Tshiudi mua kutekemena

Nansha mudi bamue bamanyi bamba mudi malu adi aleja kanyinganyinga alondangana, muntu yonso utu uleja kanyinganyinga wende mushindu. Mishindu mishilashilangane idi bantu baleja kanyinganyinga idiku ileja ne: bamue batu banyingalala kakese padibu bafuisha anyi “badikanda” bua kuleja mudibu bumvua anyi? Kabitu anu nanku to. Nansha mudi kuleja kanyinganyinga patoke mua kusulakaja muntu, kakutu “mushindu muimpe” umue utubu bakaleja to. Bidi mua kutamba kulondeshila bilele bia muaba udi muntu mukolele, mutuye yeye muine, malu akadi mamufikile, ne mudi muntu udiye mufuishe mufue.

NEBIYE TOO NE KUEPI?

Bantu badi bafuishe badi mua kupanga bua kumanya tshia kutekemena panyima pa lufu lua wabu udi mufue. Kadi kudi amue malu ne imue ntatu bitu bitamba kufikilangana ne kudi mushindu wa kuikala kubidimukila. Tubikonkonone.

Kanyinganyinga kakupitshila mutu. Udi mua kudila, kujinga mufue, ne katantshi udiumvua bimpe, katantshi udiumvua bibi. Malu audi umuvulukila ne audi ulota bidi mua kukolesha kanyinganyinga aku. Kadi bangabanga, udi mua kuanji kupapuka, kuyi witaba tshidi tshienzeke to. Tiina udi uvuluka tshivua tshimuenzekele pavua bayende Timo mufue lufu lua tshikoso. Udi wamba ne: “Lungenyi luvua luanji kunjimina. Tshivua nansha mua kudila to. Biakampitshila mpanga ne mua kupuyakana imue misangu. Tshivua mua kuitaba tshivua tshienzeke to.”

Bantu batu kabidi imue misangu bapampakana, bumvua biji, ne badipisha. Ivan udi wamba ne: “Meme ne mukajanyi Yolanda tuvua ne biji bia dikema tshikondo kampanda tuetu bamane kufuisha Eric muanetu wa balume wa bidimu 24. Biakatukemesha, bualu katutu banji kudimona bu bantu bena biji to. Tuvua kabidi tudipisha, bualu tuvua tudiebeja bikalaku kuvua malu atuvua katuyi benze bua kuambuluisha muanetu.” Alejandro uvua mufuishe mukajende uvua ne disama dia munanunanu uvua udipisha pende. Udi wamba ne: “Kumpala mvua mmona ne: bikala Nzambi undekela nkenga bibi nunku, ndi ne bua kuikala muntu mubi. Pashishe ngakabanga kudipisha bualu bivua bienza anu bu ne: mvua ngela Nzambi tshilumbu pambidi bua tshivua tshienzeke.” Kostas utukadi batele mu tshiena-bualu tshishale udi wamba pende ne: “Kuvua misangu imvua mfikila too ne Sophia munda bua difua diende. Pashishe ngakabanga kudipisha bua biji abi. Nansha tuamba eku, tuela eku, katshivua tshilema tshiende to.”

Dipanga kuteka meji kaba kamue. Kudi mua kuikala bimue bikondo bidi meji a muntu kaatshiyi kaba kamue anyi wamba malu kaayi alondangana. Tshilejilu, muntu udi mufuishe udi mua kuela meji ne: udi umvua dîyi dia mufue au, umvua bu ne: udiku, anyi umumona. Anyi bidi mua kumukolela bua kushala mutume meji ku bualu kampanda anyi kuvuluka amue malu. Tiina udi wamba ne: “Imue misangu mvua mua kuikala nyukila ne muntu, kadi ndimona meji akadi maye kua tshianana! Avua enda alalakana, aya ku malu avua menzeke dîba divua Timo mufue. Dipanga kuteka meji kaba kamue adi divua dintonda padi.”

Dijinga dia kuikala nkaya. Muntu udi mufuishe udi mua kubanga kumvua biji anyi kudiumvua bibi padiye ne bantu bakuabu. Kostas udi wamba ne: “Pamvua munkatshi mua bantu bavua baselangane, mvua ndiumvua anu bu ndundu wa panyima pa mashinyi. Mvua ndiumvua kabidi nanku pamvua ne bajike.” Yolanda, mukaji wa Ivan udi uvuluka wamba pende ne: “Bivua binkolela bua kusomba ne bantu bavua badilakana bua ntatu ivua imueneka ya mukodi pa kuyifuanyikija ne yetu! Kadi kuvua kabidi bavua batuanyishila malu mimpe avua bana babu benza. Mvua nsanka nabu, kadi eku bintonda bua kubateleja. Meme ne bayanyi tuakamona ne: tuvua ne bua kutungunuka ne kuya kumpala, kadi katuvua ne dijinga anyi ne lutulu lua kuenza nanku to.”

Mubidi utatshisha. Dipanga kudia kua nsongo, tshinyanu, ne dipanga tulu bitu bifikilalanga kabidi. Aaron udi uvuluka tshidimu tshiakalonda lufu lua tatuende wamba ne: “Tshitshivua kabidi ndala bimpe to. Butuku buonso mvua ntabuluka mêba a muomumue ngela meji a lufu lua tatu.”

Alejandro udi uvuluka muvuaye ne masama avua kaayi umvuika wamba ne: “Misangu ya bungi mvua nya ku buanga kadi bangambila ne: tshivua nsama to. Ngakamona ne: kanyinganyinga ke kavua kakebesha bimvua ngumvua abi.” Kadi bivuaye umvua abi biakalua kujika. Nansha nanku, Alejandro uvua muenze bimpe bua kuya ku buanga. Kanyinganyinga kadi mua kutekesha bukole bua mubidi bua kuluisha masama, kukolesha akadi nawu muntu, anyi mene kukebesha makuabu.

Lutatu lua kuenza amue malu a mushinga. Ivan udi uvuluka wamba ne: “Pavua Eric mufue, bivua bikengela tumanyishe balela ne balunda, kabidi ne bantu bakuabu bu mudi mfumuende wa mudimu ne tatuende wa lupangu. Kuvua kabidi mabeji a bungi a kuwuja. Bivua bitulomba kabidi kutangila bintu bia Eric bua kumona tshia kuenza nabi. Bionso ebi bivua bitulomba kuikala ne meji kaba kamue, kadi petu batshioke mu lungenyi, ku mubidi, eku meji asama.”

Kadi bua bamue bantu, lutatu lua menemene lutu lulua pashishe, padibi bikengela benze malu avuabu benza kumpala kudi udi mufue au. Ke tshivua tshifikile Tiina. Udi wamba ne: “Timo ke uvua utuyila ku banke ne wenza midimu mikuabu ya makuta. Mpindieu bikavua mudimu wanyi bintentekela anu bujitu ku bunkadi nabu. Mvua mua kubikumbaja bionso bimpe kakuyi bualu anyi?”

Ntatu itudi batele kuulu eyi idi ileja mudibi bikole menemene bua kupita ne kanyinganyinga. Bulelela budi ne: kanyinganyinga ka difuisha muntu katu kakole, kadi kudianjila kumanya bualu ebu kudi mua kuambuluisha batshidi bafuishilaku bua kumanya mua kupita naku. Tshia kumanya kabidi ntshia ne: ki mmuntu yonso utu upeta ntatu yonso idi kanyinganyinga mua kakebesha to. Bualu bukuabu, bantu badi bafuishe badi mua kukola ku muoyo bobu bamanye ne: bidibu bumvua bua kanyinganyinga bitu bienzekela bantu bonso, ke mutu malu.

NEMPETULULAKU KABIDI DISANKA ANYI?

Tshiudi mua kutekemena: Kanyinganyinga nansha koku kakole kakatu kashala bua kashidi to; katu kalua anu kukepa. Kabiena bisua kumvuija ne: kadi “kajika” konso anyi ne: muntu udi upua udiye mufuishe muoyo to. Kadi ku kakese ku kakese, bidiye umvua bua kanyinganyinga aku bidi bienda bituya. Udi mua kubiumvua kabidi anu padi malu adi amuvuluija mufue au amuluila mu lungenyi anyi mu bikondo kampanda bu mudi bia mifikilu. Kadi bantu ba bungi batu balua kudituija ne batuadija kuenza kabidi malu abu a buatshia buila. Bitu bitamba kuenzeka nunku padi bena mu dîku anyi balunda bambuluisha udi mufuishe ne padiye wenza malu makumbanyine bua kumanya mua kupita naku bimpe.

Nekashale too ne dîba kayi? Kudi bantu batu bumvua kanyinganyinga kakole anu ngondo mikese tshianana. Bua ba bungi, kadi mua kuenza tshidimu tshimue anyi bibidi kumpala kua bobu kudimona bakadi bimpe. Kadi bua bakuabu bobu, katu kanenga bikole.a Alejandro udi uvuluka wamba ne: “Ngakenza bidimu bitue ku bisatu ne kanyinganyinga kakole.”

Ikala ne lutulu. Kujingi bua kuenza malu onso musangu umue to, ikala wenza tshiudi mua kukokesha, ne manya ne: biudi umvua bua kanyinganyinga abi kabiakushala kashidi to. Nansha nanku, kudiku malu audi mua kuenza bua kukepesha kanyinganyinga mpindieu ne adi mene mua kukupangisha bua kushadi ne kanyinganyinga ka munenganenga ka tshianana anyi?