Mikenji ya tshidi tshimpe ne tshidi tshibi idi mu Bible itshidi ne mushinga lelu anyi?
Bantu ba bungi, too ne badi badiamba bena Kristo, badi bamba ne: mikenji ya bikadilu idi mu Bible idi itangila dibaka ne disangila dia mulume ne mukaji kayitshiena ne mushinga lelu to. Bimue bitendelelu mbishintulule malongesha abi a tshidi tshimpe ne tshidi tshibi bua apetangane ne nsombelu wa lelu. Nanku, mikenji ya tshidi tshimpe ne tshidi tshibi idi mu Bible itshidi ne mushinga lelu anyi? Eyowa. Mona tshitudi tuambidila nanku.
Bantu badi dijinga ne mikenji ya Nzambi ya tshidi tshimpe ne tshidi tshibi
Bantu mbafukibue bua bikale bakeba buludiki kudi Mufuki wabu. Bible udi wamba ne: “Muntu udi wenda eu kena ne bukokeshi bua kuludika nansha dikasa diende to.” (Yelemiya 10:23) Nansha mudi Yehowaa Nzambi mutufuke ne mushindu wa kudiangatshila mapangadika, ki mmutupeshe bukokeshi bua kudielela mikenji ya tshidi tshimpe ne tshidi tshibi to. Ke bualu kayi, udi utulomba bua tumueyemene.—Nsumuinu 3:5.
Mu Bible mudi mikenji ya Nzambi ya malu a bikadilu. Tumone malu abidi adi enza bua mikenji eyi ikale ne mushinga wa bungi lelu.
Nzambi ke wakatufuka. (Misambu 100:3) Bu mudi Yehowa Nzambi muikale Mufuki wetu, mmumanye tshidi tshikengela bua tuikale ne disanka ne tuikale bimpe ku mubidi nansha mu lungenyi. Mmumanye kabidi ntatu ituapeta tuetu babenge kutumikila mikenji idiye mutuelele ya malu a bikadilu. (Galatiya 6:7) Kupita apu, Yehowa mmusue bua tuikale ne nsombelu mutambe buimpe. Ke bualu kayi Bible udi wamba bua bualu buende ne: udi “Yeye udi ukulombola mu njila uudi ne bua kuendela.”—Yeshaya 48:17.
Muoyo wetu udi mua kutushima. Bantu ba bungi batu bamba ne: badi mua kumanya tshidi tshimpe ne tshidi tshibi bobu balonda tshidi muoyo wabu ubambila. Kadi Bible udi yeye wamba ne: “Muoyo udi udinga kupita tshintu tshikuabu kayi tshionso ne mmubi mutambe.” (Yelemiya 17:9) Meji a kudi Nzambi wowu kaayi alombola muoyo wetu, netuenze malu atufikisha ku didiela meji.—Nsumuinu 28:26; Muambi 10:2.
Balombodi ba bitendelelu badi ne bukenji bua kubenga tshidi Bible wamba bua tshidi tshimpe ne tshidi tshibi anyi?
Tòo! Bible udi ulongesha malu malelela adi atangila Nzambi ne a mudiye musue bua tuenze malu. (1 Kolinto 6:9-11; Galatiya 5:19-23) Mmusue bua bantu bafike ku dimanya malu au. (1 Timote 2:3, 4) Nanku, bena Kristo balelela badi ne bua kulongesha tshidi Dîyi dia Nzambi diamba.—Tito 1:7-9.
Bantu ba bungi badi kabayi basue kutumikila mikenji ya malu a bikadilu idi mu Bible, batu baya kukeba balombodi ba bitendelelu bikala mua “kubambila malu adibu basue kumvua.” (2 Timote 4:3, dimanyisha dia kuinshi) Nansha nanku, Dîyi dia Nzambi didi ditudimuija ne: “Diakabi dikale kudi badi bamba bualu buimpe ne: mbubi, bualu bubi ne: mbuimpe.” (Yeshaya 5:20) Bushuwa, Nzambi neanyoke balombodi ba bitendelelu badi kabayi balongesha bantu malu majalame adi Nzambi wamba ne: mmimpe anyi mabi.
Mikenji ya malu a bikadilu idi mu Bible idi itusaka ku dibenga bantu bonso badi bashilangane netu anyi?
Tòo. Bantu badi basue kusankisha Nzambi badi batumikila tshilejilu tshia Yezu ne malu avuaye mulongeshe. Uvua muambile bayidi bende bua kabalumbuluishi bakuabu to, kadi bua banange bantu bonso ne babanemeke.—Matayi 5:43, 44; 7:1.
Yezu uvua mulongeshe muyidi wende yonso bua atumikile mikenji ya Nzambi ya malu a bikadilu mu nsombelu wende. Nansha nanku, uvua mubalongeshe kabidi ne: bantu bakuabu badi mua kutumikila mikenji idi ibengangana ne yabu. (Matayi 10:14) Yezu kavua muanyishile bayidi bende bua kusaka bantu bakuabu ku ditumikila mikenji ya Nzambi to.—Yone 17:14, 16; 18:36.
Ngamue masanka kayi adi afuma ku ditumikila mikenji ya mu Bible ya bikadilu bilenga?
Bonso badi badienzeja bua kutumikila mikenji ya Nzambi ya tshidi tshimpe ne tshidi tshibi nebapete mabenesha a bungi lelu ne mu matuku atshivuavua. (Misambu 19:8, 11) Mona amue a kudiwu:
a Yehowa ke dîna dia Nzambi didi dileja mu Bible.—Misambu 83:18.