Yezu udi Muakuidi wetu munene udi utumvuila

1-2. a) Yehowa uvua mutume Muanende pa buloba bua tshinyi? b) Netuakule bua tshinyi mu tshiena-bualu etshi? (Ebelu 5:7-9)

KUKADI bidimu bitue ku 2000 katshia Yehowa watuma Muanende wa mushinga mukole pa buloba. Mu malu avuaye mumutumine pa buloba mudi aa: uvua mumutume bua kupikula bantu ku mpekatu ne ku lufu ne kuenza bua kuikale mushindu wa kujikija ntatu yonso idi Satana mukebeshe. (Yone 3:16; 1 Yone 3:8) Yehowa uvua mumanye kabidi ne: dikala dia Yezu pa buloba bu muntu wa mashi ne mâyi divua mua kumuambuluuisha bua kulua Muakuidi munene uvua umvuila bantu luse ne uvua uditeka pa muaba wabu. Yezu wakatuadija mudimu wende wa buakuidi au mu 29 B.B. pavuaye mubatijibue.a

² Mu tshiena-bualu etshi, netuakule bua muvua dikala dia Yezu pa buloba bu muntu wa mashi ne mâyi dimuambuluishe bua kulua Muakuidi munene udi umvuila bantu luse. Bidi ne mushinga bua tuetu kumvua bualu ebu bimpe bualu nebienze bua bikale bipepele bua kusambila Yehowa ne kusemena pabuipi nende, nangananga patudi babungame bua mpekatu itudi benze.​—Bala Ebelu 5:7-9.

MUANA WA NZAMBI UVUAYE MUNANGE WAKALUA PA BULOBA

3-4. Mmalu kayi avua Yezu mulekele mu diulu pavuaye mulue pa buloba? Nnsombelu kayi uvuaye nende pa buloba?

³ Nsombelu wa ba bungi ba kutudi ukadi anu mushintuluke. Tshilejilu, bamue bakadi bamuangale muaba uvuabu banange bikole, bashiyangane ne balela ne balunda babu. Kabitu bipepele bua kuitaba bua kushintulula nsombelu wetu mushindu eu to. Kadi kakuena muntu udi mushintulule malu a bungi mu nsombelu wende bu Yezu to. Yeye ke uvua muanjelu wa kumpala wa mushinga mukole mu diulu. Yehowa uvua mumunange bikole ne uvua anu ne disanka dia bungi bua muvuaye wenza mudimu pamue ne Tatuende. (Mis. 16:11; Nsu. 8:30) Kadi Filipoyi 2:7 udi wamba ne: Yezu wakitaba bua kushiya muanzu munene uvuaye nawu mu diulu, ‘kudivuijaye tshianana’ bua kulua kusomba ne bantu bapange bupuangane pa buloba.

⁴ Tuelabi kabidi meji bua malu avua menzekele Yezu patshivuaye muana. Yezu uvua muledibue mu dîku dia bapele. Tudi tuamba nanku bualu baledi bende bakalambula tunyunyi tukese tubidi ku ntempelo panyima pa diledibua diende. (Lew. 12:8; Luka 2:24) Pavua Helode, mukalenge mubi mumvue ne: mbalele Yezu, wakakeba bua kumushipa. Bua kupandisha Yezu, baledi bende bakanyemena mu Ejipitu bua tshikondo kampanda. (Mat. 2:13, 15) Nsombelu au mmushilangane bikole ne uvuaye nende mu diulu.

5. Mmalu kayi avua Yezu mumone pavuaye pa buloba? Mmushindu kayi uvua kusomba pa buloba kumuambuluishe bua kulua Muakuidi munene uvua umvuila bantu luse? (Tangila kabidi tshimfuanyi.)

⁵ Pavua Yezu pa buloba, uvua umona muvua bantu ba bungi bakenga. Pavua bantu bavuaye mumanye bafua, uvua umvua mutu bantu bumvua padibu bafuisha; pamuapa ke muvuaye mumvue pavua Jozefe tatuende mudishi mufue. Pavuaye uyisha, wakatuilangana ne bena nsudi, bampofo, ne bantu bavua batekete mubidi; yeye kubumvuila luse. (Mat. 9:2, 6; 15:30; 20:34; Mâko 1:40, 41; Luka 7:13) Kakuyi mpata, pavua Yezu mu diulu uvua umona muvua bantu bakenga. Kadi pavuaye mulue pa buloba, wakafika ku dimanya mutu bantu bumvua padibu bakenga. (Yesh. 53:4) Malu onso avua Yezu mutuilangane nawu pa buloba au, akamuambuluisha bua kumvua tunyinganyinga tua bukua bantu, dibungama diabu, ne makenga abu. Yezu wakatuilangana pende ne malu atu akuata bantu bonso, budi mudi: ditshioka, dibungama ne kanyinganyinga.

YEZU UVUA UMVUILA BANTU LUSE

6. Ntshinyi tshivua muprofete Yeshaya muambe bua kuleja ne: Yezu uvua ne bua kumvuila bantu luse? (Yeshaya 42:3)

⁶ Tshikondo tshionso tshivua Yezu uyisha, wakaleja muvuaye umvuila bantu bavuabu bakengesha luse ne muoyo mujima. Pavuaye muenze nanku, wakakumbaja tshikavua muprofete Yeshaya muambe. Mu Mifundu ya mu tshiena Ebelu, batu imue misangu bafuanyikija bantu badi ne bubanji ne makanda a bungi ne budimi budibu bamiamine mâyi bimpe anyi ne mitshi minene mile. (Mis. 92:12; Yesh. 61:3; Yel. 31:12) Kadi bapele ne bantu badi kabayi ne wa kubambuluisha badi babafuanyikija ne: malenga adi mazajike ne miendu idi ifuima. (Bala Yeshaya 42:3; Mat. 12:20) Muprofete Yeshaya wakakula bua bilejilu abi ku bukole bua nyuma muimpe bua kuleja muvua Yezu ne bua kunanga bantu bavuabu bakengesha kudi bakuabu ne kubumvuila luse.

7-8. Mmunyi muvua Yezu mukumbaje dîyi dia buprofete divua Yeshaya muambe?

⁷ Matayi wakaleja muvua mêyi avua Yeshaya muambe au akumbanyina Yezu, wamba ne: “Kakutshibula dilenge didi dizajike, ne kakujima mukaba wa muendu udi ufuima.” Yezu uvua muenze bishima bia bungi bua bantu bavuabu bakengesha, bavua badimona kabayi kabidi ne bua nsongo mu nsombelu wabu to. Tshilejilu, wakatuilangana ne muntu uvua ne nsudi mubidi mujima. Pamuapa muntu eu uvua muele meji ne: kavua mua kuondopibua anyi mene kukumbana bua kusomba pamue ne bena mu dîku diabu anyi balunda bende to. (Luka 5:12, 13) Pashishe, wakatuilangana kabidi ne mpudi matshi uvua ne lutatu lua kuakula. Elabi meji muvua muntu eu umvua pavuaye umona bakuabu bakula, kadi kayi yeye ne mushindu wa kuakula anyi wa kumvua bivuabu bamba. (Mâko 7:32, 33) Kudi malu makuabu avua Yezu mutuilangane nawu.

⁸ Tshikondo atshi bena Yuda ba bungi bavua bela meji ne: masama anyi bulema bivua nabi bantu bivua manyoka avuabu babapesha bua mpekatu yabu anyi ya baledi babu. (Yone 9:2) Ke bualu kayi bavua babakengesha kudi bakuabu. Kadi Yezu uvua ubondopa, ubambuluisha bua bamone ne: Nzambi uvua ubatabalela. Bualu ebu budi butujadikila tshinyi?

9. Mmunyi mudi Ebelu 4:15, 16 uleja ne: Yezu udi bushuwa umvuila bantu bapange bupuangane luse?

⁹ Bala Ebelu 4:15, 16. Tudi batuishibue ne: Yezu neatungunuke anu ne kutumvuila. Bidi biumvuija tshinyi? Muntu udi umvuila bakuabu ngeu udi umvua bibi bua mudibu bakenga. Muaku wa mu tshiena Greke udibu bakudimune ne: ‘kumvuila’ muntu udi umvuija kuditeka pa muaba wende. Nansha Paulo uvua mutele muaku wa mu tshiena Greke eu mu Ebelu 10:34 bua kuleja mutudi tumvuila bantu badi mu buloko luse. Bishima bivua Yezu wenza bua kuambuluisha bantu bavua bakenga, bidi bituleja ne: uvua ubumvuila luse. Kavua wondopa bantu bualu uvua muenzejibue bua kubondopa to. Uvua ubondopa bualu uvua ubatabalela ne musue kubambuluisha. Tshilejilu, bua kuondopa muena nsudi, kavua muenzejibue bua kumulenga to, kadi yeye wakamulenga; pabi bidi bimueneka ne: muena nsudi au ukavua muenze bidimu bia bungi kakuyi muntu mumulenge. Dîba divuaye muondope mpudi matshi, uvua muye nende ku luseke pa nkayabu, muaba uvua kawuyi mitoyi ya bantu. Bualu bukuabu, umue musangu mukaji kampanda uvua munyingalale bua malu ende mabi wakabolesha makasa a Yezu ne bisonji biende ne kuakupulaye ne nsuki yende. Mufalese mukuabu wakakula bibi bua mukaji au, kadi Yezu wakamuakuila ne muoyo mujima. (Mat. 8:3; Mâko 7:33; Luka 7:44) Malu aa adi aleja ne: Yezu kavua wepuka bantu bavua basama anyi bavua benze mpekatu minene to. Kadi uvua musue bua balue kudiye ne uvua uleja muvuaye mubanange. Tuikalayi batuishibue ne: udi utumvuila petu luse.

TUIDIKIJAYI MUAKUIDI WETU MUNENE LELU

10. Mbintu kayi bidiku lelu bitudi mua kuambuluisha nabi bampudi matshi ne bampofu? (Tangila kabidi bimfuanyi.)

¹⁰ Tuetu bayidi ba Yezu tudi tudienzeja bua kunanga bantu ne kubumvuila luse anu bu yeye. (1 Pet. 2:21; 3:8) Nansha mutudi katuyi mua kuondopa bampudi matshi anyi bampofu, tudi mua kubambuluisha bua bamanye Yehowa ne badie nende bulunda. Tshilejilu, mikanda yetu ya malu a mu Bible ikadiku mu miakulu ya tumama mipite pa 100. Bua kuambuluisha badi ne lutatu lua mêsu anyi badi kabayi bamona, tukadi bapatule mikanda idi ne mfundilu wa bampofo mu miakulu mipite pa 60. Tukadi kabidi bapatule filme yetu ya benda bumvuija bidi bienzekamu mu miakulu mipite pa 100. Bintu ebi bidi biambuluisha bampudi matshi ne bampofu bua kusemena pabuipi ne Yehowa ne Muanende.

11. Mmunyi mudi bulongolodi bua Yehowa buleja ne: budi buditatshisha bua bantu ba mishindu yonso anu bu Yezu? (Bienzedi 2:5-7, 33) (Tangila kabidi bimfuanyi.)

¹¹ Bulongolodi bua Yehowa butu budienzeja bua kuambuluisha bantu ba mishindu yonso. Vuluka ne: Yezu mumane kubishibua ku lufu, wakenza mudimu ne nyuma muimpe bua bantu bonso bavua balue mu tshibilu tshia Pentekoste bumvue lumu luimpe, muntu yonso mu “muakulu wende.” (Bala Bienzedi 2:5-7, 33.) Ku bulombodi bua Yezu, bulongolodi buetu mbupatule mikanda ya malu a mu Bible mu miakulu mipite pa 1000, ne imue ya kudiyi badi bayakula anu kudi bantu bakese. Tshilejilu, kudi imue miakulu idibu bakula anu kudi bantu bakese ba mu Amerike wa ku Nord ne wa ku Sud. Kadi tudi bapatule mikanda yetu mu miakulu mipite pa 160 ya kudiyi bua badi bayakula bumvue lumu luimpe. Tudi bapatule kabidi mikanda yetu mu miakulu mishilangane ya tshiena Romani mipite pa 20. Bantu ba bungi badi bakula miakulu eyi bakitaba bulelela.

12. Mbualu kayi bukuabu budi bulongolodi bua Yehowa buenzela bantu lelu?

¹² Pa kumbusha diambuluisha bantu bua kumvuabu lumu luimpe, bulongolodi bua Yehowa budi buambuluisha kabidi badi bipupu bikuata. Ke bualu kayi bana betu ba bungi batu badifila bua kuambuluisha bena Kristo nabu badi bipupu bikuate. Bulongolodi buetu butu buambuluisha kabidi bantu bua kupeta miaba mimpe idibu mua kudisangishila bua kulonga malu a bungi adi aleja mudi Nzambi mubanange.

MUAKUIDI WETU MUNENE UDI MUA KUKUAMBULUISHA

13. Leja mishindu idi Yezu utuambuluisha.

¹³ Yezu mmulami muimpe bualu udi utabalela majinga etu a mu nyuma. (Yone 10:14; Ef. 4:7) Imue misangu tudi mua kuteketa bikole mu mikole, tudiumvua anu bu mukaba wa muendu udi ufuima anyi bu dilenge didi dizajike. Tudi mua kudiumvua nanku bua disama dikole ditudi nadi, bua bualu kampanda bubi butudi benze, anyi pamuapa bualu malanda etu ne muena Kristo netu kampanda mmanyanguke. Bidi mua kutukolela bua kumbusha meji ku malu au ne kutukolela kabidi bua kuatuma ku malu mimpe atudi batekemene. Kadi manya ne: Yezu mmumanye ntatu iudi utuilangana nayi ne muudi udiumvua. Mmusue kukuambuluisha bualu udi ukumvuila luse. Tshilejilu, paudi mutekete mu mikolo, udi mua kukupesha bukole ku diambuluisha dia nyuma muimpe. (Yone 16:7; Tito 3:6) Bualu bukuabu, Yezu udi mua kukuambuluisha ne kukukolesha ku butuangaji bua “mapa mikale bantu” ne bua bena Kristo netu.​—Ef. 4:8.

14. Ntshinyi tshitudi mua kuenza tuetu tudiumvua batekete mu mikolo?

¹⁴ Wewe udiumvua mutekete mu mikolo, elangana meji a mudi mudimu wa Yezu wa buakuidi mua kukuambuluisha. Vuluka ne: Yehowa uvua mumutume pa buloba bua afile muoyo wende bu tshia kupikulangana natshi ne bua afike ku diumvua bimpe menemene ntatu itu nayi bantu bapange bupuangane. Wewe udiumvua mutekeshibue mu mikolo bua mpekatu iudi muenze anyi bua matekete audi nawu, manya ne: Yezu udi pabuipi bua kukuambuluisha “pa dîba dikumbane.”​—Eb. 4:15, 16.

15. Ntshinyi tshivua tshiambuluishe muanetu wa balume kampanda bua kupingana mu bulongolodi?

¹⁵ Yezu utu ulombola kabidi bantu bende bua kukeba badi balekele Yehowa bua bapingane kudiye. (Mat. 18:12, 13) Mona tshivua tshifikile muanetu Stefano.b Bakamumbusha mu tshisumbu. Kadi panyima pa bidimu 12, wakapangadija bua kuya mu bisangilu. Udi wamba ne: “Kabivua bipepele bua kuyamu to, kadi mvua musue kuenzela kabidi Yehowa mudimu pamue ne bena Kristo nanyi. Bakulu bavua balue kuntangila bakenza bua nyukile nabu mudilekelele. Kuvua misangu imvua ngumvua bibi bua mumvua muanji kulekela Yehowa, ne nkavua musue kabidi kuteketa mu mikolo. Kadi bakulu bakamvuluija ne: Yehowa ne Yezu ki mbasue bua ntekete mu mikolo to. Pakampingajabu mu bulongolodi, bena mu tshisumbu tshietu bonso ne bena mu dîku dietu bakangakidila ne disanka dionso. Mukajanyi wakalua kuitaba bua kulonga Bible, ne patudi tuakula apa dîku dietu dijima tudi tuenzela Yehowa mudimu.” Muakuidi wetu munene udi mutunange udi ne bua kuikala ne disanka dia bungi padiye umona bena mu tshisumbu bonso bambuluisha bantu badi banyingalala bua bapingane kudi Yehowa.

16. Bua tshinyi udi ne dianyisha bua mutudi ne Muakuidi munene udi utumvuila?

¹⁶ Tshikondo tshivua Yezu pa buloba, wakambuluisha bantu misangu ya bungi anu dîba divuabu dijinga ne diambuluisha. Lelu, tuikalayi batuishibue ne muoyo mujima ne: neatuambuluishe petu dîba dionso dituikale dijinga ne diambuluisha. Mu bulongolodi bupiabupia, neatuambuluishe bua kuikala ne nsombelu muimpe, katuyi mua kutata kabidi nansha kakese bua mpekatu ne dipanga bupuangane to. Tudi tuela Yehowa Nzambi wetu tuasakidila bua mudiye mutunange bikole, mututekele Muanende Muakuidi munene udi utumvuila.