Ela meji bu Yehowa ne Yezu

1-2. Mmushindu kayi utudi ne bua kunanga Yehowa? Mmushindu kayi uvua Yezu muleje ne: uvua munange Yehowa ne meji ende onso?

YEZU wakamba ne: mukenji uvua ne mushinga wa bungi mu mikenji ya Mose ngua ne: “Udi ne bua kunanga Yehowa Nzambi webe ne muoyo webe wonso, ne anyima webe yonso, ne bukole buebe buonso, ne lungenyi luebe luonso.” (Luka 10:27) Nunku tudi ne bua kudifila kudi Yehowa ne muoyo mujima ne bionso bitudi nabi. Malu atudi tujinga ne mutudi tudiumvua bidi ne bua kuleja mutudi bamunange. Tudi kabidi ne bua kumuenzela mudimu ne bukole buetu buonso bua kuleja mutudi bamunange. Nansha mushindu utudi tuela meji udi pawu ne bua kuleja ne: tudi bamunange. Bulelela budi ne: katuena mua kumanya meji onso Yehowa to. Kadi tudi mua kuumvua bimpe tuetu tulonga “meji a Kristo,” bualu Yezu mmumanye bimpe menemene mutu Tatu wende wela meji ne utu umuidikija mu mushindu mupuangane.​—1 Kol. 2:16.

² Yezu uvua munange Yehowa ne meji ende onso. Uvua mumanye tshivua Nzambi musue bua enze ne uvua mudisuike bua kutshienza, nansha muvuaye mumanye ne: uvua ne bua kukenga. Yezu kakalekela tshintu nansha tshimue tshimubueja mu ditanaji to, bualu uvua mutume meji ende onso anu ku dienza tshivua Tatu wende musue.

3. Mbualu kayi buvua Petelo mulongele kudi Yezu? Ntshinyi tshivuaye mulombe bena Kristo nende bua kuenza? (1 Petelo 4:1)

³ Petelo ne bapostolo nende bakuabu bavua ne diakalenga dia pa buadi dia kusomba ne Yezu ne kumanya mutuye wela meji. Pakafunda Petelo mukanda wende wa kumpala ku bukole bua nyuma muimpe, wakakankamija bena Kristo bua kudipaya ne lungenyi lua muomumue ne luvua nalu Kristo. (Bala 1 Petelo 4:1.) Muaku wa ne: “nudipaye” uvua Petelo mufunde uvua ne lungenyi lua mutu basalayi bambula bia mvita, bashale bindile bua kuluangana. Bena Kristo bobu balonge mua kuela meji anu bu Yezu, nebapete tshidibu natshi dijinga bua kutantamena dijinga dia kuenza malu mabi ne nebakandamene malu a mu bulongolodi bubi bua Satana ebu.​—2 Kol. 10:3-5; Ef. 6:12.

4. Mmunyi mudi tshiena-bualu etshi mua kutuambuluisha bua kutumikila mubelu wa Petelo?

⁴ Netuakule bua mushindu utu Yezu wela meji ne mutudi mua kumuidikija. Tshilejilu tshiende netshituambuluishe bua kumanya (1) mutudi mua kuidikija mutu Yehowa wela meji, bituambuluisha tuetu bonso bua kuela meji mu mushindu wa muomumue, (2) mua kuikala ne budipuekeshi, ne (3) mutudi mua kuikala ne meji majalame, tusambila Yehowa bualu tudi bamueyemene.

ELA MEJI BU YEHOWA

5. Mmunyi muvua Petelo mupange mua kuela meji bu Yehowa musangu kampanda?

⁵ Tuakulayi bua musangu kampanda uvua Petelo mupange mua kuela meji bu Yehowa. Yezu uvua muambile bapostolo bende ne: uvua ne bua kuya ku Yelushalema bua kufidibua mu bianza bia bamfumu ba bitendelelu, kukengishibua, ne kushipibua. (Mat. 16:21) Bivua bikole bua Petelo kuitaba ne: Yehowa uvua mua kuanyisha bua bashipe Yezu uvua Masiya mulaya, muntu uvua ne bua kusungila Isalele. (Mat. 16:16) Ke bualu kayi Petelo wakakokela Yezu ku luseke, kumuambilaye ne: “Mukalenge, diumvuilaku luse; bualu ebu kabuakukufikila nansha kakese.” (Mat. 16:22) Yezu ne Petelo kabakapetangana to, bualu meji avua nawu Petelo avua mashilangane ne a Yehowa.

6. Mmunyi muvua Yezu muleje ne: uvua wela meji anu bu Yehowa?

⁶ Yezu uvua wela meji anu bu Tatu wende menemene. Yezu wakambila Petelo ne: “Pita panyima panyi, Satana! Wewe udi tshilenduishi kundi, bualu meji audi wela ki mmeji a Nzambi to, kadi nga bantu.” (Mat. 16:23) Yezu uvua mumanye ne: Yehowa uvua musue bua akenge ne afue. Ke bualu kayi nansha muvua Petelo umueneka muikale ne meji mimpe, Yezu wakabenga mubelu wende. Biakalongesha Petelo ne: mbimpe ikale wela meji mudi Yehowa uela. Ndilongesha dia mushinga kutudi petu.

7. Mmunyi muakalua Petelo kuleja ne: uvua musue bua ikale wela meji anu bu Yehowa? (Tangila tshimfuanyi.)

⁷ Petelo wakalua kuleja ne: uvua musue bua ikale wela meji anu bu Yehowa. Tshikondo tshia bantu ba bisamba bia bende kuluabu batendeledi ba Nzambi tshiakakumbana. Nzambi wakatuma Petelo bua kuya kuyisha Kônelio. Kônelio uvua muntu wa mu bantu ba kumpala ba bisamba bia bende bakalua bena Kristo. Bena Yuda bavua bepuka bantu ba bisamba bia bende. Ke bualu kayi biakalomba Petelo bua kushintulula ngelelu wende wa meji bua kubayisha. Pakajingululaye muvua Nzambi ubamona, wakashintulula meji ende. Nunku pakamutumabu ‘kakabenga’ to. (Bien. 10:28, 29) Wakayisha Kônelio ne ba mu nzubu muende, bobu kubatijibua.​—Bien. 10:21-23, 34, 35, 44-48.

8. Mmunyi mutudi mua kuleja ne: tudi basue kuela meji anu bu Yehowa? (1 Petelo 3:8 ne dimanyisha dia kuinshi kua dibeji.)

⁸ Bidimu bia bungi pashishe, Petelo wakakankamija bena Kristo nende bua ‘bumvuangane mu diela dia meji.’ (Bala 1 Petelo 3:8 ne dimanyisha dia kuinshi kua dibeji.) Tuetu bantu ba Yehowa mbimpe tuikale ne ngelelu wa meji wa Yehowa udi mu Dîyi diende, dîba adi nebileje mutudi tumvuangana mu diela dia meji. Tshilejilu, Yezu wakalomba bayidi bende bua kuteka malu a Bukalenge pa muaba wa kumpala. (Mat. 6:33) Nunku muena mu tshisumbu tshietu yeye muangate mudimu kampanda wa ku dîba ne ku dîba, pamutu pa kumubela bua adiumvuile luse, mbimpe tumukankamije bua akumbaje tshipatshila tshiende ne tumuambuluishe.

IKALA NE DIDIPUEKESHA

9-10. Mmunyi muvua Yezu muleje didipuekesha mu mushindu wa dikema?

⁹ Butuku kumpala kua kushipabu Yezu, wakalongesha Petelo ne bapostolo bakuabu bualu bua mushinga mukole bua kuikala ne didipuekesha. Yezu ukavua mutume Petelo ne Yone bua baye kulongolola bivua bikengela bua alue kudia ne bapostolo bende bua musangu wa ndekelu kumpala kua kufuaye. Mu bia kulongolola abi muvua dikeba dilongo dia kuela mâyi a kowesha bantu ku makasa kumpala kua bobu kudia ne bilamba bia kubakupula nabi. Kadi nnganyi uvua mua kudipuekesha bua kuenza mudimu au?

¹⁰ Yezu wakadipuekesha mu mushindu wa dikema, kuenzaye mudimu au kayi welakana. Biakakemesha bapostolo bende bikole bualu wakenza mudimu uvua bena mudimu benza. Yezu wakumbusha bilamba biende bia pa mutu, kudijingilaye tshilamba tshia kukupula natshi mâyi mu tshimonu, kuelaye mâyi mu dilongo, pashishe kutuadijaye kubowesha mâyi ku makasa. (Yone 13:4, 5) Bivua ne bua kuikala bimuangate dîba bua kuowesha bapostolo bonso 12 mâyi ku makasa. Yudasa uvua ne bua kumutungila uvua munkatshi muabu amu. Kadi Yezu wakadipuekesha, kuboweshaye bonso mâyi ku makasa. Pashishe wakabumvuija ne lutulu luonso ne: “Nudi bumvue tshindi munuenzele anyi? Nudi numbikila ne: ‘Mulongeshi’ ne ‘Mukalenge,’ nudi nuambilamu, bualu ke tshindi. Nunku bingikala meme, Mukalenge ne Mulongeshi, munoweshe mâyi ku makasa, nuenu penu nudi ne bua kuoweshangana mâyi ku makasa.”​—Yone 13:12-14.

11. Mmunyi muvua Petelo muleje ne: uvua mukuate dilongesha dia kuikala ne didipuekesha? (1 Petelo 5:5) (Tangila kabidi tshimfuanyi.)

¹¹ Didipuekesha dia Yezu diakalongesha Petelo. Yezu mumane kuya mu diulu, Petelo wakenzela muntu kampanda uvua muledibue mulema tshishima, yeye kuenda. (Bien. 1:8, 9; 3:2, 6-8) Pakamona bantu ba bungi tshishima atshi, bakalua kunguila Petelo. (Bien. 3:11) Nansha muvuaye mukolele muaba uvua bantu basue butumbi, kakakoka ntema yabu kudiye to; wakadipuekesha, kujingaye bua bantu batumbishe anu Yehowa ne Yezu pavuaye mubambile ne: “Mu dîna diende, ne bua ditabuja ditudi nadi mu dîna diende, muntu unudi numona ne bamanye eu mmukoleshibue.” (Bien. 3:12-16) Pavua Petelo mufundile bena Kristo mukanda, ubalomba bua kuikala ne didipuekesha, uvua mutelamu muaku udi ne lungenyi lua kuvuala didipuekesha anu bu mutu muntu uvuala tshilamba, bituvuluija dîba divua Yezu mudisuike tshilamba mu tshimono ne moweshe bapostolo bende mâyi ku makasa.​—Bala 1 Petelo 5:5.

12. Mmunyi mutudi mua kuikala ne didipuekesha anu bu Petelo?

¹² Tudi petu mua kuikala ne didipuekesha anu bu Petelo. Tumanye ne: ki nganu ku mêyi mimpe atudi tuamba kudi bantu mua kumona ne: tudi ne didipuekesha dilelela to. Muaku udi Petelo mutele bua didipuekesha udi utangila meji adi munda muetu, tuambe ne: “bupuekele bua mu lungenyi.” Tudi tuenzela bakuabu malu mimpe bualu tudi banange Yehowa ne bantu, ki mbualu tudi tukeba ne: batuanyishi to. Tudi tuleja ne: tudi ne didipuekesha dilelela tuetu tuenzela Yehowa ne bena Kristo netu mudimu ne disanka nansha bantu bakuabu kabayi bamona mudimu utudi tuenza au.​—Mat. 6:1-4.

“NUIKALE NE MEJI MAJALAME”

13. Kuikala ne “meji majalame” kudi kumvuija tshinyi?

¹³ Kuikala ne “meji majalame” kudi kumvuija tshinyi? (1 Pet. 4:7) Muena Kristo udi ne meji majalame udi wenza muende muonso bua kuangata mapangadika mimpe adi aleja mudiye wela meji anu bu Yehowa. Buende yeye, malanda ende Yehowa ke adi ne mushinga wa bungi menemene mu malu ende onso. Kena udimona mupite bakuabu to, mmutuishibue ne: ki mmumanye malu onso to. Udi usambila Yehowa pa tshibidilu bua kuleja mudiye umueyemena.a

14. Mmunyi muvua Petelo mupange mua kueyemena Yehowa musangu kampanda?

¹⁴ Butuku bua muladilu wa lufu lua Yezu, wakadimuija bayidi bende ne: “Buonso buenu nenulenduke bua bualu buanyi butuku ebu.” Petelo wakandamuna ne dishindika dionso ne: “Nansha bakuabu bonso balenduke bua bualu buebe, meme tshiakulenduka nansha kakese!” Yezu wakabela bamue bayidi bende anu butuku abu, ubambila ne: “Nushale batabale, nutungunuke ne kusambila.” (Mat. 26:31, 33, 41) Bu Petelo mutumikile mubelu uvuabu bamupeshe au, uvua mua kuikala mupete dikima dia kuitaba ne: uvua muyidi wa Yezu. Kadi wakavila Mfumuende, pashishe kuluabi kumutonda bikole.​—Mat. 26:69-75.

15. Mmunyi muvua Yezu mulame meji majalame butuku bua muladilu wa lufu luende?

¹⁵ Yezu wakeyemena Yehowa ne muoyo mujima. Nansha muvuaye mupuangane, wakasambila misangu ne misangu butuku bua muladilu wa lufu luende. Disambila diakamupesha dikima dia kuenza tshivua Yehowa musue. (Mat. 26:39, 42, 44; Yone 18:4, 5) Petelo uvua ne bua kuikala mushale muvuluke muvua Yezu musambile misangu ne misangu butuku bua muladilu wa lufu luende.

16. Mmunyi muvua Petelo muleje ne: uvua mupete ne meji majalame? (1 Petelo 4:7)

¹⁶ Panyima pa matuku, Petelo ukavua usambila Yehowa bikole bua kuleja muvuaye umueyemena. Pakavuabu babishe Yezu ku lufu, wakajadikila Petelo ne bapostolo bakuabu ne: bavua ne bua kupeta nyuma muimpe uvua mua kubambuluisha bua kukumbaja mudimu wabu wa diyisha bimpe menemene. Kadi Yezu wakabalomba bua bashale bindile mu Yelushalema amu too ne pavuaye ubapeshaye. (Luka 24:49; Bien. 1:4, 5) Ntshinyi tshivua Petelo wenza tshikondo tshivuabu bindile atshi? Yeye ne bena Kristo nende bakuabu bavua “batungunuka ne kusambila.” (Bien. 1:13, 14) Wakalua kufundila bena Kristo nende abu mukanda wende wa kumpala, ubakankamija bua bikale ne meji majalame ne bua bikale basambila Yehowa bua kuleja muvuabu bamueyemena. (Bala 1 Petelo 4:7.) Petelo wakalonga mua kueyemena Yehowa, kuluaye dikunji dia tshisumbu.​—Gal. 2:9.

17. Nansha tuetu bamanye mua kuenza malu kampanda bipepele, ntshinyi tshitudi ne bua kutungunuka ne kuenza? (Tangila kabidi tshimfuanyi.)

¹⁷ Bua kuikala ne meji majalame, mbimpe tuikale ne tshibidilu tshia kusambila Yehowa. Nunku, nansha tuetu bamanye mua kuenza malu kampanda bipepele, mbimpe tutungunuke ne kumulomba diambuluisha. Ke bualu kayi patudi tukeba kuangata mapangadika manene, mbimpe tulombe Yehowa buludiki, batuishibue ne: mmumanye tshidi tshimpe bua bualu buetu.

18. Ntshinyi tshitudi mua kuenza bua kutamba kuela meji anu bu Yehowa?

¹⁸ Tudi ne dianyisha dia bungi kudi Yehowa bua mudiye mutufuke ne mushindu wa kuidikija ngikadilu yende. (Gen. 1:26) Bushuwa, katuena mua kuidikija Yehowa ne mu katoba to. (Yesh. 55:9) Kadi anu bu Petelo, tudi petu mua kulua bantu badi batamba kuela meji anu bu Yehowa. Bua bualu abu, tutungunukayi ne kuela meji bu Nzambi, tuikalayi ne didipuekesha, ne meji majalame.