Mua kusambila—Kuambulula disambila dia Tatu wetu nkukumbane anyi?
Diandamuna dia mu Bible
Disambila dia Tatu wetu didi dileja mushindu muimpe wa kusambila ne tshitudi mua kulomba mu disambila. Yezu wakadilongesha bayidi bende pakamukonkabu ne: “Mukalenge, tulongesha mua kusambila.” (Luka 11:1) Kadi ki nganu disambila dia Tatu wetu didi Nzambi witabaa to. Yezu wakafila disambila adi bu tshilejilu tshia masambila adi Nzambi uteleja.
Mu tshiena-bualu etshi netuakule bua malu aa:
Ntshinyi tshitu disambila dia Tatu wetu diamba?
Disambila dia Tatu wetu didi mu Matayi 6:9-13, mbadifunde mishindu mishilangane mu nkudimuinu ya Bible ya bungi. Mona bilejilu bibidi ebi:
Nkudimuinu wa bulongolodi bupiabupia: “Tatu wetu udi mu diulu, dîna diebe dijidibue. Bukalenge buebe bulue. Disua diebe dienzeke kabidi pa buloba muomumue ne mu diulu. Utupeshe lelu tshiakudia tshietu tshia dituku edi; utulekeele mabanza etu, bu mutudi petu balekeele badi ne etu mabanza. Kutubueji mu ditetshibua, kadi utusungile kudi mubi.”
Mukanda wa Nzambi: “Tatu wetu udi mu diulu, banemeke dina diebe. Bukelenge buebe bulue. Benze ha buloba mûdi musue bu mudibo benza mu diulu. Utuhe tshituha tshia bidia bietu bia buatshia-buatshia lelu. Utulekelele mabanza a malu mabi etu bu mutuakumana kulekelela kabidi badi n’etu mabanza a malu mabi. Kutufikishi hadi mateyi, kadi utusungile kudi bubi.”b
Disambila dia Tatu wetu ditu diumvuija tshinyi?
Bu muvua malu avua Yezu mulongeshe apetangana ne mifundu mikuabu yonso, mbikumbane bua tuetu kuamba ne: bitupa bikuabu bia mu Bible bidi bituambuluisha bua kumanya diumvuija dia disambila dia Tatu wetu.
“Tatu wetu udi mu diulu”
Mbikumbane bua tuetu kubikila Nzambi ne: “Tatu wetu” bualu yeye wakatufuka ne wakatupesha muoyo.—Yeshaya 64:8.
“Dîna diebe dijidibue”
Dîna dia Nzambi Yehowa, didi ne bua kutumbishibua; bantu badi ne bua kudimona ne: ndinsantu, anyi ndia tshijila. Bantu badi bajidila dîna dia Nzambi padibu bakula bua ngikadilu yende ne bamanyisha bakuabu malu adiye mulongolole.—Misambu 83:18; Yeshaya 6:3.
“Bukalenge buebe bulue”
Bukalenge bua Nzambi mmbulamatadi wa mu diulu udi Yezu muikale Mukalenge. Yezu wakatulongesha bua kusambila bua mbulamatadi au akokeshe pa buloba bujima.—Danyele 2:44; Buakabuluibua 11:15.
“Disua diebe dienzeke kabidi pa buloba muomumue ne mu diulu”
Anu mudiku kakuyi malu mabi anyi lufu mu diulu, disua dia Nzambi bua buloba ndia ne: bantu basombelapu bua kashidi mu ditalala ne mu bukubi.—Misambu 37:11, 29.
“Utupeshe lelu tshiakudia tshietu tshia dituku edi”
Mu tshikondo tshia Yezu, diampa divua tshiakudia tshinene. Tudi ne bua kuvuluka ne: tudi tueyemena Mufuki wetu bua atupeshe bintu bitudi nabi dijinga bua kuikala ne muoyo.—Bienzedi 17:24, 25.
“Utulekeele mabanza etu, bu mutudi petu balekeele badi ne etu mabanza”
Muaba eu muaku “mabanza” udi umvuija mpekatu. (Luka 11:4) Bantu bonso batu benza mpekatu ne batu dijinga ne: babafuile luse. Kadi tuetu basue bua Nzambi atubuikidile mpekatu yetu, tudi ne bua kuitaba bua kubuikidila bantu bakuabu bilema bidibu batuenzela.—Matayi 6:14, 15.
“Kutubueji mu ditetshibua, kadi utusungile kudi mubi”
Yehowa Nzambi katu ututeta bua tuenze malu mabi nansha. (Yakobo 1:13) Kadi “mubi,” Satana Diabolo udibu babikila kabidi ne: “Mutetshianganyi” ke utu ututeta. (1 Yone 5:19; Matayi 4:1-4) Tudi tulomba bua Yehowa atuambuluishe bua tuikale anu tumutumikila padibu batuteta bua kuenza malu mabi.
Kuambulula disambila dia Tatu wetu ke mushindu umuepele wa kusambila anyi?
Disambila dia Tatu wetu ndisambila dia tshilejilu divua Yezu mulongeshe. Ki ndia kuambulula muaku ku muaku to. Kumpala kua Yezu kulongesha disambila adi, wakadimuija bantu ne: “Panudi nusambila, kanuambuludi malu amue amue bu mutu bantu ba bisamba benza.” (Matayi 6:7) Musangu mukuabu pakafilaye tshilejilu tshikuabu tshia mushindu wa kusambila wakamba mêyi mashilangane.—Luka 11:2-4.
Mushindu muimpe wa kusambila ngua kuamba malu adi mu muoyo wetu ne muoyo mujima.—Misambu 62:8.
Mmushindu kayi utudi mua kusambila ?
Disambila dia Tatu wetu ntshilejilu tshimpe tshia mushindu utudi mua kusambila bua Nzambi atuteleje. Mona mudidi dipetangana ne mvese mikuabu idi yakula bua disambila.
Sambila anu Nzambi
Mvese: “Mu malu onso, ku diambuluisha dia disambila ne disengelela pamue ne disakidila, numanyishe Nzambi milombu yenu.”—Filipoyi 4:6.
Diumvuija: Tudi ne bua kutuma masambila etu anu kudi Nzambi, ki nkudi Yezu, Mariya, anyi bansantu to. Bu mudi disambila dia Tatu wetu dibanga ne mêyi a ne: “Tatu wetu,” bidi bitulongesha bua kusambila anu Yehowa Nzambi nkayende.
Sambila bua malu adi umvuangana ne disua dia Nzambi
Mvese: “Tshintu tshionso tshitudi tulomba bilondeshile disua diende, udi ututeleja.”—1 Yone 5:14.
Diumvuija: Tudi mua kusambila bua tshintu tshionso tshidi tshiumvuangana ne disua dia Nzambi. Yezu wakaleja mudi disua dia Nzambi ne mushinga pakabuejaye tshiambilu tshia ne: “disua diebe dienzeke ” mu disambila dia Tatu wetu. Tudi mua kumanya disua dia Nzambi bua buloba ne bantu patudi tulonga Bible.
Sambila bua majinga ebe
Mvese: “ Upuila Yehowa bujitu buebe, ne yeye neakuambuluishe.”—Misambu 55:22.
Diumvuija: Nzambi udi utabalela majinga etu. Anu muvua Yezu mubueje malu a bungi atudi mua kulomba mu disambila dia Tatu wetu, tudi mua kulomba Nzambi bua majinga etu a mubidi a ku dituku ne ku dituku, buludiki patudi tuangata mapangadika manene, diambuluisha patudi mu ntatu, ne bua atubuikidile mpekatu yetu.c
a Tshilejilu, Yezu ne bayidi bende bakenza masambila makuabu adi kaayi ambulula miaku ya muomumue idi mu disambila dia Tatu wetu.—Luka 23:34; Filipoyi 1:9.
b Mu imue Bible bu mudi Mukanda wa Mvidi Mukulu wa bena Mishonyi [MMV], disambila dia Tatu wetu ditu dijika ne mêyi a kutumbisha nawu Nzambi aa: “Bualu wewe ke udi ne bukalenga, bukole ne butumbi, kashidi tshiendelele. Amene.” Kadi mukanda mukuabu udi wamba ne: “Mêyi au kayena mu [mikanda mifunda ku bianza] ya bungi ya kueyemena ya kale to.”—The Jerome Biblical Commentary.
c Bantu badi bela meji ne: bidi bikengela Nzambi ababuikidile mibi yabu badi mua kudipisha bikole bua kusambila. Kadi Yehowa udi ubasengelela ne: “Luayi tululamijayi malu pankatshi petu.” (Yeshaya 1:18) Kakubenga muntu udi ukeba luse luende ne muoyo mujima to.