Ditendelela dia mpingu: Ntshinyi tshidi Bible wamba?

Bilondeshile bulongolodi kampanda bua difila dia ngumu bua bena Katolike, mu misa ivuabu bafukishe mu nzubu wa Mvidi-Mukulu wa Saint-Pierre mu dia 25/3/2022, pape François wakimana kumpala kua lupingu lua Mariya “mubuite ku mêsu mutu muinyike panshi usambila munda munda.” Uvua “ulomba Mariya” bua afile ditalala. (Catholic News Service) Mu luapolo lukuabu bakaleja kabidi ne: “Pape uvua musambidile bantu ba buloba bujima mubalombele Muoyo Mariya Muwule Ntente ne Bulengele, ushiya nangananga bena mu Russie ne mu Ukraine mu bianza biende.”​—Vatican News.

Wewe udi pebe wela meji kayi? Mbiakane bua kusambila mpingu miteka kumpala anyi kuyitendelela anyi? Tangila mvese ya mu Bible idi ilonda eyi:

• “Kuena ne bua kudienzela lupingu lusonga anyi tshimfuanyi tshia tshintu kayi tshionso tshidi muulu mu diulu anyi panshi pa buloba anyi mu mâyi muinshi mua buloba. Kuena ne bua kubinamina anyi kabakusaki bua kubitendelela, bualu meme Yehowa Nzambi webe ndi Nzambi udi ulomba bua bandamate anu meme.”​—Ekesode 20:4, 5.a

• “Mpingu yabu nya tshiamu tshia arjan ne tshia or, mudimu wa bianza bia bantu. Idi ne mukana, kadi kayena mua kuakula; idi ne mêsu, kadi kayena mua kumona; idi ne matshi, kadi kayena mua kumvua; idi ne diulu, kadi kayena mua kununkila; idi ne bianza, kadi kayena mua kulenga; idi ne makasa, kadi kayena mua kuenda; kayena ipatula dîyi mu diminu diayi to. Bantu badi bayenza nebalue anu bu yoyi, ke muikala kabidi bonso badi bayeyemena.”​—Misambu 115:4-8.

• “Meme ndi Yehowa. Adi ndîna dianyi; tshiena ngabanyangana butumbi buanyi ne muntu mukuabu, anyi kutumbishibua kuanyi kudi mpingu misonga.”​—Yeshaya 42:8, dimanyisha.

• “Nyemayi ditendelela dia mpingu.”​—1 Kolinto 10:14.

• “Nudilame ku mpingu.”​—1 Yone 5:21.

Bua kumanya malu makuabu a tshidi Bible wamba bua ditendelela ne mpingu, bala tshiena-bualu tshia “D’après la Bible: Les images religieuses” anyi tangila filme wa Nzambi utu wanyisha dimutendelela ne mpingu anyi?

Pamuapa malu adi Bible wamba bua biena-bualu bidi bilonda ebi adi mua kukusankisha kabidi bikole:

• “Mariya virgo​—Ntshinyi tshidi Bible wamba bua bualu buende?”

• “Devrait-on prier la Vierge Marie?”

• “Miracles et apparitions​—Des manifestations divines?”

• “Ditalala nedibuele pa buloba mushindu kayi?”

Dianyisha bua foto: Vincenzo Pinto/​AFP via Getty Images