Kudiku mbulamatadi mushindame udi mua kukokesha buloba bujima anyi? Ntshinyi tshidi Bible wamba?

Mbulamatadi yonso ya pa buloba idi isama. Nansha idi mu matunga adi amueneka bu ne: akadi masombeshe malu bimpe, idi itata payi bua malu mabi adi enzekamu, bua bimvundu bidi bienzeka padi mfumu udi upatuka ku masungula mupite udi mumulondele anu ku bantu bakese patupu, bua dibenga kupetangana dia bisumbu bia tshididi ne bua ndululu.

Bible udi uleja ne: kudi mbulamatadi anu umuepele udi mushindame. Ukadi pamuapa mumvue bakula bua mbulamatadi au. Yeye au ke uvua Yezu Kristo muakuile mu disambila dia tshilejilu.

• “Nunku, nudi ne bua kusambila mushindu eu: ‘Tatu wetu udi mu diulu, dîna diebe dijidibue. Bukalenge buebe bulue. Disua diebe dienzeke kabidi pa buloba muomumue ne mu diulu.’”​—Matayi 6:9, 10.

Ntshinyi tshidi Bible wamba bua Bukalenge abu?

Bukalenge: mbulamatadi mushindame

Bukalenge abu budi bukokesha mu diulu.

• Yezu wakabikila mbulamatadi au ne: “Bukalenge bua mu diulu.” (Matayi 4:17; 5:3, 10, 19, 20) Ke bualu kayi wakamba ne: “Bukalenge buanyi ki mbua pa buloba ebu to.”​—Yone 18:36.

Bukalenge abu nebupingane pa muaba wa mbulamatadi ya bana ba bantu.

• Bible udi wamba ne: “Bukalenge ebu . . . nebuzaze makalenge [a bana ba bantu] aa onso ne nebuatuishe ku ndekelu, ne buobu nkayabu nebushalaku kashidi.”​—Danyele 2:44.

Bu mudi Yezu Kristo muikale Mukalenge wa Bukalenge abu, kabuakubutudibua to.

• Bible udi wamba ne: “Bukokeshi buende mbukokeshi bua tshiendelele buikala kabuyi mua kupita, ne bukalenge buende kabuakubutudibua to.”​—Danyele 7:13, 14.

Bukalenge abu nebutuadile bantu ditalala ne bukubi pa buloba.

• Bible udi wamba ne: ‘Muntu yonso neasombe mu ditalala muinshi mua muonji wende wa tumuma tua mvinyo ne muinshi mua mutshi wende wa mfigi, ne muntu kakubatshinyisha.’​—Mika 4:4, Bible du Semeur.

Longa malu makuabu adi atangila Bukalenge abu

Pavua Yezu pa buloba, wakadifila ne muoyo mujima bua “kuyisha lumu luimpe lua Bukalenge.” (Matayi 9:35) Wakalaya kabidi ne:

• “Nebayishe lumu luimpe elu lua Bukalenge pa buloba bujima budi bantu basombele bua luikale bujadiki kudi bisamba bionso, ne pashishe, nshikidilu nealue.”​—Matayi 24:14.

Lelu, badi bayisha lumu luimpe lua Bukalenge mu matunga mapite pa 240. Tudi tukulomba bua kulonga malu makuabu adi atangila Bukalenge ebu ne malu mimpe adibu mua kukupetesha.

Tangila filme wa Bukalenge bua Nzambi ntshinyi?