Yeshaya 26:3​—‘Neupeshe badi ne meji adi kaayi mua kunyungishibua ditalala didi kadiyi dijika’

“Neukube badi bakueyemena ne muoyo mujima; neubapeshe ditalala didi kadiyi dijika, bualu badi bakueyemena wewe.”​—Yeshaya 26:3, Nkudimuinu wa bulongolodi bupiabupia.

“Wewe udi ulama muntu udi ne mutshima wandi mujalame bua yeye ikale ne ditalala dia tshishiki, bualu bua yeye udi ukueyemena.”​—Yeshaya 26:3, Mukanda wa Nzambi.

Diumvuija dia Yeshaya 26:3

Muprofete Yeshaya wakaleja mu mêyi adi akolesha aa ne: Nzambi neakube badi bamueyemena ne muoyo mujima. Udi wenza nanku padiye ubambuluisha bua bikale mu bukubi ne mu ditalala.

“Neukube badi bakueyemena ne muoyo mujima.” Katupa ka mvese aka kadi kakula bua badi badisuike ne muoyo mujima bua kueyemena Yehowaa Nzambi bikondo bionso. Badi beyemena Nzambi mbamanye ne: bidi bikengela batekemene anu kudiye. Tshilejilu, kabena beyemena meji abu padibu bangata mapangadika manene to. Kadi badi beyemena meji a Nzambi mu bionso bidibu benza. (Nsumuinu 3:5, 6) Badi balonga mua kumanya mutu Nzambi umona bualu kampanda padibu babala Bible Dîyi diende bimpe, belangana kabidi meji bikole a bidibu babala. (Misambu 1:2; 119:15) Padibu bapeta ntatu badi basambila ne muoyo mujima bua Yehowa abambuluishe. (Misambu 37:5; 55:22) Padibu benza nanku, badi baleja ne: mbeyemene Nzambi, yeye pende udi ubapesha ditalala.

“Neubapeshe ditalala didi kadiyi dijika.” Mu tshiena Ebelu tshia ntuadijilu, muaku udibu bakudimune ne: “ditalala” mbawushindike misangu ibidi; nanku bua kuleja dishindika adi badi mua kukudimuna tshiambilu atshi ne: “ditalala didi kadiyi dijika,” “ditalala dia tshishiki,” anyi “ditalala dia kashidi.” Mu mêyi makuabu, badi beyemena Yehowa ne muoyo mujima badi bumvua ditalala, mmumue ne: ditalala dia mu muoyo didi kadiyi difumina ku nsombelu udibu nende to. Ditalala adi didi difumina ku bulunda bushême budibu badie ne Yehowa, ne ku didienzeja bua kuenza malu adi amusankisha.​—Nsumuinu 3:32; Yeshaya 48:18.

“Ditalala didi kadiyi dijika” adi kadiena dileja ne: Nzambi utu wepula batendeledi bende ku ntatu yonso bua kabikadi ne tunyinganyinga to. (1 Samuele 1:6, 7; Yobo 6:1, 2; Misambu 31:9) Kadi utu ubambuluisha bua kunanukila mu ntatu. (Yeshaya 41:10, 13) Utu wandamuna msambila abu, ubapesha meji, bukole, anyi ubasamba. (Misambu 94:19; Nsumuinu 2:6; Yeshaya 40:29) Ke bualu kayi, batu bashala batukije nansha mu ntatu mikole.​—Filipoyi 4:6, 7.

Malu adi Yeshaya 26:3 wakuila

Muprofete Yeshaya uvua ne muoyo mu bidimu bia 700 K.Y. Tshikondo atshi ne mu bidimu biakalonda, bena Yuda ba bungi kabavua batendelela Yehowa Nzambi ne lulamatu to. Nunku Yehowa wakalua kuanyisha bua babutule Yelushalema tshimenga tshiabu tshikulu mu tshidimu tshia 607 K.Y.

Bidimu nkama ya bungi kumpala kua kabutu aku, Yeshaya wakafunda musambu wa kutumbisha nawu Yehowa uvua ne mêyi a buprofete udi mu nshapita wa 26. (Yeshaya 26:1-6) Musambu au uvua umvuija pamuapa tshikondo tshivuabu ne bua kulua kujadikulula kabidi tshimenga mu buloba bua Yuda, tuambe ne: Yelushalema.

Bakajadikulula kabidi Yelushalema panyima pa tshidimu tshia 537 K.Y. Diakamue pakamujadikululabu, bena Yuda ba lulamatu bakapinganamu bakadimona mu bukubi bamba ne: “Tudi ne tshimenga tshikole.” (Yeshaya 26:1) Kadi ki mbimanu bikolesha bia tshimenga bivua bitshivuija tshikole to. Yehowa ke uvua ubenesha tshimenga, utshilama bua tshikale mu bukubi.​—Yeshaya 26:2.

Ke mudibi kabidi lelu. Bantu badi beyemena Yehowa ne muoyo mujima badi badi badimona mu bukubi bualu badi bamumona bu “Dibue,” anyi tshinyemenu tshiabu.​—Yeshaya 26:4.

Tangila filme muîpi eu bua kumona kadiosha ka mukanda wa Yeshaya.