Wakakema bikole bua bipeta bivuaye mupatule

Mamu mukuabu udi udikoleshela muanende wa bakaji, diende Desicar, uvua musue kuvudija mudimu wende wa kuyisha; uvua musue kulua kabidi mpanda-njila wa pa tshibidilu. Mmusombele mu ditunga dia Vénézuéla, mudi lutatu lukole lua malu a mpetu. Nansha nanku, uvua mudisuike bua kutuadija bumpanda-njila, ke tshiakenzaye. Uvua ne disanka dia bungi mu mudimu au. Kadi katupa aka, tshipupu tshia korona tshiakatuadija.

Ku ntuadijilu kua tshipupu, bivua bikolele Desicar bua kuibidilangana ne mushindu mupiamupia wa kuyisha. Kufundilangana mikanda kuvua kumukolele. Bualu bukuabu, kavua mua kuyisha bantu mumonangane nabu mu biamu to, bualu Enternete udi mushinga mukole mu tshimenga tshiabu. Udi wamba ne: “Bivua bintekeshe mu mikolo. Nkavua nyisha anu butuku. Mvua ndiambila ne: tshiena mpanda-njila wa pa tshibidilu udi upatula bipeta bimpe to.”

Pashishe mu ngondo wa kumpala wa 2021, Betele wa Bantemu ba Yehowa wa mu ditunga dia Vénézuéla wakalongolola kampanye ka diyisha ka pa buaku. Bakalongolola malu bua bikale bapitshisha miyuki ya malu a mu Bible ku ndekelu kua lumingu luonso mu ngondo au ku tudiomba tutue ku 60 ne ku TV 7. Kukankamijabu Bantemu ba Yehowa bua kubikila bantu badi bitaba bulelela bua kuteleja miyuki ayi. Betele wakapesha kabidi bana betu nkonko ne mvese ya muyuki wonso ivuabu mua kufunda mu mikanda ne kutela pavuabu bayishila ku telefone. Bualu bukuabu, Betele wakabakankamija bua batuadije kuyisha ku diambuluisha dia mesaje. Mushindu wa kuyisha eu uvua mushindu mupiamupia kudi Bantemu ba bungi ba mu ditunga dia Vénézuéla.

Desicar uvua muindile bua kuyisha mu kampanye aku ne muoyo mujima. Nansha muvuaye kayi muanji kufundilangana mesaje bua kuyisha, wakadisuika bua kuanji kuteta. Kadi uvua dijinga ne diambuluisha. Udi wamba patoke ne: “Tshiena mumanye malu a biamu bimpe to.” Ke yeye kulomba muanende wa bakaji bua amulongeshe. Panyima pa malongesha makese patupu, Desicar ukavua mukumbane bua kuyisha mu kampanye.

Wakatumina bantu ba bungi bavuaye mumanye mesaje, ubabikila bua kuteleja miyuki ikavua mimana kukuata ku biamu. Wakakema bikole bua bipeta bivuaye mupatule. Ba bungi ba ku bantu abu bakateleja miyuki ayi, kuelabu kabidi nkonko. Bakuabu kabakayiteleja to, kadi bakebeja Desicar tshivuabu bambamu. Desicar udi wamba ne: “Ngakalongolola malu a mu miyuki ayi amvua mufunde, meme kubumvuijawu. Tshivua muanji kupinganyina bantu bapite pa 5 ku ngondo to, kadi ku ndekelu kua kampanye mvua mupinganyine bantu 112!”a

Desicar wakabikila kabidi muanabu wa bakaji udi kayi muena kuitabuja bua kuteleja miyuki ku tshisanji. Muanabu au mmusombele pabuipi nabu. Desicar udi wamba ne: “Biakankemesha bikole pavua muanetu au muitabe. Dia lumingu dionso mu dinda pa dîba dia 8 mvua nya kuende, tuteleja muyuki pamue. Uvua ne nkonko ya bungi, munkatshi mua ndongamu ne ku ndekelu kuende.” Muanabu wa bakaji eu wakalonda kabidi Tshivulukilu tshia lufu lua Yezu ku biamu bia bantu bamonangana, kuanyishilaye Desicar bua kuyisha ne Enternete wende.

Desicar udi wamba ne: “Ndi ngela Yehowa tuasakidila wa manza tente. Ndi ngela kabidi bakulu ba mu tshisumbu tshietu tuasakidila bualu mbankankamije bikole be! Mbangambuluishe bua kupetulula disanka dia kuyisha.” (Yelemiya 15:16) Desicar udi anu mpanda-njila wa pa tshibidilu, ne udi utungunuka ne kuyukila ne bantu bavua bitabe bulelela, bavuaye muyishe ku diambuluisha dia mesaje.