Bible udi mua kukuambuluisha bua kusuluka ku bupika bua bintu bia lulengu anyi?

Bantu miliyo mivule badi bafua tshidimu tshionso etshi bua dinua dia bintu bia lulengu anyi bua malu makuabu makebesha kudi bintu bia lulengu; mu bintu bia lulengu ebi mudi tumuma tua lulengu. Malu akanyanguka bikole menemene mu tshipupu tshia korona. Mibelu ya mu Bible mmiambuluishe bantu ba bungi bua kusuluka ku bupika bua bintu bia lulengu. Wewe ne lutatu elu, mibelu eyi idi mua kukuambuluisha pebe.a

Mu tshiena-bualu etshi

Bua tshinyi tudi ne bua kubala Bible bua kupeta mibelu idi mua kutuambuluisha bua kusuluka ku bupika bua bintu bia lulengu?

Bakebuludi badi bamba ne: bantu batu bakuatshika ku bupika bua bintu bia lulengu patubu bumvua bunkaya, dipampakana, kanyinganyinga, ne dibungama dikole. Bible udi mua kukuambuluisha bua kupeta ditabuja dikole bua wewe kutantamena malu adi mua kukufikisha ku dikuatshika ku bupika bua bintu bia lulengu. Udi ukuleja tshia kuenza bua kudia bulunda bukole ne Nzambi. (Musambu 25:14) Yeye mukuambuluishe, udi mua kutshimuna malu auvua kuyi mua kutshimuna wewe nkayebe.—Mâko 11:22-24.

Malu 4 a mu Bible a kuenza bua kusuluka ku bupika bua bintu bia lulengu

1. Longa bua kumanya Yehowa Nzambi.b (Yone 17:3) Yeye ke Mufuki ne udi ne bukole budi kabuyi mikalu. Kupita bionso, yeye udi Tatu webe wa dinanga. Mmusue kuikala mulunda webe wa pa muoyo; mmusue kuenza malu ne bukole buende bua kukuambuluisha. (Yeshaya 40:29-31; Yakobo 4:8) Mmulaye bua kukuenzela malu mimpe a dikema kumpala eku, wewe musungule bua kupeta mabenesha adiye ufila bua mudiye munange bantu.—Yelemiya 29:11; Yone 3:16.
2. Lomba Yehowa diambuluisha. Sambila, umulombe bua akuambuluishe bua kusuluka ku bupika bua bintu bia lulengu bua wikale ‘wa tshijla ne muanyishibue kudiye.’ (Lomo 12:1) Neakuambuluishe ne nyuma wende muimpe anyi bukole buenzeji bua upete “bukole budi bupite bua pa tshibidilu.” (2 Kolinto 4:7; Luka 11:13) Bukole abu nebukuambuluishe bua kulekela bintu bia lulengu ne kuvuala “bumuntu bupiabupia” budi bupetangana ne disua diende.—Kolosayi 3:9, 10.
3. Uwuja lungenyi luebe ne meji a Nzambi. (Yeshaya 55:9) Neakuambuluishe bua ‘kuvuijibua mupiamupia mu ngelelu wa meji udi ulombola meji ebe,’ anyi bua kushintulula mushindu uudi wela meji. Dîba adi nebikuambuluishe bua kusuluka ku bupika bua bintu bia lulengu. (Efeso 4:23) Meji a Nzambi adi mu Bible, ke bualu kayi mbia mushinga bua wewe kubala Bible dituku dionso. (Musambu 1:1-3) Bible mmuambuluishe bantu ba bungi bavuabu balongeshe bua kumvua malu adimu. (Bienzedi 8:30, 31) Bantemu ba Yehowa batu balomba bantu bua kulonga nabu Bible benda bayukila kabayi bafutshisha makuta to. Tudi tukubikila kabidi bua kulua mu bisangilu bietu, mututu tulonga malu a mu Bible ne mushindu utudi mua kutumikila malongesha a mu Bible mu nsombelu wetu.
4. Sungula balunda bimpe. Balunda bebe badi mua kukuambuluisha bua kusuluka ku bupika bua bintu bia lulengu anyi kubenga kusulukaku. (Nsumuinu 13:20) Nzambi utu ufila balunda bimpe munkatshi mua bantu badi bamutendelela; mmusue bua bulunda buebe nabu bukuambuluishe. (Musambu 119:63; Lomo 1:12) Ikala usungula mishindu mimpe ya kujikija lutetuku bualu bantu baudi umona mu bindidimbi, badi bimba misambu iudi uteleja, peshi ubala malu abu, badi anu bu badi bapitshisha nebe dîba pamue. Epuka tshintu tshionso tshidi mua kutekesha dipangadika diebe dia kuenza malu adi makane.—Musambu 101:3; Amosa 5:14.

Mvese ya mu Bible idi mua kukuambuluisha bua kusuluka ku bupika bua bintu bia lulengu

Misambu 27:10: “Nansha biandekelabu kudi tatuanyi ne mamuanyi, Yehowa yeye neangakidile kuende.”

“Tshivua mumanye tatuanyi mundedi to, bualu ebu buakamfikisha ku didimona ne: mvua mujimine. Kadi pangakamanya ne: Yehowa Nzambi mmuntu mulelela udi munnange bikole menemene, ngakamona ne: muoyo wanyi udi ne mushinga ne ngakasuluka ku bupika bua bintu bia lulengu.”—Wilby, wa mu Haïti.

Misambu 50:15: “Umbile mu tshikondo tshia dikenga. Nenkusungile.”

“Misangu ya bungi mvese eu uvua unkankamija bua kutungunuka ne kudienzeja bua kusuluka ku bupika bua bintu bia lulengu, nansha mumvua tshiyi nkokesha misangu mikuabu to. Yehowa wakakumbaja mulayi wende.”—Serhiy, wa mu Ukraine.

Nsumuinu 3:5, 6: “Eyemena Yehowa ne muoyo webe wonso, kueyemenyi dijingulula diebe dia malu. Umumanye mu njila yebe yonso, ne yeye nealulamije njila yebe.”

“Mvese eyi yakangambuluisha bua kubenga kudieyemena, kadi kueyemena Yehowa. Wakampesha bukole, meme kushintulula nsombelu wanyi mujima.”—Michele, wa mu Italie.

Yeshaya 41:10: “Kutshinyi to, bualu ndi nebe. Kupampakanyi to, bualu ndi Nzambi webe. Nenkukoleshe, eyowa, nenkuambuluishe, nenkukuate bushuwa ne tshianza tshianyi tshia balume tshia buakane.”

“Mvua nkenga ne muoyo wa munda bikole pamvua tshiyi mudinyange ne bintu bia lulengu. Mvese eu wakanjadikila ne: Nzambi neangambuluishe bua kulekela dipampakana; ke tshivuaye muenze.”—Andy, wa mu Afrique du Sud

1 Kolinto 15:33, dimanyisha dia kuinshi kua dibeji: “Kabanupambuishi to. Malunda mabi adi anyanga bikadilu bimpe.”

“Balunda babi bakandongesha bintu bia lulengu, meme kulua mupika wabi. Ngakafika ku dilekela bintu bia lulengu anu pangakalekela balunda babi ne kudia bulunda ne bantu bimpe bavua ne nsombelu umvua nganyisha.”—Isaac, wa mu Kenya.

2 Kolinto 7:1: “Tudilengeje ku dinyanguka dionso dia mubidi ne dia nyuma.”

“Mêyi aa akangambuluisha bua kutungunuka ne kudienzeja bua kuikala ne makanda a mubidi mimpe, kulekela bintu bia lulengu ne malu avua anyanga mubidi wanyi.”—Rosa, wa mu Colombie.

Filipoyi 4:13: “Bua malu onso ndi ne bukole ku diambuluisha dia yeye udi umpesha bukole.”

“Mvua mumanye ne: tshivua mua kukokesha bua kulekela bintu bia lulengu meme nkayanyi to, ke bualu kayi ngakasambila bua Nzambi angambuluishe. Wakampesha bukole bumvua nkengela.”—Patrizia, wa mu Italie.

Muvua Bible muambuluishe bamue bantu bua kusuluka ku bupika bua bintu bia lulengu.

Joseph Ehrenbogen uvua mukolele muaba uvua bantu ne tshikisu; wakalua mupika wa maluvu makole, wa makanya, wa diamba, ne wa bintu bikuabu bidi bikuata. Misangu ya bungi wakamba kufua bua dinua dibi dia bintu bia lulengu. Mvese umue wa mu Bible wakamujadikila ne: uvua ne mushindu wa kushintuluka. Bua kumanya tshivua tshimuambuluishe, bala tshiena-bualu tshia “Ngakalonga bua kunemeka bantu bakaji ne meme muine.”

Dmitry Korshunov wakatata misangu ya bungi bua kusuluka ku bupika bua maluvu makole. Bua kumanya tshivua tshimuambuluishe, tangila filme wa ‘Nsombelu au ukavua muntonde.’

Bible mmukandike dikeba dia diambuluisha kudi munganga bua kulekela dinua bintu bia lulengu anyi?

Tòo. Bible udi wamba ne: “Bantu badi ne makanda a mubidi kabatu dijinga ne munganga to, kadi badi basama ke batu nende dijinga.” (Matayi 9:12) Bia muomumue, tshibambalu tshidi tshitangila dinua dia bintu bia lulengu tshia mu États-Unis tshidi tshiamba ne: “Bupika bua dinua bintu bia lulengu ndisama dibi menemene. Bua kusuluka ku bupika abu, bidi bilomba kudienzeja bikole kupita kuikala patupu ne dijinga dia kubilekela.” (l’Institut américain pour la prévention de la toxicomanie) Mushindu udi Nzambi mua kutuambuluisha bua kulekela dinua bintu abi mmupite tshitudi tuetu mua kuenza kule ne kule. Kadi bantu ba bungi badi Bible muambuluishe bua kusuluka ku bupika bua bintu bia lulengu bavua kabidi bapete diambuluisha dia kudi baminganga.c Tshilejilu, tatu mukuabu diende Allen udi wamba ne: “Pangakatuadija kulekela kunua maluvu makole, mubidi wanyi uvua usamakana bikole. Dîba adi ke dingakamona ne: mvua dijinga ne diambuluisha dia munganga nansha mukavua Bible ungambuluisha.”

Bible utu ukandika dinua bintu bia lulengu anyi manga adi akuata patudi tusama anyi?

Tòo. Kudi misangu idi Bible wakula bua kunua maluvu makole bua kuondopa disama peshi bua kupetesha muntu udi wamba kufua disulakana. (Nsumuinu 31:6; 1 Timote 5:23) Nansha nanku, maluvu makole ne manga atu akuata atubu bafila bua kupetesha mubidi disulukana bidi mua kukuata muntu ku bupika bubi. Ke bualu kayi, mbimpe kuikala ne budimu bua bungi paudi unua bintu bia lulengu anyi manga adi akuata adibu bakufundila bua kupetesha mubidi disulukana.—Nsumuinu 22:3.

a Nansha mudi tshiena-bualu etshi tshiakula bua disuluka ku bupika bua bintu bia lulengu, mêyi manene adimu adi mua kuambuluisha bantu bua kumbuka ku bupika bua bintu bu mudi dinua dia maluvu makole, dinua dia makanya, budiavi, manaya a makuta, dimona bintu bidi bijulangana masandi, peshi bupika bua kuya mu miaba ya dipetelangana ku Enternete.

b Yehowa ndîna menemene dia Nzambi. (Musambu 83:18) Bala tshiena-bualu tshia “Yehowa nnganyi?”

c Miaba ya bungi ya luondapu, mpitadi, ne programe ya diambuluisha bantu bua kulekela dinua dia bintu bia lulengu idi mua kupesha bantu diambuluisha. Muntu yonso udi ne bua kukonkonona miaba ayi ne kusungula luondapu ludiye mumone ne: ndutambe buimpe.—Nsumuinu 14:15.