Minanga mipite bukole—Ntshinyi tshidi Bible wamba?

“Tshidimu etshi, mu Chine muvua ‘muvu mupite bukole’ wa luya. Mmusangu muisatu udi muvu wa luya lukole nunku muenzekamu.”—The Guardian, mu dia 7/9/2022.
“Tshidimu etshi tshidi tshienza bidimu bitanu bilondangane bidi minanga mipite bukole yenzeka mu matunga a bungi a mu Afrike wa ku est.”—UN News, mu dia 26/8/2022.
“Munanga mukole mmufuane kuenzeka mu matunga mapite pa tshia bibidi tshia matunga onso a ku Mputu, pamuapa newikale munanga mupite bukole bua bidimu 500 bikadi bipite.”—BBC News, mu dia 23/8/2022.

Bamanyi bapiluke ba bungi badi baleja ne: minanga ya mushindu eu neitungunuke anu ne kuenzeka, ibipa ne kubipa. Tudiku mua kutekemena ne: minanga neijike anyi? Bible udi wamba tshinyi?

Tshidi mêyi a buprofete adi mu Bible amba bua minanga

Bible ukavua muambe bua matuku etu aa ne:

“Biyole bia nzala . . . nebienzeke ku muaba ne ku muaba.”—Luka 21:11.

Minanga itu ipita kukebesha biyole bia nzala. Biyole bia nzala ebi, ne makenga ne lufu bidibi bikebesha, bidi bikumbaja malu akavua Bible muambe.—Buakabuluibua 6:6, 8.

Mona bua tshinyi minanga idi yenda ibipa

Bible udi uleja bualu bunene budi buenza bua minanga ibipe. Udi wamba ne:

“Muntu udi wenda eu kena ne bukokeshi bua kuludika nansha dikasa diende to.”—Yelemiya 10:23.

Mvese eu udi umvuija ne: bantu kabena mua “kuludika dikasa [diabu]” bimpe, tuambe ne: kudilombola to. Mapangadika mabi atubu bangata atu apita kukebesha minanga ne dikepela dia mâyi.

Bamanyi ba bungi ba bia panu badi bamba ne: malu adi bantu benza adi akebesha dibanda dibi dia luya pa buloba bujima, ke bualu kayi minanga idi yenzeka bikole.
Lukuka ne dibenga kulepesha meji dia bantu didi dibafikisha ku dibutula mêtu, ku dinyanga kapepe, ne ku dinyanga mabanji a mu buloba. Bua bualu ebu, mâyi a kazeze mmakepe.

Kadi Bible udi utupetesha ditekemena.

Tudiku mua kutekemena ne: minanga neijike anyi?

Bible udi ulaya ne: Nzambi neajikije tshilumbu tshia dikola dia mâyi tshidiku etshi. Neatshijikije mushindu kayi?

1. Nzambi ‘neanyangakaje badi banyangakaja buloba.’ (Buakabuluibua 11:18) Neumbushe tshimue tshia ku bintu bidi bienza bua mâyi apangike mu bantu, tuambe ne: bantu babi bena lukuka badi benza malu adi anyanga muaba utudi basombele.—2 Timote 3:1, 2.
2. “Buloba budi buosha kudi munya nebulue dijiba didi ne malenge.” (Yeshaya 35:1, 6, 7) Nzambi neajikije malu mabi onso adi minanga mikebeshe ne neavuije buloba mparadizu muikala mâyi a bungi.
3. “Udi utabalela buloba, ubumeneshisha bintu bipite bungi ne ubuvuija bubanji bikole.” (Misambu 65:9) Pabenesha Nzambi buloba, nebupatule biakudia bimpe bia bungi ne nepikale mâyi mimpe a kazeze.