Bamanyi ba malu a kale batuku bitaba ne: Yezu uvuaku anyi?

Kudi malu a bungi adi afikisha bafundi ba malu a kale ku ditaba ne: Yezu uvuaku. Mukanda kampanda wa tshibungu udi wamba bua malu avua bafundi ba malu a kale ba mu bidimu nkama ibidi bia kumpala bakule bua Yezu ne bua bena Kristo ba kumpala ne: “Malu avua bafundi abu bafunde adi ajadika ne: kale, nansha baluishi ba buena Kristo kabavua belesha mpata ya malu a muvua Yezu muikalaku to, kadi mpata ayi mmilue kubanga bua musangu wa kumpala ku ndekelu kua bidimu bia 1700 too ne ku mbangilu kua bidimu bia 1900, kayiyi nansha ne bualu bua nsongo budi mua kuyibingisha to.”​—Encyclopædia Britannica wa mu 2002.

Mu tshidimu tshia 2006, mukanda mukuabu wakamba ne: “Lelu eu, kakuena mumanyi wa malu a kale nansha umue udi welesha mpata ne: kakuvua muena Yuda uvua ne dîna dia Yezu muana wa Jozefe nansha. Bantu ba bungi badi bamba ne: mpindieu tukadi bamanye malu a bungi a bivuaye muenze ne a malongesha ende manene.”​—Jesus and Archaeology.

Bible udi utela Yezu bu muntu mulelela, bualu udi utela ne mêna a bankambua bende ne a ba mu dîku diabu. (Matayi 1:1; 13:55) Udi kabidi wakula bua bakokeshi bamanyike ba mu tshikondo tshivua Yezu pa buloba. (Luka 3:1, 2) Malu onso aa mmambuluishe bakebuludi bua kujingulula bujalame bua malu adi mu Bible.