Diambuluisha bua bakaji badibu bakengeshe
“PA BULOBA bujima, kudi bantu bakaji miliyo ne miliyo, bakulumpe ne bana, badibu benzele malu ne tshikisu. Udi pebe umue wa kudibu anyi? Mona tshidi tshisaka Nzambi bua kukukuba, ne tshienzelaye bantu badi bamuenesha bantu bakaji kasuba.”
Mêyi aa nga mu tshiena-bualu tshidi mu jw.org tshia “Bukubi bua bantu bakaji: Tshidi Bible wamba.” Ku ndekelu kua tshiena-bualu atshi kudi kajila kadi kakufikisha muaba wa kutshiambuila bua kulua kutshipatula pa mabeji, pashishe kuavuija bu kayé ka mabeji anayi. Muanetu wa bakaji kampanda wa mu États-Unis, diende Stacy, udi wamba ne: “Ngakenza tuyé tua bungi, pashishe meme ne muanetu wa bakaji mukuabu, tuakaya natu muaba uvuabu balamina bantu bakaji kampanda bua kubakuba ku njiwu.
Muena mudimu wa muaba au wakatulomba bua tubatuadile kabidi tuyé tukuabu tuvua ne tshiena-bualu atshi. Nunku bana betu ba bakaji babidi abu bakabatuadila tuyé atu tupite pa 40 ne twarte tua jw.org 30. Pakayabu kubatangila pashishe, munene wa muaba uvuabu balamina bantu bakaji abu wakajinga bua Bantemu baleje bantu bakaji abu mua kulonga Bible.
Muanetu Stacy ne bana betu bakuabu ba bakaji babidi bakaya muaba mukuabu uvuabu bashile bantu bakaji tuyé atu tutanu, ne bantu bavua muaba au bakalomba bua babatuadile tukuabu. Umue wa ku bena mudimu ba muaba au wakamba ne: “Mikanda eyi neyambuluishe bantu bakaji aba bikole. Tudi petu nayi dijinga.” Pavua bana betu ba bakaji abu balue kubatangila kabidi, bamue ba ku bantu bakaji abu bakasomba pamue bua babaleje mutu dilonga dia Bible dienzeka; ke babidi ba kudibu kuambabu ne: mbasue kubuela mu tshisangilu tshia ku ndekelu kua lumingu luvua lulonda ku Nzubu wa Bukalenge.
Stacy udi wamba ne: “Mushindu udi bantu basue kubala tshiena-bualu etshi udi utuenza disanka dia katshia! Tuvua batshipatule pa mabeji, pashishe benze mabeji au malue tuyé. Mmushindu muimpe wa kumanyisha bantu bakaji badibu bakengesha abu malu a Bukalenge bua Nzambi. Mbitulenge ku muoyo bikole bua mutudi bamone disanka divua nadi bantu patuvua tubalongesha. Tudi kabidi ne disanka bua mutudi tumona Yehowa ubenesha bionso bitudi tuenza bua kumanyisha bantu bakaji aba lumu luimpe.