**Kunaya manaya a bukua matunga kudi bushuwa mua kulela buobumue anyi?—Ntshinyi tshidi Bible wamba?**

Mu manaya a bukua matunga a mu muvu wa luya a tshidimu tshia 2024, bantu batue ku miliyare 5 nebamone banayi ba mu matunga 206 mu manaya au. Thomas Bach, mulombodi wa komite wa manaya a bukua matunga wakamba ne: “Tudi bena mu tshitupa tshia manaya atu asangisha bantu mu buobumue ne mu ditalala pa buloba. Tusekelelayi lungenyi ludi nalu manaya aa lua ne: bantu bonso bikale mu ditalala ne buobumue, nansha mutudi ba miaba mishilashilangane.”

Manaya a bukua matunga adiku mua kukumbaja bipatshila bia mushinga ebi anyi? Tudiku mua kutekemena bua kuikala mu ditalala ne buobumue anyi?

Manaya aa neafilaku ditalala ne buobumue anyi?

Manaya a bukua matunga a tshidimu etshi ki mmimanyine anu pa manaya nkayawu to. Mbakulamu bikole bua malu a tshididi ne a nsombelu wa bantu atu atapululangana. Kudi kabidi bualu bua manema a bantu, kansungansunga ka makoba, ka bitendelelu, ne ka malu makuabu.

Manaya a buloba bujima bu mudi a bukua matunga atu ambuluisha bantu bua kupita kapepe. Nansha nanku, manaya aa atu kabidi akebesha ngenyi ne bienzedi bidi bitapululangana pamutu pa kufikisha bantu ku ditalala ne buobumue bilelela.

Bible ukavua mudianjile kumanyisha ne: nebikolele bantu bua kuenza malu adi mua kukebesha buobumue matuku etu aa. (2 Timote 3:1-5) Bua kumanya malu a bungi adi atangila dîyi dia buprofete dia mu Bible edi, bala tshiena-bualu tshia “La Bible a-t-elle prédit la mentalité et la conduite des gens de notre époque?”

Ditekemena dilelela bua ditalala ne buobumue pa buloba

Bible udi ne ditekemena dilelela bua ditalala ne buobumue bia buloba bujima. Udi ulaya ne: bantu bonso ba pa buloba nebikale mu buobumue mu bukokeshi bua mbulamatadi wa mu diulu udiye ubikila ne: “Bukalenge bua Nzambi.”—Luka 4:43; Matayi 6:10.

Yezu Kristo, Mukalenge wa Bukalenge ebu, neafile ditalala pa buloba bujima. Bible udi wamba ne:

“Muntu muakane neatante, ne ditalala nedivulangane.”—Misambu 72:7.
“Neasungile bapele badi badila balomba diambuluisha . . . Neabasungile ku dikengeshibua ne ku tshikisu.”—Misambu 72:12, 14.

Nansha lelu, malongesha a Yezu mmasangishe bantu miliyo ya bungi ba mu matunga 239. Bu mudi Bantemu ba Yehowa ba pa buloba bujima bena Kristo, mbalonge bua kuikala bena ditalala. Bua kumanya mudibu benza nanku, bala Tshibumba tshia Nsentedi tshidi ne tshiena-bualu tshia ne: “Mua kuimanyika lukuna.”