Misambu 46:10​—‘Imanayi talalaa, numanye ne: meme ndi Nzambi’

“Lekelayi ne manyayi ne: meme ndi Nzambi. Nentumbishibue munkatshi mua bisamba; Nentumbishibue pa buloba.”​—Misambu 46:10, Nkundimuinu wa bulongolodi bupiabupia.

‘Imanayi talalaa, numanye bienu ne: meme ndi Nzambi. Nentumbishibue munkatshi mua bisamba bia bantu, nentumbishibue pa buloba.’​—Misambu 46:10, Mukanda wa Nzambi.

Diumvuija dia Misambu 46:10

Nzambi udi ukankamija muntu yonso bua kumutendelela ne kuitaba bukenji buende bua kukokesha buloba. Katuena mua kuelesha bukole buende ne bukokeshi buende mpata to; bantu bonso badi basue kupeta muoyo wa kashidi badi ne bua kuitaba bualu abu.​—Buakabuluibua 4:11.

“Lekelayi ne manyayi ne: meme ndi Nzambi.” Nkudimuinu mikuabu ya Bible idi ikudimuna tshitupa tshia kumpala etshi ne: ‘imanayi talalaa.’ Bua bualu abu, bantu ba bungi badi bela meji ne: mvese au ndîyi dituma bua kuikala ne kanemu mu bitanda anyi kushala bapuwamu. Kadi tshiambilu tshia mu tshiena Ebelu tshidibu bakudimune ne: “lekelayi ne manyayi ne: meme ndi Nzambi” ndikankamija didi Yehowaa nkayende ukankamija nadi bena mu bisamba bionso, ubalomba bua kabamuluishi, bitabe ne: anu yeye ke udi mukumbane bua tuetu kutendelela.

Tudi tupeta dikankamija dia muomumue mu Musambu 2. Mu musambu au, Nzambi mmulaye bua kunyoka badi bamuluisha. Kadi bantu badi bitaba bukokeshi buende, badi bamueyemena bua abalombole, abapeshe bukole, ne meji. Bu mudibu “banyemena kudiye,” badi ne disanka ne badi mu bukubi nangananga padibu mu ntatu.​—Misambu 2:9-12.

“Nentumbishibue munkatshi mua bisamba; Nentumbishibue pa buloba.” Mu bikondo bia kale, Yehowa Nzambi wakatumbishibua pakakubaye bantu bende ne bukole buende bua bungi. (Ekesode 15:1-3) Mu matuku adi alua, neatumbishibue bikole menemene pakokela bantu bonso bukokeshi buende pa buloba ne pamutendelelabu.​—Misambu 86:9, 10; Yeshaya 2:11.

Malu adi Misambu 46:10 wakuila 

Mukanda kampanda udi wamba bua Misambu 46 ne: “Mmusambu udi utumbishisha bukole bua Nzambi, musungidi munene wa bantu bende.” Pavua batendeledi ba Nzambi bimba Musambu wa 46, bavua baleja muvuabu batuishibue ne: Nzambi uvua ne bukole bua kubakuba anyi kubambuluisha. (Misambu 46, 1, 2) Mêyi a musambu au avua abavuluija ne: Yehowa uvua nabu misangu yonso.​—Misambu 46:7, 11.

Bua bobu kukolesha dishindika diabu dia ne: Yehowa uvua ne bukole bua kubalama, musambu au uvua ubasaka bua kuvuluka malu a kukema avuaye muenze. (Misambu 46:8) Tshilejilu, mêyi a musambu au adi aleja mudi Yehowa ne bukole bua kujikija mvita. (Misambu 46:9) Mu mushindu kampanda, Yehowa wakajikija mvita mu bikondo bia kale pavuaye mukube bantu bende ku bianza bia bisamba bivua bibaluishe. Kadi Bible mmulaye ne: mu matuku makese emu, Nzambi neenze nanku mu mushindu mualabale pajikijaye mvita pa buloba bujima.​—Yeshaya 2:4.

Yehowa utu wambuluisha kabidi batendeledi bende lelu anyi? Eyowa. Mupostolo Paulo wakakankamija bena Kristo ne muoyo mujima bua kueyemena Yehowa bua abambuluishe. (Ebelu 13:6) Mêyi a Misambu 46 adi akolesha dishindika dietu dia ne: Nzambi udi ne bukole bua kutukuba. Adi atuambuluisha bua kumona Nzambi bu “tshinyemenu tshietu ne bukole buetu.”​—Misambu 46:1.

Tangila filme muîpi eu bua kumona kadiosha ka mukanda wa Misambu.