Longa ne meji a kumanya malu mapiamapia

Paudi ukeba kudilongela, mbimpe udiebeje ne: ‘Mbualu kayi bundi musue kumanya?’ Kadi wamanya, dijinga diebe dia kumanya bualu adi kadikupangishi bua kumanya bualu budi Yehowa musue ne: ulonge to. Ntshinyi tshidi mua kukuambuluisha bua kulonga ne meji a ne: Yehowa akulongeshe bualu kampanda?

Lomba Yehowa meji. Lomba Yehowa bua akuambuluishe ujingulule tshidiye musue ne: umanye mpindieu. (Yak. 1:5) Kuimanyinyi pa tshiukadi mumanye to.—Nsu. 3:​5, 6.

Lekela bukole bua Dîyi dia Nzambi bulombole malu ebe. Bible udi wamba ne: “Dîyi dia Nzambi didi ne muoyo.” (Eb. 4:12) Nunku Bible udi mua kutulongesha bualu bupiabupia dîba dionso ditudi tumubala ne kutuambuluisha mu mishindu ya bungi. Neatuambuluishe nanku anu tuetu ne dijinga dia kumanya tshidi Yehowa utulongesha.

Anyisha tshintu tshionso tshidi ku mêsa a Yehowa. Malongesha ende adi bu “Didia dia disanka dia biakudia bimpe menemene.” (Yesh. 25:6) Bala nansha biena-bualu biudi umona ne: kabiakukusankisha pawabilonga. Nzambi neakuambuluishe bua kulua muntu muimpe, ne neumone ne: kudilongela nekukusankishe bikole.