Kunaya ndundu wa buloba bujima kudi bushuwa mua kulela buobumue anyi?—Ntshinyi tshidi Bible wamba?

Badi batshinka ne: bantu miliyare 5 nebamone ndundu wa buloba bujima udibu banaya kutuadijila mu dia 20/11 too ne mu dia 18/12/2022. Ba bungi badi bela meji ne: manaya a nanku adi ambuluisha bikole badi baamona ne adi enza bua bikale mu buobumue.

• “Manaya adi ne bukole bua kushintulula buloba. Adi ne bukole bua kukankamija bakuabu. Adi ne bukole bua kulela buobumue mu mushindu wa dikema.”—Nelson Mandela, mfumu wa kale wa ditunga dia Afrique du Sud.

• “Ndundu . . . udi ulela buobumue bualu udi wenza bua bantu “banangangane, bikale ne ditekemena, disanka, bikale ne dijinga dia kuenza tshintu tshimue, ne bikale ne tshintu tshidi tshibateka mu buobumue .”—Gianni Infantino, mulombodi wa FIFA.a

Kunaya ndundu wa buloba bujima anyi manaya makuabu kudi mua kukumbaja bipatshila bilenga abi anyi? Kudiku ditekemena dia bantu basomba mu ditalala ne mu buobumue anyi?

Kudi bushuwa kulela buobumue anyi?

Tshidimu etshi, ndundu wa buloba bujima mmufikishe bantu ku diela meji bikole kupita kumumona patupu. Manaya mmafikishe bantu ku diyukila malu a mu nsombelu wa bantu ne a tshididi too ne adi atangila manême a bantu, kansungansunga ka makoba, ne dishilangana mu malu a mpetu.

Nansha nanku, ba bungi mbamone ne: kumona manaya a buloba bujima bu mudi ndundu wa buloba bujima kudi kubasankisha bikole. Bantu badi bajinga ne muoyo mujima bua manaya aa alele buobumue, kadi kaena mua kulela buobumue bua kashidi to. Atu atamba kukebesha malu adi atapulula bantu akavua Bible muambe ne: avua ne bua kuleja tshikondo tshidibu babikila ne: “matuku a ku nshikidilu.”—2 Timote 3:1-5.

Ditekemena dilelela didi dilela buobumue bua buloba bujima

Bible udi ne ditekemena dilelela didi dilela buobumue bua buloba bujima. Udi ulaya ne: pa buloba bantu bonso nebikale mu buobumue mu bukokeshi bua mbulamatadi wa mu diulu udibu babikila ne: “Bukalenge bua Nzambi.”—Luka 4:43; Matayi 6:10.

Yezu Kristo Mukalenge wa Bukalenge abu, neenze bua kuikale ditalala pa buloba bujima. Bible udi wamba ne:

• “Muntu muakane neatante, ne ditalala nedivulangane.”—Misambu 72:7.

• “Neasungile bapele badi badila balomba diambuluisha . . . Neabasungile ku dikengeshibua ne ku tshikisu.”—Misambu 72:12, 14.

Nansha lelu, malongesha a Yezu akadi menze bua bantu miliyo ne miliyo ba mu matunga 239 bikale mu buobumue. Mbalonge mua kulekela lukuna. Bua kumanya malu makuabu, bala biena-bualu bidi mu tshiena-bualu tshia “Mua kuimanyika lukuna.”