dikokela ditshintshikila bakokeshi bena tshididi batuma bua kunyoka benji ba malu mabi.
13 Bitu bimueneka pa tshibidilu se: bakokeshi bena mu bulongolodi ebu batu ne mmuenenu mibi pa Bantemu ba Yehowa. Misangu mivule mbua mamanyisha makonyangaja a kudi bena lukuna ba muoyo mubi ba tshisamba tshia Nzambi. Peshi bualu batu bapetela mamanyisha adi atutangila anu mu bikandakanda ne tudiomba bitu imue misangu ne kansungansunga mu dimuangalaja ngumu. Pamu’apa, tudi mua kukupuisha ngenyi eyi mibi ku ngikadilu wetu wa kanemu ne, pikalaku mushindu, kumvuija bakokeshi tshidi menemene mudimu ne mitabuja bia Bantemu ba Yehowa. Broshire wa Bantemu ba Yehowa ba tshikondo tshietu etshi udi ufila mumvuija mipidija bua baleji-mpala ba mbulamatadi bena bivule bia kuenza. Bua mamanyisha malabale a pa mutu, badi mua kupeshibua mukanda wa Les Témoins de Jéhovah: Prédicateurs du Royaume de Dieu, tshiamu tshilenga tshikumbanyine kulamibua mu tshilaminu tshia mikanda tshia musoko ne tshia ditunga bua bantu buonso.
Bukokeshi mu mêku a bena nkristo
14, 15. (a) Ntshinyi tshidi tshishimikidi tshia bukokeshi mu dîku dia bena nkristo? (b) Mmunyi mudi bakaji bena nkristo ne bua kuangata babayabo, ne mbua tshinyi?
14 Mbimueneke patoke se: bu mudi Nzambi mulombe bena nkristo bua kupeshabo bakokeshi ba mu bulongolodi ebu kanemu kadi kabakumbanyine, badi ne bua kunemeka kabidi ndongoluelu wa bukokeshi muakaja kudi Nzambi mu dîku dia bena nkristo. Mupostolo Paulo wakumvuija mu mêyi mapepele dîyi-diludiki pa buludiki budiku lelu munkatshi mua tshisamba tshia Yehowa. Wakafunda ne: “Ndi musue bua nuenu numanye ne: mfumu wa mulume yonso udi Kristo; ne mfumu wa mukaji udi mulume, ne mfumu wa Kristo udi Nzambi.” (1 Kolinto 11:3, NW) Edi ndîyi-diludiki dia teokrasi, peshi nkokeshilu wa Nzambi. Mmalu kayi adidio dilomba kutudi?
15 Kanemu bua teokrasi kadi katuadijila mu dîku. Mukaji muena nkristo udi kayi uleja kanemu kakumbanyine bua bukokeshi bua bayende—nansha yeye mudisange peshi kayi mudisange nende mu ditabuja dimue—kêna wenza malu bilondeshile teokrasi nansha. Paulo wakapesha bena nkristo mubelu eu: “Nukokelangane bamue ne bakuabu mu ditshina dia Kristo. Bakaji bakokele babayabo bu [badi bakokela] Mukalenge, bualu mulume udi mfumu wa mukajende anu mudi Kristo mfumu wa tshisumbu, yeye musungidi wa mubidi eu. Eyowa, anu mudi tshisumbu tshikokela Kristo, nunku bakaji bakokele pabo babayabo mu malu wonso.” (Efeso 5:21-24, NW) Anu mudi balume bena nkristo bakokela bumfumu bua Kristo, ke mudi bakaji bena nkristo ne bua kuitaba se: mbia meji bua kukokela bukokeshi budi Nzambi mupeshe babayabo. Ebi nebibapeteshe disankishibua diondoke mu mitshima ne, kupita apu, dibenesha dia Yehowa.
16, 17. (a) Mmunyi mudi bana bakela mu mêku a bena nkristo mua kudisunguluja ne bansonga bavule bena lelu, ne mbasakibue kudi kabingila kayi kadibo naku? (b) Nku tshinyi kuvua Yezu tshilejilu tshilenga bua bansonga ba lelu, ne mbakankamijibue bua kuenza tshinyi?
16 Bana badi benza malu bilondeshile teokrasi badi ne disanka dia kupesha baledi babo kanemu kadi kabakumbanyine. Bavua bamanyishe bua bansonga ba tshipungu etshi tshia matuku a ku nshikidilu ne: nebikale “bena bupidia kudi baledi.” (2 Timote 3:1, 2, NW) Kadi Dîyi dia Nzambi difundisha ku spiritu wende didi diambila bana bena nkristo ne: “Nuenu bana, nutumikile baledi benu mu malu wonso, bua bualu ebu budi butamba kulengelela mu Mukalenge.” (Kolosai 3:20, NW) Kanemu bua bukokeshi bua baledi kadi kalengelela Yehowa ne kavuija dibenesha diende.
17 Muanda eu mmulejibue patoke ku tshilejilu tshia Yezu. Muyuki wa Luka udi wamba ne: “Wakapueka nabu [baledi bende] ne kulua mu Nazarete, ne uvua utungunuka ne kubakokela. . . . Ne Yezu uvua ukola mu meji ne ku mubidi, ne wanyishibua kudi Nzambi ne kudi bantu.” (Luka 2:51, 52, NW) Tshikondo atshi Yezu uvua ne bidimu 12, ne muaku wa pa muanda wa tshiena-Greke uvuabo batumike nawu apa udi ushindika se: “uvua utungunuka ne kukokela” baledi bende. Nunku, kukokela kuende kakuakajika pakaluaye mupiankunde nansha. Nuenu bansonga betu, binuasua kulubuluka mu nyuma ne dianyishibua kudi Yehowa ne kudi bantu batshinyi ba Nzambi, nudi ne bua kuleja kanemu bua bukokeshi munda ne pambelu pa dîku dienu.
Bukokeshi mu tshisumbu
18. Nnganyi udi Mfumu wa tshisumbu tshia bena nkristo, ne mmufile ndambu wa bukokeshi buende kudi banganyi?
18 Pavuaye wakula bua dikengedibua dia bulongame mu tshisumbu tshia bena nkristo, Paulo wakafunda ne: “Nzambi udi Nzambi, ki ng’wa luntshimba, apo wa ditalala. . . . Malu wonso enjibue biakane ne mu bulongame [peshi “bilondeshile bulongame,” note kuinshi kua dibeji, Bible wa références mu anglais].” (1 Kolinto 14:33, 40, NW) Bua malu kuenzekawu mu bulongame, Kristo, Mfumu wa tshisumbu tshia bena nkristo, wakafila ndambu wa bukokeshi kudi balume ba lulamatu. Tudi tubala ne: “Wakafila bamue bu bapostolo, bakuabu bu baprofete, bakuabu bu bamuangalaji ba evanjeliyo, bakuabu bu balami ne balongeshi, bua dilulamija dia bansantu, bua mudimu wa busadidi . . . Kadi, pa kuamba bulelela, ne ku dinanga tukolayi mu malu wonso mu yeye udi mutu, Kristo.”—Efeso 4:11, 12, 15, NW.
19. (a) Nnganyi udi Kristo muteke ku mutu kua bintu biende bionso bia pa buloba, ne nnganyi udiye mupeshe bukokeshi bua pa buabu? (b) Mmunyi mudi bukokeshi kampanda bufidibua mu tshisumbu tshia bena nkristo, ne ebi bidi bitulomba tshinyi ku luetu luseke?
19 Mu tshikondo etshi tshia ku nshikidilu, Kristo mmuteke kasumbu ka bantu, “mupika wa lulamatu ne wa budimu” pa “bintu biende bionso,” peshi bipatshila bia Bukalenge bidi pa buloba. (Matayi 24:45-47, NW) Anu bu mu siekele wa kumpala, mupika eu mmuleja mpala kudi kasumbu kaludiki kenza ne bena nkristo bela manyi badi Kristo mupeshe bukokeshi bua kuangata mapangadika ne kuteka bakuabu batangidi. (Bienzedi 6:2, 3; 15:2) Ku luaku luseke, Kasumbu kaludiki kadi kafila ndambu wa bukokeshi kudi Komité ya filiyale, kudi batangidi ba distrike ne ba tshijengu, ne kudi bakulu ba mu tshionso tshia ku bisumbu bipite pa 73 000 bia Bantemu ba Yehowa pa buloba bujima. Bena nkristo aba buonso, balume bena kudifila, mbakumbanyine kupeshibua diambuluisha ne kanemu ketu.—1 Timote 5:17.
20. Ntshilejilu kayi tshidi tshileja se: Yehowa udi unyingalala bua aba badi bapanga kanemu bua bena nkristo nabu badi bapeshibue bukokeshi kampanda?
20 Pa bidi bitangila kanemu katudi ne bua kupesha balume badibo bambike bukokeshi kampanda mu tshisumbu tshia bena nkristo, tudi mua kuenza difuanyikija dia mushinga pankatshi padi ne pa dikokela ditudi ne bua kuleja kudi bakokeshi ba mu bulongolodi ebu. Padi muntu kampanda ushipa mukenji muela kudi bantu udi Nzambi wanyisha, dinyoka didiye upeta kudi “aba badi bakokesha” didi, pa kuamba, kulejibua patoke kua tshiji tshia Nzambi ku butuangaji bua bantu “kudi eu udi wenza bibi.” (Lomo 13:3, 4, NW) Pikala Yehowa ukuata tshiji padi muntu ushipa mukenji wa bantu ne upanga kanemu kadi kakumbanyine bakokeshi ba mu bulongolodi ebu, mmushindu kayipu udiye unyingalajibua bipitshidile padi muena nkristo muditshipe kudiye usambuka mêyi-maludiki a mu Bible ne uleja dipanga kanemu kudi bena nkristo nende badi bapeshibue bukokeshi kampanda!
21. Mmubelu kayi wa mu Mifundu utuikala ne disanka dia kulonda, ne ntshinyi tshituakonkonona mu tshiena-bualu tshidi tshilonda?
21 Pamutu pa kudivuijila tshiji tshia Nzambi pa mitu yetu bua dilonda nsombelu wa buntomboji peshi wa budishikaminyi, tudi ne bua kulonda mubelu wakapeshabo bena nkristo ba ku Filipoi kudi Paulo: “Pa nanku, banangibue banyi, anu munuvua nutumikila matuku wonso, kabiyi anu mu dikalaku dianyi, kadi ku budisuile menemene mpindieu mu dibenga kuikalaku dianyi, tungunukayi ne kuenza mudimu bua lupandu luenu ne ditshina ne dikaakala; bualu Nzambi ke udi, ku disua diende nkayende, utumika munda muenu bua nuenu buonso tshiapamue nuanyishe ne nuenze. Tutungunukayi ne kuenza malu wonso kabiyi kunungana peshi kukokangana ku mêyi, bua nuenu nuvue kanuyi pa kubandibua ne kanuyi ne tshilumbu, bana ba Nzambi kanuyi ne kalema nansha kamue munkatshi mua bena tshipungu tshinyanguke ne tshikonyangale, munudi nukenka bu bimunyi bia butoke mu bukua-bantu.” (Filipoi 2:12-15, NW) Bishilangane ne bena tshipungu etshi tshinyanguke ne tshikonyangale tshidi tshidibueje nkayatshi mu tshikondo tshia didiwula ne dishekelela dia bukokeshi, tshisamba tshia Yehowa tshidi tshikokela bakokeshi ku budisuile. Nunku, badi banowa mabenesha, anu mutuabimona mu tshiena-bualu tshidi tshilonda.
[Mêyi adi kuinshi]
a Tangila tshiena-bualu tshidi kumpala kua etshi.
Bia diambulula
◻ Nnganyi udi Mukokeshi mutambe bunene, ne bua tshinyi bukokeshi buende kabuena kutontolola?
◻ Mmu ngumvuilu kayi mudi makokeshi adi ku mutu “malondangane amue ne makuabu mu mianzu yawu ku dilekelela dia Nzambi”?
◻ Ndîba kayi didi bakokeshi badi ku mutu balekela kuikala “ministre wa Nzambi”?
◻ Ndongoluelu kayi wa bukokeshi udi mu mêku a bena nkristo?
◻ Mmunyi mudi bukokeshi kampanda bufidibua mu tshisumbu tshia bena nkristo?
[Bimfuanyi mu dibeji 18]
Yezu wakamba ne: “Pingajayi bintu bia Kezare kudi Kezare”