Keba bua kumanya malu mudiwu

Muaba udi bualu

Dielelangana meji mabi ditu ditamba kufumina ku dipanga kumanya malu mudiwu. Tuangate bilejilu ebi:

Bamue bamfumu ba midimu bavua bela meji ne: bantu bakaji kabena mua kukokesha kuenza midimu bu mudi ya malu a sianse anyi a biamu to.
Ku Mputu, munkatshi mua bidimu bia 500 P.Y. too ne bia 1500 P.Y., bakasuikila bena Yuda tshilumbu ne: mbalunge biina bia mâyi ne mbatampakaje disama. Mu bukokeshi bua bena Nazi, bakashiminyina kabidi bena Yuda malu. Kadi tshikondo atshi bavua babasuikile tshilumbu ne: bobu ke bavua bakebesha lutatu lua malu a mpetu mu Allemagne. Malu onso au akenza bua bikale benzela bena Yuda malu ne kansungansunga ka bungi, ke mudibi kabidi lelu eu.
Bantu ba bungi batu bela meji ne: balema bonso batu anu babungame ne banyingalala bua tshidibu atshi.

Bantu batu bitaba malu a dishima a mushindu eu badi mua kuangata bilejilu kampanda bua kujadika tshidibu bamba atshi. Kabidi batu bela meji ne: muntu udi ubenga tshidibu bamba atshi ki mmumanye tshintu to.

Tshidi Bible wamba

“Muntu udi kayi ne dimanya ki mmuntu muimpe to.”—NSUMUINU 19:2.

Mbuena kuamba tshinyi? Patudi katuyi bamanye malu mudiwu, tudi tuangata mapangadika mabi. Tuetu tuitabakana biambamba katuyi tujinga kumanya mudi malu, netuangate bantu bibi patupu.

Mudi kumanya malu mudiwu kutuambuluisha

Tuetu bamanye bimpe malu adi atangila muntu, katuakuitaba malu mabi onso adibu mua kumushiminyina nansha. Kabidi patudi tumanya ne: tshidibu batuambile bua muntu au ki mbulelela to, nebituambuluishe bua kukonkonona mêyi atudi bambe bua bakuabu bantu.

Tshilejilu tshia bualu budi buenzeke: Jovica (Balkans)

Muaba uvua Jovica utukavua batele lua ku ntuadijilu kua biena-bualu ebi mukolele, uvua umvua bakula bibi bua kasumbu kampanda ka bantu ku tudiomba ne mu bikandakanda. Udi wamba ne: “Ngakatuadija kumona bantu abu bibi, meme kutuadija ne kubakina. Mvua ndiambila ne: mmuenenu wanyi wa malu au kavua mubi to.

“Kadi pamvua ku busalayi, ngakadimona muenzejibue bua kusomba ne basalayi nanyi ba mu kasumbu ka bantu ne kuenza nabu mudimu pamue. Mu bungi bua matuku, ngakatuadija kumanya malu a bungi avua abatangila. Meme kutuadija kabidi kulonga muakulu wabu, ne kumvua misambu yabu ya kabukulu. Ngakabanga kubananga, meme kutuadija kubamona mushindu mukuabu. Kadi lungenyi lua dibamona bibi alu lutshitu anu lunduila. Nunku tshitu musue kuteleja kabidi ngumu idi yakula bibi bua bisamba bikuabu to. Tshitu nansha musue kabidi kubandila filme anyi manaya a bilele mudibu babaseka nansha. Ndi mumanye ne: diangata bantu bibi ditu difikisha anu ku tshiji ne ku lukinu.”

Tshiudi mua kuenza

Manya ne: malu onso atubu bakula bua tshisumbu tshia bantu kaatu anu atangila muntu yonso wa mu tshisumbu atshi to.
Manya kabidi ne: malu adibu bakuambile bua muntu adi mua kuikala anu makese patupu.
Keba bua kumanyina malu kudi bantu badi bamba bulelela.