Mua kupita ne disama dia tshimpitshimpi

Disama dia tshimpitshimpi dikadi dikukuate anyi? Nanku ukadi mumvue mushindu utu disama dia tshimpitshimpi dishikijangana muoyo ne lungenyi, ne dibumbulangana mu malu a makuta. Ntshinyi tshidi mua kukuambuluisha dîba dia nanku? Mmushindu kayi uudi mua kuambuluishaku muena mu dîku dienu anyi mulunda webe udi utata ne disama? Nansha mudi Bible kayi mukanda wa malu a luondapu, udi ne ngenyi ya tshia kuenza idi mua kukuambuluisha bua kumanya mua kupita ne nsombelu mukole au bimpe bitambe.

Mibelu yakuambuluisha mu disama

Keba mua kuondopibua

Tshidi Bible wamba: “Bantu badi ne makanda a mubidi kabatu dijinga ne munganga to, kadi badi basama ke batu nende dijinga.”—Matayi 9:12.

Mu tshienzedi: Padibi bikengedibua, keba diambuluisha kudi baminganga bapiluke.

Tshia kuteta: Keba munganga udi mua kufila luondapu lutambe buimpe muaba unudi. Imue misangu, mbia meji pamuapa bua kukeba bua kumvua tshidi munganga mukuabu wamba pende. (Nsumuinu 14:15) Tokesha tshiluba tshiebe paudi wakula ne bamunganga, wikale mubumvue bimpe, ne bobu pabu bikale bamanye kantu konso kadi bu tshimanyinu tshia bubedi buebe. (Nsumuinu 15:22) Keba mua kumvua tshidi disama diebe, nansha mishindu yonso ya mua kudiondopa. Paudi umvua tshidi tshikengedibua bua disama diebe, neumanye mua kupita ne lutatu luebe alu bimpe kuyi ulubakana ne mua kudiangatshila mapangadika.
Ikala utabalela mubidi webe pa tshibidilu

Tshidi Bible wamba: “Manaya a kuibidija mubidi adi mimpe.”—1 Timote 4:8, Mukanda wa Mvidi Mukulu [wa Mishonyi].

Mu tshienzedi: Tshibidilu tshimpe tshia kuditabalelaku, bu mudi tshia kunyukulaku mubidi ne kalashishi (ngalasisa) misangu yonso, tshidi mua kukuambuluisha.

Tshia kuteta: Londa programe uwanemeka bimpe wa dibidija mubidi, usungule ndilu muakanyine, ne wikale ulala mêba bungi bukumbane. Nansha ukeba mua kunemekela mubidi bilondeshile disama diebe, bamanyi badi baleja ne: kudienzeja bua kuikala kuwutabalelaku mu malu au nekukuenzele bimpe bikole. Mmuomu, mbimpe anu kudimukila bionso biudi ujinga kuenza bua kabilu kukolesha kabidi disama diebe anyi kunyanga luondapu ludibu bakupesha.
Keba ba kukuambuluisha

Tshidi Bible wamba: “Mulunda mulelela udi uleja dinanga mu bikondo bionso ne yeye mmuanetu udi muledibue bua bikondo bia dikenga.”—Nsumuinu 17:17.

Mu tshienzedi: Balunda bebe badi mua kukuambuluisha bua kutantamena bikondo bikole.

Tshia kuteta: Yukila ne mulunda webe wa pa muoyo uutu weyemena uudi mua kuambila muonso muudi umvua bipepele. Abi bidi mua kukupeteshaku disulakana ku tunyinganyinga ne dilubakana bidi disama diebe dikebesha. Balunda ne ba mu dîku dienu badi mua kuikala bajinga kukuambuluisha kabidi, kadi kabayi pamuapa bamanye tshia kuenza to. Nanku, akula ubaleje patoke tshiudi umona ne: ntshidi nangananga mua kukuambuluisha. Kunekeshi mu biudi ubalomba to, kadi ikala ne dianyisha bua bionso bidibu bakuenzela. Misangu mikuabu, bidi mua kukulomba bua kuambila balunda badi bakunange mua kuya ne malu, bu mudi bua kukepesha misangu ya dilua kukumona ne dîba dia kukusombesha, bua kabalu kukutshiokesha tshianana.
Shala mukolakane

Tshidi Bible wamba: “Muoyo wa disanka udi buanga buimpe, kadi lungenyi ludi lushikile ludi lumana bukole bua muntu.”—Nsumuinu 17:22.

Mu tshienzedi: Kushala mukolakane muikale ne ditekemena kudi mua kukuambuluisha bua kubenga kulubakana ne kumanya mua kupita ne bubedi butu busamisha lungenyi.

Tshia kuteta: Paudi wenda wibidilangana ne lutatu luebe alu, nemenena ku biudi mua kuenza, kadi kunemenenyi ku biudi kuyi mua kukokesha to. Epuka didifuanyikija ne bakuabu anyi ne muuvua kumpala kua disama diebe. (Galatiya 6:4) Ditekela bipatshila biakanyine biudi mua kukumbaja, nanku nebikuambuluishe bua kushala mukankamane mutangile kumpala. (Nsumuinu 24:10) Enzela bakuabu biudi ukokesha mua kuenza. Nanku disanka diwapeta paudi wambuluisha bakuabu nedikuepule ku dishikila dia mu lungenyi.—Bienzedi 20:35.

Nzambi udi mua kukuambuluisha mu lutatu lua disama anyi?

Bible udi uleja ne: Yehowa Nzambia udi mua kuambuluisha muntu mu ntatu ya masama. Nansha mutudi katuyi mua kutekemena anu bua Nzambi kutuondopa mu tshishima, udi mua kuambuluisha badi bamutendelela ne malu adi alonda aa:

Ditalala. Yehowa udi mua kufila “ditalala dia Nzambi didi dipite dijingulula dionso dia malu.” (Filipoyi 4:6, 7) Ditalala adi, idi ditukijila dia mu muoyo, didi mua kuambuluisha muntu bua tunyinganyinga katumutshiubuidi panshi to. Badi Nzambi upesha ditalala dia nanku mbadi bamulombadi mu disambila ne bamuambila malu adi mabatonde abalubakaja.—1 Petelo 5:7.

Meji. Yehowa udi mua kupesha muntu meji a kuangata mapangadika a nsongo. (Yakobo 1:5) Muntu udi upeta meji a nanku padiye ulonga mêyi manene a katshia ne katshia adi mu Bible ne uatumikila.

Ditekemena dia matuku atshilualua didi dikolesha. Yehowa mmulaye matuku kumpala eku ikala ‘muntu nansha umue mu ditunga kayi wamba ne: “Ndi nsama.”’ (Yeshaya 33:24) Ditekemena edi ndiambuluishe ba bungi bua kushala bakolakane nansha mu masama mabiamabiale.—Yelemiya 29:11, 12.

a Yehowa ndîna dia Nzambi bu mudidi dileja mu Bible.—Misambu 83:18.

Mua kuambuluisha mulunda udi usama

Muteleja bimpe. Mushindu mutambe buimpe wa kuambuluisha mulunda webe padiye usama ngua kumuteleja padiye ujinga kuakula. Kuedi meji ne: wewe udi anu ne bua kuakula mu bualu buonso budiye wamba to. Misangu mivule, bitu bilomba anu kuteleja patupu. Dienzeja bua kuikala ne muoyo mule, kuyi ne lukasa anu lua kumubipisha to. Kuikadi ne lukasa lua kuamba ne: ukadi mumanye tshidi tshimutatshisha to, nangananga padiye kayi umueneka ku mêsu bu udi usama.—Nsumuinu 11:2.

Amba mêyi adi amukolesha. Pamuapa udi mua kupanga tshia kuamba, kadi kuambilaku mulunda webe nansha mêyi makese adi aleja ne: udi mumone mudiye ukenga bushuwa, kudi pamuapa mua kumukolesha kupita dishala mupuwe. Wewe kuyi mumanye miaku ya kuamba, teta kuamba nansha mêyi a muoyo mujima nansha mikale mapepele, bu mudi a ne: “Ndi mupange ne tshindi mua kukuambila, kadi meji anyi onso adi kuudi eku.” Epuka tshiakuidi bu mudi tshia ne: “Uvua anu ne tshia kusama” anyi ne: “Tshibi kuena u . . . .”

Udi mua kuleja muudi utabalela mulunda webe pa kukebaku mua kumanya tshidi disama didi dimutatshisha. Bumue neikale nebe dianyisha bua muudi uditatshisha bua kumvua tshidi disama diende, ne dîba adi mêyi ebe neikale ne bujitu kudiye. (Nsumuinu 18:13) Tshidibi, wadimuka bua kulu kubanga kufila mibelu idibu kabayi bakulombe.

Enza tshia kuenza bua kumuambuluisha. Pamutu pa kudiambila ne: udi mumanye muudi mua kumuambuluisha, muebeja akuleje tshia kuenza. Kadi pamuapa mulunda webe udi mua kubenga kuitaba ne: udi dijnga ne diambuluisha, anu bua kuepuka kuikala bujitu kudi bakuabu. Biobi nanku, teta kumuambila tshiudi usua kumuenzela, bu mudi kumuyila mu tshisalu, kumukombela kumbelu, anyi kumuenzela tumidimu tukuabu.—Galatiya 6:2.

Kumulekedi to. Mu dikengakana ne disama, mulunda webe udi pamuapa mua kushipa programe yenu nende anyi kubenga bua nuenu kuyikila nende. Ikala nende lutulu, umumvuile. Tungunuka wewe ne kufila diambuluisha didi dikengela.—Nsumuinu 18:24.