Nkonko ya babadi
Ndîba kayi diajika mudimu wa diyisha lumu luimpe utudi tuenza lelu?
Yezu wakamba ne: “Nebayishe lumu luimpe elu lua Bukalenge pa buloba bujima budi bantu basombele bua luikale bujadiki kudi bisamba bionso, ne pashishe, nshikidilu nealue.” (Mat. 24:14) Muaku wa mu tshiena Greke udibu bakudimune ne: “nshikidilu” mu mvese eu ne mu mvese 6 ne wa 13, udi uleja nshikidilu menemene wa ndongoluelu wa malu wa Satana eu ku Armagedone. (Buak. 16:14, 16) Nunku, mudimu wa kuyisha lumu luimpe newimane anu pikala Armagedone pa kutuadija. Bualu ebu budi bushintulula mushindu utuvua tumvua mvese eu kumpala.
Kumpala tuvua tuamba ne: mudimu wa kuyisha uvua wimana pavua dikenga dinene dituadija ne dibutuka dia Babilona Munene. (Buak. 17:3, 5, 15, 16) Tuvua tuela meji ne: patuadija dikenga dinene, Yehowa kakupesha kabidi bantu mpunga wa kuteleja lumu luimpe to. (Yesh. 61:2) Tuvua kabidi tuela meji ne: bantu bapanduka ku dikenga dinene ngaba baleja mudibu balamate Nzambi kumpala kua diodi kutuadija. Tuvua tubafuanyikija ne bena Yuda bavua bapanduke ku kabutu ka Yelushalema, kavua kenzeke mu 607 K.Y. Bakavua batue bena Yuda abu tshitampi tshia lupandu, bualu bavua batendelela Yehowa ne bavua bakine malu mabi. (Yeh. 5:11; 9:4) Kadi abi kabiena bipetangana ne mêyi a Yezu adi mu Matayi 24:14 to, bualu mêyi au adi aleja ne: bantu badi mua kupeta mpunga wa kuteleja lumu luimpe nansha pikala nshikidilu menemene wa ndongoluelu wa malu eu pa kulua ku Armagedone.
Ngumvuilu wetu mupiamupia wa Matayi 24:14 mmutuambuluishe kabidi bua kuakaja ngumvuilu wetu wa Buakabuluibua 16:21, udi wakula bua mabue manene a mvula. Patudi bakonkonone malu makuabu tudi bafike kudimona ne: mvese ibidi eyi idi ikumbajangana. Mushindu kayi? Tshidi Bible wamba bua tshidi bantu benza patudi tubayisha mukenji wa Bukalenge ke tshidi tshitusake bua kuamba nanku. Paulo wakafunda bua “bantu badi benda bapandishibua,” wamba ne: mukenji wa Bukalenge ndumu luimpe, mmumue ne: udi “dipembu dia muoyo” kudibu. Kadi bua bena lukuna ba Nzambi, wakamba ne: mukenji au ndumu lubi, mmumue ne: udi “mupuya wa lufu” kudibu. (2 Kol. 2:15, 16) Mbakine mukenji wa Bukalenge au bualu udi uleja ne: ndongoluelu wa malu udibu banange eu mmubi, udi ku bukokeshi bua Satana, ne bakadi pa kumubutula mu katupa kîpi emu.—Yone 7:7; 1 Yone 2:17; 5:19.
Mona ne: mabue a mvula adibu bakuile mu Buakabuluibua 16:21 neikale ‘manene a dikema.’ Abi bidi bileja ne: mu dikenga dinene mudimu wa diyisha newikale pamuapa mua kuenzeka bikole menemene, tuamba ne: nebamanyishe dîna dia Yehowa, kupita mutubu kabayi banji kudimanyisha. (Yeh. 39:7) Tshikondo atshi, panyima pa dibutuka dia Babilona Munene, bamue bantu nebanange mukenji wa Bukalenge, bawumona bu dipembu dimpe anyi? Bidi anu mua kuenzeka nanku. Pamuapa nebavuluke anyi nebabambile mukavua Bantemu ba Yehowa balongeshe munkatshi mua bidimu bia bungi ne: Babilona Munene uvua ne bua kubutudibua, ne nebadimuenene dikumbana dia bualu abu.
Bualu ebu mbufuanangane ne tshivua tshienzeke mu Ejipitu wa kale panyima pa bipupu dikumi. Yehowa mumane ‘kunyoka nzambi yonso ya mu Ejipitu,’ “tshisumbu tshinene tshia bantu basambakane” bavua kabayi bena Isalele tshiakaya ne bantu bende. (Ekes. 12:12, 37, 38) Pamuapa bantu abu bakaya ne bantu ba Yehowa bua muvuabu bamone ne: malu onso avua Mose muambe bua bipupu dikumi avua makumbane.
Muntu yonso witabuja Yehowa panyima pa dibutuka dia Babilona Munene neapete mpunga wa kutua bana babu ne Kristo mpanda, bualu bakuabu nebikale batshidi pa buloba. (Mat. 25:34-36, 40) Bushuwa, pikala Armagedone pa kutuadija, bela manyi bikale pa buloba nebaye mu diulu. Dîba adi kakuakuila kabidi mpunga wa bantu bakuabu kuangatshibua bu mikoko to.
Ngumvuilu mupiamupia eu udi utuleja mudi Yehowa munange bantu bikole ne ubumvuila luse. Mu bulelela, “ki mmusue bua muntu nansha umue abutudibue, kadi mmusue bua bonso bafike ku dinyingalala bua mpekatu yabu.”—2 Pet. 3:9.