Nsombelu wa mu dîku ne balunda
Bitu bikolela bantu ba bungi bua kushala mu malanda makole ne bakuabu. Tumone amue mêyi manene a mu Bible adi mua kukuambuluisha bua kuikala mu malanda mimpe ne bakuabu.
KUIKADI UTANGILA ANU MALU EBE NKAYEBE
DÎYI DINENE DIA MU BIBLE: ‘Kanutangidi anu malu enu nkayenu, kadi nutangile kabidi malu a bakuabu.’—Filipoyi 2:4.
TSHIDIDI DIUMVUIJA: Netuikale mu malanda mimpe ne bakuabu patudi tuimanyina pa tshitudi mua kubenzela pamutu pa tshidibu mua kutuenzela tuetu. Wewe utangila anu malu ebe nkayebe, malanda ebe ne bakuabu adi mua kunyanguka. Tshilejilu, muena dibaka udi wimanyina anu pa majinga ende nkayende, udi mua kulua kupanga lulamatu kudi muena dibaka nende. Bualu bukuabu, kakuena muntu utu musue kudia bulunda ne muntu utu anu uditumbisha bua bintu bidiye nabi anyi bua mamanya ende to. Bua bualu abu mukanda mukuabu wa matuku etu aa udi wamba ne: “Bantu badi batangila anu abu malu kabayi bavuluka bakuabu, badi bapeta ntatu ya bungi.”
TSHIUDI MUA KUENZA:
Ambuluisha bakuabu. Padi bantu beyemenangana ne bikale pabuipi bua kuambuluishangana, bulunda buabu budi bukola. Amue makebulula adi aleja ne: bantu batu bambuluisha bakuabu kabatu batamba kupeta tunyinganyinga to, kadi bitu bibafikisha ku didiumvua ne mushinga wa bungi.
Diteka pa muaba wa bakuabu. Batu bumvuija ne: kuditeka pa muaba wa bakuabu nkumvua lutatu lua muntu mu muoyo webe. Wewe uditeka pa muaba wa bakuabu, kuakubamba pamuapa mêyi mabi a nsenda nansha mu bilele adi misangu ya bungi mua kubatapa ku muoyo to.
Paudi uditeka pa muaba wa bakuabu udi kabidi ulua muntu udi ulekelela makuabu malu. Nunku kuditeka pa muaba wa bakuabu kudi mua kukuambuluisha bua kubenga kubamona mu mushindu mubi ne nekukuambuluishe kabidi bua kudia bulunda ne bantu ba miaba ne ba bibidilu bishilangane.
Ikala usomba ne bantu. Wewe utamba kusomba ne bakuabu, neufike ku dibamanya bimpe. Wewe musue kupeta mulunda muimpe bidi bikengela wikale uyukila nende bualu budiye nabu ku muoyo anyi budi ne mushinga kudiye. Nunku ikala uteleja. Leja muudi uditatshisha bua malu adi atonda mulunda webe. Makebulula menza matuku adi panshi aa adi aleja ne: “Kuyukila ne muntu bua malu adiye nawu ku muoyo kudi mua kumupa disanka dia menemene.”
SUNGULA BALUNDA NE MEJI
DÎYI DINENE DIA MU BIBLE: “Malunda mabi adi anyanga bibidilu bimpe.”—1 Kolinto 15:33, dimanyisha.
TSHIDIDI DIUMVUIJA: Bantu baudi usomba nabu badi mua kukufikisha ku dienza malu mimpe anyi mabi. Bantu badi balonga malu a bikadilu bia bantu badi bamba ne: balunda ba muntu badi mua kumuambuluisha anyi kumunyanga mu nsombelu mishilashilangane. Tshilejilu, badi bamba ne: wewe usomba ne banu ba makanya anyi bantu batu bashipa mabaka abu, udi anu mua kutuadija kunua pebe makanya anyi kujinga bua kushipa diebe dibaka.
TSHIUDI MUA KUENZA: Diaku bulunda ne bantu badi ne ngikadilu ne bikadilu biudi wanyisha anyi musue kuikala nabi. Tshilejilu, ikala usomba ne bantu badi kabayi bambangana mêyi adi atapa, badi banemekangana, badi ne muoyo wa kupa, ne badi bakididi ba benyi.
MÊYI MANENE MAKUABU A MU BIBLE
Tangila filme ya malu a mu Bible idi mienza bua kuambuluisha bena mu mabaka, bansonga, ne bana bua kulengeja nsombelu wa mu dîku
EPUKA NGAKUILU UDI UTAPA.
“Mêyi mamba kaayi melela meji adi bu kutapa kua muele wa mvita.”—NSUMUINU 12:18.
IKALA NE MUOYO WA KUPA.
“Muntu muena tshipapayi neatante.”—NSUMUINU 11:25.
ENZELA BAKUABU MALU MUUDI MUSUE BUA BAKUENZELE.
“Malu onso anudi basue bua bantu banuenzele, nudi ne bua kubenzelawu penu.”—MATAYI 7:12.