“Mvita nya Yehowa”

Lua ku ndekelu kua bidimu bia 1990, mbulamatadi wa mu France wakamba ne: Betele wetu wa mu France uvua ne bua kufuta bitadi ne makuta a mu mapa a ku budisuile avuaye mupete kubangila ku 1993 too ne ku 1996. Tuakaya ne tshilumbu atshi ku tubadi tua mu France, kadi nansha kumona bua nsongo. Patuakaya kabidi ne tshilumbu atshi ku kabadi, mbulamatadi wakabenga kushintulula dipangadika diende, kudiangatshilaye makuta ndola miliyo 6 300 000 mu konte wa Betele wetu ku banke. Tuakadiambila ne: bua apa anu tuetu baye ku Kabadi ka ku Mputu ka manême a bantu. Kadi kumpala kua kabadi kutubikila bua kulumbulula, kakatulomba bua tuanji kutuilangana ne bandumbulula ba mbulamatadi wa mu France kumpala kua muleji mpala wa Kabadi aku bua ne: tumone ni tuvua mua kumvuangana kumpala kua kuya kulumbulula.

Tuakadianjila kumona bu ne: muleji mpala au neatuenzeje bua kufuta mbulamatadi wa mu France ndambu wa makuta. Kadi tuakajingulula ne: kufila ndola nansha umue kuvua kushipa mêyi manene a mu Bible. Makuta au mmapa adi bana betu bafile bua kutua malu a Bukalenge mpanda, ki nga mbulamatadi to. (Mat. 22:21) Kadi tuakaya anu kutuilangana nabu bua kuleja mutuvua tunemeka bena ku kabadi aku.

Bua kulumbulula, tuakabuela mu umue wa ku nzubu ya kabadi aku ivuabu benzela bisangilu. Muvua muimpe mutambe. Diakamue, muleji mpala au wakamba ne: Bantemu ba Yehowa badi ne bimue bitadi bidi mbulamatadi wa mu France muambe ne: bafute. Tuakamuebeja diakamue ne: “Udi mumanye ne: mbulamatadi au ukadi mudiangatshile makuta ndola miliyo 6 300 000 ku banke mu konte wa Betele wetu anyi?”

Pakumvuaye nanku, biakamutonda. Pavua bandumbulula ba mbulamatadi au bamujadikile ne: ke tshivua mbulamatadi muenze, wakabakudimukila, yeye kubakanyina, kuimanyikaye diakamue diyukidilangana diende nabu. Ngakajingulula ne: Yehowa uvua mushintulule malu mu mushindu utuvua katuyi batekemene bua tumone mua kubinga. Tuakumbuka muaba au ne disanka dia bungi kadi tshivua tshienzeke atshi tshivua tshitupitshile.

Mu dia 30/6/2011, kabadi ka ku Mputu aku kakatua ku tshietu. Ke bualu kayi kakambila mbulamatadi bua kutupingajila makuta au, usakidila ne a pa mutu! Dipangadika adi ndikube ntendelelu mulelela mu France too ne lelu eu. Lukonko lutuvua bele muleji mpala au luvua anu bu dibue diakashipa Goleyata. Luakashintulula malu bua tshilumbu atshi, palu lutuluile anu nanku. Bua tshinyi tuvua bafike ku ditshimuna? Bualu anu muvua Davidi muambile Goleyata, “Mvita nya Yehowa.”​—1 Sam. 17:45-47.

Eu ki mmusangu umue patupu utuvua batshimune ku tubadi to. Nansha muvua mbulamatadi ya bukole bua bungi ne bitendelelu bituluisha, tukadi batshimune bilumbu 1 225 ku tubadi tunene tua mu matunga 70 ne tukuabu tua pa buloba bujima. Ditshimuna adi ndikube manême etu, bu mudi manême a kuyisha bantu, a kubenga kuenza bibilu bia malu a buena ditunga, a dibenga mashi, ne bua tshitendelelu tshietu tshikale tshimanyike ku mikanda ya mbulamatadi.

Meme mvua ngenza mudimu ku Biro binene bia Bantemu ba Yehowa bia buloba bujima. Kadi mmushindu kayi ungakafika ku dikala munkatshi mua bantu bavua baye kulumbulula ku tubadi tua ku Mputu?

MBANKOLESHE KUDI BALEDI BAVUA BAMISIONERE BA TSHISUMI

Pavua baledi banyi, George ne Lucille bajikije Kalasa ka Gilada ka 12, bakabatuma bamisionere mu ditunga dia Éthiopie; muomu amu ke muvuabu bandelele mu 1956. Bakanginyika Philip, muambi wa lumu luimpe wa mu tshikondo tshia bapostolo. (Bien. 21:8) Tshidimu tshiakalonda, mbulamatadi wakakandika midimu ya ntendelelu wetu. Nansha muntshivua muana mutekete menemene, ndi mvuluka bimpe muvua bena mu dîku dietu bayisha ne baya mu bisangilu mu musokoko; bu mumvua muana, bivua bingenza meme disanka dia bungi be! Diakabi, bakokeshi ba mbulamatadi bakatuipata mu ditunga adi mu 1960.

Dîku dietu diakaya kusombela mu Wichita, mu Kansas mu États-Unis. Kadi baledi banyi bavua anu banange mudimu wa buambi bu muvuabu bawunange pavuabu bamisionere. Bakatulongesha meme ne yayanyi Judy ne muakunyanyi wa balume Leslie bua kunanga Yehowa ne kumuenzela mudimu ne muoyo mujima. Judy ne Leslie bavua baledibue pabu mu Éthiopie amu. Ngakabatijibua ne bidimu 13. Bidimu bisatu pashishe, tuetu kuya dîku dijima muaba uvuabu dijinga ne bamanyishi ba bungi, mu Arequipa, mu Pérou.

Mu 1974, pantshivua anu ne bidimu 18, Betele wa mu Pérou wakantuma meme pamue ne bana betu ba balume bakuabu banayi bu bampanda-njila ba pa buabu miaba ivuabu kabayi banji kuyisha, mu mikuna ya mu Amerike wa ku Sud. Tuvua ne bua kuyishamu bantu bavua bakula muakulu wa Quechua ne wa Aymara. Tuvua tuenza ngendu ne mashinyi, owu ke avua kabidi nzubu wetu. Ndi ngumvua disanka dia bungi pandi mvuluka mumvua nyisha bantu ne Bible, mbambila ne: Yehowa ukadi pa kujikija bupele, masama, ne lufu. (Buak. 21:3, 4) Bantu ba bungi bakalua Bantemu ba Yehowa.

BAKANTUMA KU BIRO BIETU BINENE BIA BULOBA BUJIMA

Pavua muanetu Albert Schroeder wa mu Kasumbu kaludiki mulue kutukumbula mu Pérou mu 1977, wakankankamija bua kuwuja formilere bua kuya ku Betele wa ku biro bietu binene bia buloba bujima. Ngakamuwuja. Mu matuku makese, tuambe ne: mu dia 17/6/1977, ngakatuadija mudimu ku Betele wa ku Brooklyn. Mu bidimu bipite pa binayi biakalonda, mvua muenze mudimu mu tshibambalu tshia dilongolola bintu ne dibilama ne tshia disukula mu biro ne miaba mikuabu.

Mu ngondo 6/1978, ngakatuilangana ne Elizabeth avallone mu mpungilu wa bantu bafume mu matunga a bungi uvua muenzekele mu Nouvelle-Orléans, mu Louisiane. Baledi bende bavua anu bu banyi, bualu bavua pabu benzele Yehowa mudimu ne muoyo mujima. Elizabeth ukavua ne bidimu binayi mu bumpanda-njila bua pa tshibidilu. Uvua musue kutungunuka ne mudimu wende au. Tuakashala tuyukila. Tuetu kulua kumanyangana bimpe, ne kunangangana bikole. Ke bualu kayi mu dia 20/10/1979, tuakaselangana ne kutuadija mudimu ku Betele pamue.

Bena Kristo netu ba mu tshisumbu tshietu tshia kumpala tshia mu Brooklyn tshia muakulu wa tshiena Espagne bavua batunange bikole. Mu kupita kua bidimu, bavua batutume kabidi mu bisumbu bikuabu bisatu muvua bana betu batukankamija bua tutungunuke ne mudimu wetu wa ku Betele. Tudi ne dianyisha dia bungi kudi bana betu bavua batuambuluishe bua kutabalela baledi betu bakavua bakulakaje, banyi ne ba mukajanyi.

BAKANTUMA MU TSHIBAMBALU TSHIA MALU A MIKENJI

Mu ngondo wa 1/1982, bakantuma mu Tshibambalu tshia malu a mikenji ku Betele. Mbualu bumvua tshiyi mutekemene to. Bidimu bisatu pashishe, bakangambila bua kubuela mu universite bua kulua ndumbulula. Ngakumvua disanka dia dikema pangakumvua mu iniversite amu ne: budikadidi budi bantu ba bungi batunka nabu mu États-Unis ne mu matunga makuabu mbufumine ku ditshimuna divua Bantemu ba Yehowa batshimune bilumbu ku tubadi. Bavua batulongesha malu a mushindu utuvua batshimune au.

Mu 1986 pamvua ne bidimu 30, bakanteka mutangidi wa Tshibambalu tshia malu a mikenji. Mvua ne disanka dia bungi bua muvua Betele mungeyemene bikole nansha mumvua nsonga. Kadi ngakamona kabidi ne: mudimu au uvua mumpite makanda bualu uvua ne malu a bungi a meme kumanya.

Bakanteka ndumbulula mu 1988, kadi tshivua mujingulule muvua tulasa atu tunnyanga meme ne malanda anyi ne Yehowa to. Tulasa tua iniversite tudi mua kusaka muntu bua kuditumbisha ne kudimona mupite badi kabayi batulonge. Elizabeth wakangambuluisha bua kupetulula bibidilu bianyi bia mu nyuma bimvua nabi kumpala kua kulonga tulasa tua bundumbulula. Biakangangata dîba bua kupetulula malanda anyi ne Yehowa. Ndi mufike ku dimona ne: tshidi ne mushinga wa bungi ki nkuikala ne mutu muwule ne dimanya dipite bungi to. Kuikala mu malanda makole ne Yehowa, kumunanga yeye ne bantu bende ke kudi kuvuija nsombelu wetu ne mushinga wa bungi.

NGAKAKUILA LUMU LUIMPE NE KULUJADIKA KUMPALA KUA BAKOKESHI

Pangakajikija tulasa atu, ngakadifila bua kuambuluisha mu tshibambalu tshia ku betele tshia malu a mikenji, bua kukuba bulongolodi bua Yehowa, ne kukuba bukenji buetu bua kuyisha lumu luimpe. Mvua munange mudimu wanyi, kadi kawuvua mupepele to, bualu malu avua enda ashintuluka mu bulongolodi buetu lukasa lukasa. Tshilejilu, tuvua ne tshibidilu tshia kuambila bantu bua bafile makuta bua kubapesha mikanda; kadi mu 1990, Kasumbu kaludiki kakambila Tshibambalu tshia malu a mikenji bua kuleja bana betu bavuabu bapeshe mudimu wa kulombola malu avua atangila tshilumbu atshi tshia kuenza bua kuimanyika dilomba bantu mapa mu buambi. Pashishe Bantemu ba Yehowa bakatuadija kupesha bantu mikanda mu buambi kabayi babalomba mapa to. Bualu ebu buakapepeja malu ku Betele ne miaba itutu tuyisha ne mbuambuluishe bua kuepuka malu a kufuta bitadi too ne lelu. Bamue bana betu bakamona ne: bu muvua malu mashintuluke nanku, bantu ba bungi kabakupeta mushindu wa kulonga malu a Yehowa to, bualu netupangile makuta adi mua kuenza bua tuikale ne mikanda ya bungi ya kupesha bantu badi basue kulonga bulelela. Kadi tangila tshiakenzeka: katshia ku 1990, bungi bua batendeledi ba Yehowa mbuvule bupite pa misangu ibidi. Lelu eu muntu yonso udi ne mushindu wa kulonga Bible ku diambuluisha dia mikanda yetu kayi ufuta kantu. Ndi mufike ku dimona ne: malu onso manene adibu bashintulule mu bulongolodi aa mmende bimpe ku diambuluisha dia bukole bua Yehowa ne dia buludiki bua kudi mupika wa lulamatu.​—Ekes. 15:2; Mat. 24:45.

Katuena batshimune ku tubadi bualu tudi ne bandumbulula bimpe to. Bienzedi bia bantu ba Yehowa ke bitu bisaka banzuji bua kutua ku tshietu. Ngakadimuenena bualu ebu mu 1998 pavua bena mu Kasumbu kaludiki basatu ne bakaji babu babuele mu mpungilu ya pa buayi mu Cuba. Kanemu kabu ne bukalanga buabu ke biakatamba kujadikila bakokeshi ba mbulamatadi ne: katutu tubuelakana mu malu a tshididi to, kadi ki mmalu onso atuvua tubambila patuvua tutuilangana nabu to.

Kadi imue misangu tshilumbu tshiotshi katshiyi tshijike mu diyukidilangana, tudi ‘tuakuila lumu luimpe ne tulujadika kumpala kua bakokeshi.’ (Filip. 1:7) Tshilejilu, munkatshi mua bidimu bia bungi, bakokeshi ba ku Mputu ne ba mu Corée du sud kabavua bitaba ne: tuvua ne bukenji bua kubenga kuenza midimu ya busalayi. Ke bualu kayi bakela bana betu ba ku Mputu batue ku 18 000 ne ba mu Corée du sud bapite pa 19000 mu maloko bualu bavua babenge kuya ku busalayi.

Ndekelu wa bionso, mu dia 7/7/2011, Kabadi ka ku Mputu ka manême a bantu kakangatshila matunga onso a ku Mputu dipangadika dinene bua tshilumbu tshia Bayatyan ne Armenie, dia ne: bantu bobu babenga kuenza mudimu wa busalayi bua malongesha a mu bitendelelu biabu, badi ne bua kubitabila bua kuenza midimu mikuabu ya tshianana. Mu dia 28/6/2018, kabadi kakuabu kanene ka mu Corée du Sud kakangata paku dipangadika dia muomumue. Bu bana betu ba balume, nansha babala ku minu, bitabe bua kuenza mudimu wa busalayi, tubadi katuvua mua kutubingisha to.

Tshibambalu tshia malu a mikenji tshia ku Biro bietu binene bia buloba bujima ne bana betu ba ku betele ya pa buloba bujima batu badienzeja bua kuakuila manême abu a kutendelela Yehowa ne kuyisha malu a Bukalenge. Tudi ne disanka dia kuakuila bena Kristo netu badi mbulamatadi uluisha. Nansha tuetu katuyi batshimune tshilumbu kampanda ku kabadi, kutshilumbulula aku mmushindu wa kuyisha banguvena ne bakalenge ne bisamba. (Mat. 10:18) Balumbuluishi, baleji mpala ba mbulamatadi, bena ku tudiomba, ne bantu bakuabu bonso, batu bakuata mvese ya mu Bible itutu tufundila tubadi ne itutu tuamba patutu tulumbulula. Bantu badi balongolole muoyo wabu batu bamanya tshidi Bantemu ba Yehowa menemene ne muaba utubu bangatshila malongesha abu. Bamue ba kudibu mbalue Bantemu.

TUASAKIDILA YEHOWA WETU!

Mu bidimu 40 bishale ebi, mvua ne diakalenga dia kueleshangana diboko ne Betele ya pa buloba bujima mu malu a bilumbu bia ku tubadi; ne ndi mulumbulule kumpala kua tubadi tunene tua bungi ne kumpala kua bakokeshi banene ba bungi. Ndi munange bena Kristo nanyi batuvua nabu mu Tshibambalu tshia malu a mikenji tshia ku Biro bietu binene bia buloba bujima ne ba mu bibambalu bikuabu bia malu a mikenji bia pa buloba bujima. Ndi mupete masanka a bungi menemene.

Elizabeth mmungambuluishe ne muoyo mujima munkatshi mua bidimu 45 mu bikondo bimpe ne bibi. Ndi mumunange bualu uvua ungambuluisha nanku pende muikale ne disama divua dimutekesha mubidi.

Yonso wa kutudi mmudimuenene ne: bukole ne ditshimuna bidi bifuma kudi Yehowa ki nkutudi tuetu to. Ke bualu kayi Davidi wakamba ne: “Yehowa udi bukole bua bantu bende.” (Mis. 28:8) Bulelela, “mvita nya Yehowa.”