Nkuepi kudi diakalenga dilelela mua kupetshibua?

BANTU bavule batu bela meji ne: diakalenga didi mua kupetshibua pa kuikala ne bintu bivule bia ku mubidi. Bidi munyi buebe wewe? Nansha mudi bintu bia ku mubidi mua kuambuluisha bushuwa ku diakalenga dietu, kabiena bidijadika; nansha bilenga bia ku mubidi kabiena biibaka ditabuja peshi bikumbaja makengedibua a mu nyuma.

Mu Muyuki wende wa pa Mukuna, Yezu Kristo wakamba ne: “Ba diakalenga ng’aba badi bamanye dikengela diabu dia mu nyuma, bualu bukalenge bua mu diulu mbuabu.” (Matayo 5:3, NW) Yezu wakamba kabidi ne: “Nuepuke lukuka luonso lua biuma, bualu muntu, nansha yeye muikale ne biuma bia bungi, muoyo wende kabena baulama kudi bintu biende to.”​—Lukase 12:15, MMM.

Bavule badi bakeba diakalenga pa kuditua mu diangatangana dikena dilonda mikenji ne makuabu “malu mabi adi mubidi wenza.” (Galatia 5:19-21) Kadi, dikokela masanka a mubidi kadiena dituala diakalenga dilelela ne dia mutantshi mule nansha. Bushuwa, aba badi benza bintu bia nunku kabakupiana Bukalenge bua Nzambi.​—1 Kolinto 6:9, 10.

Bakuabu badi balua bena budisu mu dikeba diabu dia diakalenga pa kuteta bua kudikebela lumu luabu nkayabu. Nzubu ya dilamina mikanda ne ya diyipanyishila mmiuuja tente ne mikanda ya malu a diambuluisha dilubuluka dia muntu pa nkayende, kadi mikanda bu nunku ki mmituadile bantu diakalenga dia mutantshi mule nansha. Nenku, nkuepi kutudi mua kupeta diakalenga dilelela?

Bua kuikala bushuwa ne diakalenga, tudi ne bua kumanya dikengela dietu dia mu nyuma dia tshileledi. Yezu wakamba ne: “Ba diakalenga ng’aba badi bamanye dikengela diabu dia mu nyuma.” Bushuwa, kabiena mua kutusankisha bituikala mua kujingulula patupu dikengela edi ne pashishe tupangila bua kuenza bualu kampanda pa bidi biditangila. Tshilejilu: Ntshinyi tshivua mua kufikila munyemi wa lubilu kampanda udi panyima pa lubilu mupangile bua kuandamuna ku dijinga dikole dia mubidi dia mâyi? Kakupetakanaku mu katupa kîpi ne dijika dia mâyi mu mubidi ne bimue bipeta bibi anyi? Bia muomumue, bituapangila kuandamuna ku dikengela dietu dia biakudia bia mu nyuma, ndekelu wa bionso netume mu nyuma. Ebi nebifikishe ku dijimija dia disanka ne diakalenga.

Yezu wakitaba tshishiki dikengela diende dia mu nyuma, pa kulonga pa tshibidilu ne kueleela meji pa Dîyi dia Nzambi. Uvua ukeba ne upeta, ne ubala bipepele bitupa bia Mifundu Minsantu, ne wakalongesha bakuabu bua kuenza bia muomumue. (Luka 4:16-21; fuanyikija ne Efeso 4:20, 21.) Yezu wakafuanyikija kabidi dienza dia disua dia Tatuende wa mu diulu ne biakudia. Dienza disua dia Nzambi diakamutuadila diakalenga divule.​—Yone 4:34.

Eyowa, diakalenga dilelela kadiena mua kupeteka pa kukeba bintu bia ku mubidi; diakalenga kadiena nansha difumina ku dikumbajila mubidi wa mpekatu majinga nansha. Diakalenga dilelela didi ngikadilu wa mutshima, mushindamene pa ditabuja dilelela ne malanda mimpe ne Yehowa Nzambi. Nenku, mu mushindu muakanyine, mufundi wa misambu Davidi wakimba ne: “Ba diakalenga mbantu badi ne Nzambi wabu muikale Yehowa.”​—Musambu 144:15b, NW.

[Tshimfuanyi mu dibeji 23]

Ditabuja ne malanda mimpe ne Nzambi nebikutuadile diakalenga dilelela