Bakanyisha mikanda yende bikole

Brooke nNtemu wa Yehowa udi musombele mu États-Unis. Mu tshikondo tshia korona, uvua ufundila bantu mikanda ya kubayisha nayi. Uvua ufunda mikanda ya bungi lumingu luonso. Kadi panyima pa tshidimu tshijima ne tshitupa, wakateketa mu mikolo. Katshia watuadija kufunda mikanda, anu muntu umuepele ke uvua mumuandamune; muntu au kumuambilaye ne: kamufundidi kabidi mikanda to. Brooke uvua udiebeja bivuaye wenza ni kabivua ne mushinga.

Kadi matuku ndambu pashishe, Kim Ntemu wa Yehowa utu wenza mudimu ku banke, wakalondela Brooke muyuki wende ne kiliya mukuabu. Kiliya au kumuambila muvuaye mupete mukanda mufunda kudi Ntemu wa Yehowa. Kim wakalua kumanya ne: mukanda au uvua umue wa ku mikanda ya Brooke. Lumingu luakalonda, kiliya au wakapingana ku banke. Pavuaye uyukila ne Kim, wakamuebeja muvuaye mua kubuela mu bisangilu bietu, bivua bienzekela tshikondo atshi ku biamu bia tuenda tumonangana.

Matuku makese pashishe, David Ntemu mukuabu, wakalondela Brooke bua muena mudimu wabu uvua mupete umue wa ku mikanda yende. Muena mudimu wabu au wakakema bikole bua mushindu uvuabu bafunde mukanda ku tshianza. Yeye kuamba ne: “Mbimpe bantu ba bungi bikale batabalela bakuabu mushindu eu!” David wakababidila mpunga au bua kumuambila malu makuabu a mu Bible; kumulayaye bua kumutumina mukanda, yeye kuitaba ne disanka.

Bantemu ba Yehowa mbafike ku dimona ne: kabatu bamanya dîba didi mamiinu adibu bakuna mu buambi atuadija kukola to. (Muambi 11:5, 6) Kadi tshivua tshifikile Brooke tshiakamuambuluisha bua kuanyisha kabidi mudimu wende wa diyisha bikole.​—1 Kolinto 3:6.