Kolosayi 3:23—“Mudimu wenu nansha wowo muikale wa bishi, nuwenze ne mutshima wenu mujima”

“Malu onso anudi nuenza, nuenze ne anyima wenu yonso bu badi baenzela Yehowa, kanuyi bu badi baenzela bantu.”​—Kolosayi 3:23, Nkudimuinu wa bulongolodi bupiabupia.

“Mudimu wenu nansha wowo muikale wa bishi, nuwenze ne mutshima wenu mujima, bu badi bawenzela Mfumu, kadi kembu badi bawenzela bantu to.”​—Kolosayi 3:23, Muanda Mulenga Lelu.

Diumvuija dia Kolosayi 3:23

Muena Kristo udi ne bua kudienzeja bua kuikala muena mudimu wa dilambu bualu mushindu udiye umona mudimu udi wenda pamue ne mudiye utendelela Yehowa Nzambi.

“Malu onso anudi nuenza.” Bantu badi basue kutendelela Yehowa badi badienzeja bua kulonda tshidi Bible wamba mu malu onso adibu benza. Badi badienzeja bua kuikala benji ba mudimu, bena bululame, ne bantu ba kueyemena mu malu onso adibu benza ku mbelu, ku mudimu, ne mu kalasa.​—Nsumuinu 11:13; Lomo 12:11; Ebelu 13:18.

“Nuenze ne muoyo wenu mujima.” Tshiambilu tshia ne: “ne muoyo wenu mujima” ntshifumine ku tshiambilu tshia mu tshiena Greke tshidi “tshiumvuija dipangadika didi muntu wangata bua kuenza disua dia Nzambi ne bukole buende buonso.”a

Nunku muena mudimu wa nanku, udi wenza malu ne mamanya ende onso bua kuenza muende muonso padiye wenza mudimu. Bible mikuabu idi ikudimuna tshiambilu etshi ne: “mitshima yenu” (Mukanda wa Nzambi) anyi “muoyo mujima” (Mukanda wa Mvidi Mukulu [Katolike]).​—Tangila “Kolosayi 3:23 mu nkudimuinu mikuabu.”

“Bu badi baenzela Yehowa, kanuyi bu badi baenzela bantu.” Bena Kristo batu bangata mudimu wonso udibu benza ne mushinga nansha wowu wa mushindu kayi bualu mbamanye ne: mushindu udibu bamona mudimu au udi utangila kabidi bulunda buabu ne Yehowa Nzambi. Badi baditatshisha bikole bua kumusankisha pamutu pa kusankisha mfumu wa mudimu anyi muntu mukuabu. Muena Kristo yeye wenza mudimu bikole ne muikale ne mmuenenu muimpe wa malu, bantu nebakule bimpe buende yeye ne bua Nzambi udiye utendelela. Mushindu au ke mudi muena Kristo wenza muende muonso ‘bua dîna dia Nzambi kadipendibu nansha kakese.’​—1 Timote 6:1; Kolosayi 3:22.

Malu adi Kolosayi 3:23 wakuila

Mupostolo Paulo ke uvua mufunde mukanda wa Kolosayi. Uvua muwufundile bena Kristo ba mu tshimenga tshia Kolosayi wa kale.b Bidi bimueneka ne: uvua mufunde mukanda au lua ku ndekelu kua diedibua diende mu buloko bua musangu wa kumpala mu Lomo, bu mu 60-61 P.Y.

Mukanda wa Kolosayi udi ne mibelu idi yambuluisha bena Kristo ba miaba yonso ne nsombelu yonso bua kutendelela Yehowa mu buobumue. (Kolosayi 3:11) Udi ubakankamija bua kuidikija ngikadilu ya Nzambi bu mudi dinanga, bulenga, ne luse. (Kolosayi 3:12-14) Udi umvuija kabidi mudi ntendelelu wa Nzambi ne bua kushintulula bibadi bionso bia nsombelu wa muntu.​—Kolosayi 3:18–4:1.

Kolosayi 3:23 mu nkudimuinu mikuabu

“Malu onso anudi nuenza, nuenze ne mitshima yenu bu munudi nuenzela Mukelenge; kembu munudi nuenzela bantu.”​—Mukanda wa Nzambi.

“Nansha mudimu kayi unudi nuenza, nuwenze ne muoyo mujima, bu badi benzela Mfumu, kabuyi bua bantu to.”​—Mukanda wa Mvidi Mukulu (Katolike).

“Mudimu wenu nansha wowo muikale wa bishi, nuwenze ne mutshima wenu mujima, bu badi bawenzela Mfumu, kadi kembu badi bawenzela bantu to.”​—Muanda Mulenga Lelu.

“Nansha mudimu kaayi unudi nawu, nuwenze ne muoyi mujima, bualu nudi nuwenzela Mfumu, kanuena nuwenzela bantu to.”​—Mukanda wa Mvidi Mukulu (Mishonyi).

Tangila filme muîpi eu bua kumona kadiosha ka mukanda wa Kolosayi.