Tukebayi mua kumanya njila au

UTU UDIMONA NE DISANKA ANYI? Biobi nanku, tshitu tshikupeshadi ntshinyi? Ndîku diebe peshi dienu anyi? Mmudimu webe anyi? Peshi ntshitendelelu tshienu? Pamuapa udi muindile ne muoyo kuulu kuulu tshintu tshidi mua kukupetesha disanka bu mudi: kujikija kalasa, kupeta mudimu muimpe, anyi kusumba mashinyi.

Bantu ba bungi batu bapetaku disanka padibu bakumbaja bualu buvuabu bipatshila anyi bapeta tshivuabu bakeba. Kadi disanka dia nunku ditu dienza matuku anga? Misangu ya bungi ditu anu dia tshitupa tshîpi, pamuapa tudiumvua bedibue mâyi ku makasa.

Batu bamba bua disanka ne: nnsombelu wa dikala bimpe wa matuku a bungi udi ubanga ne disanka patupu ne bintu bitudi nabi utufikisha ku disanka dia bungi menemene dia kuikala ne muoyo ne dijinga dia ku tshifukilu dia ne: disanka edi dikala anu ditungunuka.

Kabidi, bu mudi disanka dikale nsombelu wa dikala bimpe udi utungunuka, badi badiumvuija ne: nduendu lutudi tuenza, ki mmuaba utudi tuya anyi bualu butudi tuipatshila to. Mu bulelela, kuamba ne: “Nengikale ne disanka pangikala . . .” nkuladikija malu bua kuikala ne disanka.

Bua kumvua bualu ebu bimpe, tufuanyikije disanka ne makanda a mubidi. Bua kuikala ne makanda a mubidi bidi bilomba tshinyi? Mbimpe kulonda mibelu idi itangila ndilu, dibidija mubidi, ne dikala ne bibidilu bimpe. Bia mmuomumue, disanka didi difumina ku dilonda amue malu, kuenza malu adi umvuangana ne mêyi manene a kueyemena.

Mmêyi manene kayi anyi nnsombelu kayi bidi mua kutupetesha disanka? Nansha mudi bimue ne mushinga wa bungi kupita bikuabu, bidi bilonda ebi ke bidi bitamba kuambuluisha:

• KUSANKA NE BITUDI NABI NE KUIKALA NE MUOYO WA TSHIPAPAYI

• MAKANDA A MUBIDI NE KUITABA NSOMBELU UTUDI NENDE

• DINANGA

• DIFUILANGANA LUSE

• KUIKALA NE TSHIPATSHILA MU NSOMBELU

• DITEKEMENA

Mukanda kampanda wa meji udibu banemeka bikole udi wamba ne: “Ba diakalenga mbadi kabayi mua kubandibua mu njila wabu.” (Misambu 119:1) Tuakulayi mpindieu bua njila au.