TSHIENA-BUALU TSHIA KULONGA 39
MUSAMBU WA 125 ‘Badi ne luse mba disanka!’
Kufila kudi kupetesha muntu disanka dia bungi
“Disanka dia kufila ndipite dia kuangata.” —BIEN. 20:35.
LUNGENYI LUNENE
Mudi kufila kutuambuluisha bua kuikala anu ne disanka dia bungi.
1-2. Bua tshinyi Yehowa mmutufuke ne mushindu wa kumvua disanka patudi tupesha bakuabu bintu?
DISANKA ditutu tumvua patudi tupesha bantu bintu ndipite ditutu tumvua padi bakuabu batupeshabi. Yehowa mmutufuke mushindu au. (Bien. 20:35) Abi bidi bimvuija ne: padi bantu batupesha bintu katuena mua kumvua disanka anyi? Tòo. Tuetu bonso tutu tumvua disanka patubu batupesha bintu. Kadi tutu tumvua disanka dia bungi patudi tupeshangana bintu. Bushuwa, tudi ne disanka bua mudi Yehowa mutufuke mushindu eu. Bua tshinyi?
2 Mushindu udi Yehowa mutufuke udi utuambuluisha tuetu bua tuikale ne disanka dia bungi. Disanka dietu nedivule tuetu tukeba mishindu mikuabu ya kupeshangana bintu. Yehowa mmutufuke mu mushindu muimpe wa dikema.—Mis. 139:14.
3. Bua tshinyi Bible udi ubikila Yehowa ne: “Nzambi wa disanka”?
3 Bible udi utujadikila ne: kufila kudi kutupetesha disanka; nunku kabiena bitukemesha bua mudiye ubikila Yehowa ne: “Nzambi wa disanka” to. (1 Tim. 1:11) Yeye ke mupeshanganyi munene wa bintu wa kumpala. Mupostolo Paulo wakamba ne: “Tudi ne muoyo, tudi tuenda, ne tudiku” bua bualu buende. (Bien. 17:28) Bulelela, “Dipa dionso dimpe ne dipa dionso dipuangane” didi difuma kudi Yehowa.—Yak. 1:17.
4. Ntshinyi tshiatuambuluisha bua kuikala ne disanka dia bungi?
4 Tuetu bonso tutu anu basue kulabula disanka ditu muntu upeta padiye upeshangana bintu. Bua bualu abu mbimpe tuikale ne muoyo wa kupa anu bu Yehowa. (Ef. 5:1) Mu tshiena-bualu etshi, netumone tshitudi mua kuenza tuetu tumona ne: bantu batudi tupesha bintu kabena ne dianyisha. Nebituambuluishe bua kuikala anu ne disanka dia bungi patudi tupeshangana bintu.
IDIKIJA YEHOWA
5. Mbintu kayi bitu Yehowa utupesha?
5 Mbintu kayi bitu Yehowa utupesha? Tuakule bua bimue bia kudibi. Yehowa utu utupesha bintu bia ku mubidi. Pamuapa katuena mua kuikala ne bintu bia mushinga mukole to, kadi Yehowa utu utupesha bitutu nabi dijinga. Tshilejilu, utu utupesha biakudia, bilamba ne kaba ka kutekela mutu. (Mis. 4:8; Mat. 6:31-33; 1 Tim. 6:6-8) Yehowa mmuenzejibue bua kutupeha bintu ebi anyi? Tòo! Kadi tshidi tshimusaka bua kutupeshabi ntshinyi?
6. Matayi 6:25, 26 udi utulongesha tshinyi?
6 Yehowa udi utupesha bitudi nabi dijinga bualu mmutunange. Tukonkononayi mêyi a Yezu adi mu Matayi 6:25, 26. (Bala.) Yezu wakatela bifukibua bu mudi nyunyi, wamba ne: “Kayitu ikuna mamiinu anyi inowa peshi ikunguija bintu mu mayeba” to. Kadi teleja tshivuaye mulue kuamba kabidi: “Tatu wenu wa mu diulu udi uyidisha.” Pashishe wakebeja ne: “Nuenu kanuena bayipite ku mushinga anyi?” Bualu ebu budi butulongesha ne: Yehowa udi wangata batendeledi bende ne mushinga wa bungi kupita nyama. Bu mudi Yehowa udisha nyama, bidi bitujadikila ne: neatukumbajile majinga etu. Dinanga didi disaka Yehowa bua kututabalela anu mutu tatu utabalela bana bende.—Mis. 145:16; Mat. 6:32.
7. Yehowa mmupeshanganyi wa bintu, mmunyi mutudi mua kumuidikija? (Tangila kabidi tshimfuanyi.)
7 Dinanga didi mua kutusaka petu bua kupeshangana bintu anu bu Yehowa. Tshilejilu, udi mua kuikala mumanye muena Kristo nebe udi ukengela biakudia anyi bilamba. Yehowa udi mua kukusaka bua kumupeshabi. Bantu ba Yehowa batu bapesha bakuabu bintu nangananga patu tshipupu tshienzeka. Tshilejilu, pavua tshipupu tshia korona (COVID-19) tshienzeke, bana betu bakapesha bantu biakudia, bilamba ne bintu bikuabu bivuabu bakengela. Ba bungi bakafila kabidi makuta bua mudimu wetu wa pa buloba bujima. Makuta au akambuluisha bana betu ba miaba yonso. Bana betu bavua bafile makuta au bavua batumikile mêyi adi mu Ebelu 13:16 a ne: “Kanupu muoyo bua kuenza malu mimpe ne kuabanyangana bintu binudi nabi ne bakuabu, bualu Nzambi udi usanka bua milambu ya nunku.”
Yonso wa kutudi udi mua kupeshangana pende bintu bua kuidikija Yehowa (Tangila tshikoso 7)
8. Mmushindu kayi udi bukole bua Yehowa butuambuluisha? (Filipoyi 2:13)
8 Yehowa utu utupesha bukole. Yehowa utu upesha batendeledi bende ba lulamatu bukole. (Bala Filipoyi 2:13.) Ukadiku mulombe Yehowa bukole bua kukandamena diteta anyi bua kunanukila mu lutatu kansanga anyi? Udi mua kumulomba kabidi bukole bua kuenza malu audi musue kuenza munda mua dituku. Padiye wandamuna disambila diebe adi, newitabe tshivua mupostolo Paulo muambe, tshia ne: “Bua malu onso ndi ne bukole ku diambuluisha dia yeye udi umpesha bukole.”—Filip. 4:13.
9. Bua kuleja mutudi tuidikija Yehowa, ntshinyi tshitudi ne bua kuenza ne bukole butudi nabu bua kuambuluisha bakuabu? (Tangila kabidi tshimfuanyi.)
9 Nansha mutudi bapange bupuangane, tudi mua kuambuluisha bakuabu ne bukole butudi nabu anu bu Yehowa. Tuetu bantu katuena mua kupatula bukole munda muetu bua kubupesha bakuabu to, kadi tudi mua kuenza nabu malu bua kubambuluisha. Tshilejilu, bua bana betu bakadi bakulakaje anyi badi basama, tudi mua kubayila mu tshisalu peshi kubakajila mu nzubu. Tuetu ne mushindu, tudi mua kudifila bua kuenza midimu ya disukula Nzubu wa Bukalenge ne dimulama bimpe. Tuetu tuenza malu aa, nebiambuluishe batendeledi bakuabu ba Yehowa.
Tudi mua kuambuluisha bakuabu ne bukole butudi nabu (Tangila tshikoso 9)
10. Mmunyi mutudi mua kukolesha bakuabu ne mêyi etu?
10 Mbimpe tuvuluke ne: mêyi etu adi ne bukole. Kudi muntu uudi umona ne: wewe mumuele kalumbandi ne muoyo mujima, nebimukoleshe anyi? Udi mumanye muntu udi dijinga ne busambi anyi? Yeye muikalaku, muleja ne: udi nende ku muoyo. Udi mua kuya kumumona, kumubikila ku telefone, anyi kumufundila mesaje. Kabiena bikengela anu ne: wikale ne bia bungi bia kumuambila to. Pamuapa udi anu dijinga ne mêyi makese tshianana audi mua kumuambila ne muoyo mujima adi mua kumuambuluisha bua kusanguluka ne kushala ne lulamatu.—Nsu. 12:25; Ef. 4:29.
11. Mmunyi mutu Yehowa upesha bantu meji ende?
11 Yehowa utu utupesha meji. Muyidi Yakobo wakafunda ne: “Nunku bikala umue wa kunudi mupangile meji, atungunuke ne kualomba kudi Nzambi, bualu yeye udi upesha bantu bonso ne tshianza tshilekelela, kayi utulangana bilema.” (Yak. 1:5; dim.) Mêyi aa adi aleja ne: Yehowa katu ubenga bua kupesha bantu meji ende to, utu ubapeshawu ne tshianza tshilekelela. Yakobo wakamba kabidi ne: padi Yehowa upesha muntu meji, kena ‘umutobolola’ anyi ‘umutula bilema’ to. Katu wenza bua tushale tumvua bibi bua mutudi bamulombe buludiki to. Mu bulelela, yeye muine mmusue bua tumulombawu.—Nsu. 2:1-6.
12. Mmushindu kayi utudi mua kuambuluisha bakuabu ne meji atudi nawu?
12 Mmunyi mutudi mua kuidikija Yehowa? Mbimpe tuambuluishe bakuabu ne meji atudi nawu. (Mis. 32:8) Tudi ne mpunga ya bungi ya kuambila bakuabu malu atudi balonge. Tshilejilu, tutu tulongesha bamanyishi ba lumu luimpe bapiabapia patudi tuyisha nabu. Bakulu batu bambuluisha basadidi ba mudimu ne bana betu ba balume bakadi babatijibue bua bamanye mua kuenza midimu idibu nayi. Bana betu batu bamanye kuenza midimu ya dibaka nzubu yetu ne ya diyilama batu balongesha bakuabu mua kuenza midimu ayi.
13. Mmunyi mutudi mua kuidikija mushindu utu Yehowa upeshangana meji patudi tulongesha bakuabu?
13 Yehowa utu upeshangana meji. Mbimpe bantu badi balongeshangana bamuidikije. Tudi bamone mudi Yehowa upeshangana meji ne tshianza tshilekelela. Tuetu petu tutu tusambulujila bantu batutu tulongesha dimanya diudi nadi ne muoyo mujima. Ki mbimpe udikande bua kubasambulujiladi dionso, wela meji ne: badi mua kulua kukudia muaba to. Kuambi ne: ‘Badimanyine nkayabu, kakuvua muntu uvua mundongeshe meme to!’ Bantu ba Yehowa kabena ne bua kuikala ne meji a nanku to. Kadi pa kumbusha dimanya ditudi tubasambulujila ne disanka dionso, tudi ‘tudifila kabidi ne tuetu bine’ bua bualu buabu. (1 Tes. 2:8) Tudi batekemene ne: ‘nebalue kuikala pabu bakumbane bimpe bua kulongesha bakuabu.’ (2 Tim. 2:1, 2) Dîba adi tuetu bonso netuikale ne disanka ne meji.
PATUDI TUMONA NE: MUNTU KENA NE DIANYISHA
14. Ntshinyi tshitu bantu ba bungi benza patubu babenzela bualu buimpe?
14 Patutu tuenzela bantu bualu buimpe, nangananga bena Kristo netu, misangu ya bungi batu batuela tusakidila. Batu batuela nshinga anyi batufundila mesaje bua kutuela tuasakidila anyi badi mua kutuleja dianyisha mu mushindu mukuabu. (Kolos. 3:15) Bitu bitusankisha kabidi bikole.
15. Ntshinyi tshitudi katuyi mua kupua muoyo padi muntu kayi utuleja dianyisha?
15 Kadi bamue bantu kabatu belangana tuasakidila imue misangu to. Bidi mua kuenzeka ne: tufila dîba dietu, makanda etu anyi bintu bietu bua kuambuluisha muntu, kadi pashishe kayi utuela tuasakidila to. Dîba dia buena adi, ntshinyi tshitudi mua kuenza bua katujimiji disanka dietu anyi katufiiki munda? Vuluka mêyi a mvese wetu wa nshindamenu wa Bienzedi 20:35. Katuena tupeta disanka anu padi bakuabu batuela tuasakidila to, tuetu tudi anu mua kuikala nadi bua mutudi babapeshe tshintu. Ntshinyi tshidi mua kutuambuluisha? Tumonayi amue malu.
16. Ntshinyi tshidi mua kutuambuluisha bua kutungunuka ne kupeshangana bintu ne disanka?
16 Wewe idikija anu Yehowa. Yehowa utu upesha bantu bintu bimpe nansha bobu ne dianyisha anyi kabayi nadi. (Mat. 5:43-48) Yehowa mmulaye ne: tuetu tupeshangana petu bintu ‘katuyi tutekemena bua batupingajile tshintu,’ ‘difutu dietu nedikale dinene.’ (Luka 6:35) “Tshintu” etshi tshidi mua kuikala kabidi dileja dianyisha. Nansha bantu batuleje dianyisha anyi kabayi batulejadi, Yehowa yeye neikale anu utufuta bua malu mimpe atudi tubenzela ne bua mutudi ‘tufila ne disanka.’—Nsu. 19:17; 2 Kol. 9:7.
17. Mbualu kayi bua mushinga budi butusaka bua kutungunuka ne kupesha bakuabu bintu? (Luka 14:12-14)
17 Bualu bukuabu budi butusaka bua kutungunuka ne kupesha bakuabu bintu budi mu Luka 14:12-14. (Bala.) Tuetu babikile bantu bua kudia nabu, bantu abu pabu ne mushindu wa kutuenzela malu makuabu a muomumue, ki mbibi to. Kadi netuenze tshinyi tuetu bajingulule ne: tutu tupesha bantu bintu ne lungenyi lua ne: nebalue kutupesha petu? Mbimpe tuenze tshivua Yezu muambe. Tuetu tudia ne bantu badi kabayi ne tshintu tshia kutupesha, netuikale ne disanka bualu tudi tuidikija Yehowa. Nebituambuluishe kabidi bua kushala ne disanka nansha padi bantu kabayi batuleja dianyisha bua bitudi tubapesha.
18. Ntshinyi tshitudi katuyi ne bua kuenza? Bua tshinyi?
18 Kuambi ne: bakuabu kabena ne dianyisha to. (1 Kol. 13:7) Muntu yeye kayi mutuele tuasakidila, tudi mua tudiebeja ne: ‘Kena ne dianyisha anyi? Mmupue muoyo bua kungela tuasakidila anyi?’ Pamuapa kudi malu adi menze bua apange kukuela tuasakidila muuvua muele meji. Bamue badi mua kuikala ne dianyisha dia bungi, kadi bibakolela bua kutulejadi. Badi mua kuikala bumvua bundu padibu babapesha bintu, nangananga biobi ne: bobu ke bavua bambuluisha bakuabu kumpala. Kadi tuetu banange bena Kristo netu, katuakuamba mudibu kabayi ne dianyisha to; netutungunuke anu kubapesha bintu ne disanka.—Ef. 4:2.
19-20. Bua tshinyi mbimpe tushale ne lutulu patudi tupesha bakuabu bintu? (Tangila kabidi tshimfuanyi.)
19 Ikala ne lutulu. Mukalenge Solomo wakafunda bua dipeshangana bintu ne: “Kupa diampa diebe pa mâyi, bualu neudipete kabidi panyima pa matuku a bungi.” (Muam. 11:1) Mêyi aa adi aleja ne: bamue bantu badi mua kulua kutuela tuasakidila “panyima pa matuku a bungi.” Tumonayi tshilejilu tshidi tshiumvuija bualu ebu.
20 Mukaji wa mutangidi wa tshijengu mukuabu uvua mufundile muanetu wa bakaji kampanda mukanda kukadi bidimu bia bungi. Utshivua uluilaku Ntemu. Uvua mumulombe bua ashale anu ne lulamatu. Bidimu bu 8 pashishe, muanetu au wakamufundila pende mukanda, umuambila ne: “Bidimu bionso bishale ebi uvua mungambuluishe bikole; ndi ngela meji ne: kuena nansha uvuluka to. Uvua mumfundile malu mimpe be! Tshiakupua mvese uuvua mumfundile muoyo to.”a Yeye mumane kumumvuija ntatu ivuaye mutuilangane nayi, wakamuambila ne: “kuvua misangu imvua nkeba kuimanyika bionso, kulekela ne kuenzela Yehowa mudimu. Kadi pamvua mvuluka mvese uuvua mumfundile au, biakangambuluisha bua kushala anu mu bulelela. Kakuvua tshintu tshivua tshingambuluishe mu bidimu 8 abi bu mvese au to.” Difuanyikijila disanka divua mukaji wa mutangidi wa tshijengu mua kuikala mumvue pavuaye mubale mukanda au “panyima pa matuku a bungi!” Bantu badi mua kulua kutuela petu tuasakidila panyima pa matuku a bungi bua bualu butuvua babenzele.
Bantu badi mua kulua kutuela tuasakidila panyima pa matuku a bungi bua tshintu tshituvua babapeshe. (Tangila tshikoso 20)b
21. Bua tshinyi udi mudisuike bua kupeshangana bintu anu bu Yehowa?
21 Anu mutukadi bamone, Yehowa mmutufuke mu mushindu wa pa buawu. Patubu batupesha bintu, tutu tumvua disanka, kadi patutu tubipeshangana, tutu tumvua disanka dia bungi. Tutu tumvua bimpe patutu tuambuluisha bena Kristo netu ne patubu batuela tuasakidila. Nansha bantu kabayi batuele tusakidila, tusanke bua mutudi tuetu benze bualu buimpe. Ikala anu muvuluke ne: wewe mufile tshintu kayi tshionso, “Yehowa udi ne mushindu wa kukupesha bia bungi.” (2 Kul. 25:9) Katuena mua kufila bapite Yehowa to! Padi Yehowa utufuta bua mutudi tupeshangana bintu, bidi bitusankisha bikole. Nunku tudisuikayi bua kutungunuka ne kuidikija Tatu wetu wa mu diulu utu upeshangana bintu ne tshianza tshilekelela.
MUSAMBU WA 17 “Ndi musue”
b DIUMVUIJA DIA BIMFUANYI: Bimfuanyi ebi bidi bileja muvua mukaji wa mutangidi wa tshijengu mufundile muanetu wa bakaji kampanda mukanda, umukankamija. Bidimu bia bungi pashishe, muanetu wa bakaji au kumufundilaye pende umuela tuasakidila.