Tshivua Yezu muambe bua dîba dialua nshikidilu

TANGILA MALU ABIDI AVUA YEZU MUAMBE BUA NSHIKIDILU:

“Nanku nushale batabale, bualu kanuena bamanye dituku ne dîba.”​—MATAYI 25:13.

“Nuikale badimuke, nushale batabale, bualu kanuena bamanye dîba diakumbana tshikondo tshisungula.”​—MÂKO 13:33.

Nanku muntu nansha umue pa buloba apa ki mmumanye dîba menemene dikala ndongoluelu wa malu eu ne bua kutua ku tshibungubungu to. Kadi Nzambi ukadi mujadike “tshikondo tshisungula,” mmumue ne: “dituku ne dîba” dialua nshikidilu. (Matayi 24:36) Bidiku bileja ne: mbikole bua kumanya padi nshikidilu usemena pabuipi anyi? Tòo. Yezu uvua muambile bayidi bende bua kutabalelabu amue malu avua ne bua kuleja ne: nshikidilu ukadi musemene.

TSHIMANYINU

Malu au avua ne bua kuenza tshimanyinu tshia “nshikidilu wa ndongoluelu wa malu eu.” Yezu wakamba ne: “Tshisamba netshiluishe tshisamba tshikuabu, bukalenge nebuluishe bukalenge bukuabu, nekuikale biyole bia nzala, buloba nebukanke ku muaba ne ku muaba.” (Matayi 24:3, 7) Wakamba kabidi ne: nekuikale “bipupu bia masama.” (Luka 21:11) Malu avua Yezu mudianjile kuamba aa adiku enzeka lelu anyi?

Lelu bantu badi bakenga bua mvita, biyole bia nzala, dikanka dia buloba, ne mulongolongo wa masama. Tshilejilu mu 2004, dikanka dia buloba divua dienzeke mu Mbuu wa Inde diakasapalaja mâyi mu bantu, kushipawu bantu batue ku 225 000. Mu tshidimu tshijima ne bia mu njila, tshipupu tshia disama dia korona (COVID-19) ntshishipe bantu binunu nkama ne nkama pa buloba bujima. Yezu wakamba ne: malu a buena aa avua ne bua kuleja ne: nshikidilu wa ndongoluelu wa malu eu ukadi musemene.

“MATUKU A KU NSHIKIDILU”

Bible udi ubikila tshikondo tshidi tshidianjidila nshikidilu ne: “matuku a ku nshikidilu.” (2 Petelo 3:3, 4) 2 Timote 3:1-5 udi uleja ne: bikadilu bia bantu bivua ne bua kunyanguka mu matuku a ku nshikidilu. (Tangila kazubu ka ne: “Kumpala kua nshikidilu wa buloba ebu kulua.”) Udiku umona mudi bantu balue badinangi, bena lukuka, bena tshikisu ne kabayi banange bantu nabu anyi? Malu aa adi pawu aleja ne: nshikidilu ukadi pabuipi menemene.

Matuku a ku nshikidilu neanenge tshikondo bule kayi? Bible udi uleja ne: netshikale “tshikondo tshîpi.” Pashishe Nzambi neabutule bantu “badi banyangakaja buloba.”​—Buakabuluibua 11:15-18, dimanyisha dia kuinshi kua dibeji; 12:12.

MPARADIZU UKADI PABUIPI!

Nzambi ukadi musungule dituku ne dîba diabutulaye ndongoluelu mubi wa malu eu. (Matayi 24:36) Lumu luimpe lukuabu ludi ne: “Ki mmusue bua muntu nansha umue abutudibue” to. (2 Petelo 3:9) Udi utupesha mpunga wa tuetu kumanya disua diende ne kumutumikila. Bua tshinyi? Bualu mmusue bua tupanduke ne tushale ne muoyo palua buloba Mparadizu.

Nzambi mmulongolole bua mudimu wa diyisha wenzeke pa buloba bujima bua kuambuluisha bantu bua kubuela mu bulongolodi bupiabupia buikala ku bukokeshi bua Bukalenge buende. Yezu wakamba ne: nebayishe lumu luimpe lua Bukalenge bua Nzambi “pa buloba bujima budi bantu basombele.” (Matayi 24:14) Mu 2019, Bantemu ba Yehowa ba pa buloba bujima bavua bapitshishe mêba mapite pa miliyare ibidi mu diyisha bantu ne dibalongesha mukenji wa mu Bible udi ubapetesha ditekemena. Yezu wakamba ne: bavua ne bua kuyisha pa buloba bujima kumpala kua nshikidilu kulua.

Tshikondo tshia bukokeshi bua bana ba bantu tshikadi ku ndekelu. Kadi lumu luimpe ludi ne: udi mua kupanduka ne kubuela mu buloba bukudimuna Mparadizu budi Nzambi mulaye. Tshiena-bualu tshidi tshilonda netshileje tshiudi mua kuenza bua kubuelamu.