Ikala umvuila bakuabu

Muaba udi bualu

Tuetu tutamba kumona anu dishilangana didi pankatshi petu ne bakuabu, tudi mua kumona malu adi enza bua tuikale bashilangane au bu ne: mbilema anyi mbutekete kudibu. Nunku tudi mua kutuadija kubamona bu bashadile kutudi. Tuetu balekele meji mabi a nanku avula kutudi, nebitukolele bua kubumvuila. Dibenga kuditeka pa muaba wabu adi ke kansungansunga.

Tshidi Bible wamba

“Nusanke ne badi basanka; nudile ne badi badila.”—LOMO 12:15.

Mbuena kuamba tshinyi? Mbuena kuamba ne: tuikale tumvuila bakuabu. Kumvuila bakuabu nkuditeka pa muaba wabu, ne kumvua mudibu bumvua.

Mudi diumvuilangana dituambuluisha

Patudi tuditeka pa muaba wa muntu, tudi tuteta kuenza bu ne: bualu budiye nabu abu mbutukuate tuetu. Tudi tujingulula ne: mudiye mua kuikala umvua anyi mudiye mua kuenza malu amu ke mutudi petu mua kuenza. Diumvuila bakuabu didi dituambuluisha bua kumona ne: bantu bonso mbantu, nansha bobu bafumine muaba kayi anyi bikale mushindu kayi. Tuetu tutamba kukeba malu adi enza bua tuetu nabu tuikale bafuanangane, katuakuikala kabidi tubamona mu mushindu mubi to.

Diumvuila bakuabu nedituambuluishe kabidi bua kunemeka bakuabu. Anne-Marie wa mu ditunga dia Sénégal, kumpala uvua upepeja bantu bavuabu bangata bu bantu bashadile. Udi wamba mudi kuditeka pa muaba wa bakuabu kumuambuluishe ne: “Pamvua mmona muvua bantu abu batata, mvua ndiebeja ne: bu biobi ne: meme ke uvua utata nanku, mvua mua kumvua mushindu kayi. Biakangambuluisha bua kubenga kudimona mupite bakuabu bualu ki mmeme uvua musungule bua kulua tshimvua atshi anyi mulue nanku bua bualu kampanda bumvua muenze nansha.” Bushuwa, tuetu tudienzeja bua kumvuila bakuabu mu malu adibu nawu, nebikale bipepele bua tuetu kuditeka pa muaba wabu pamutu pa kuakula bibi bua bualu buabu.

Tshiudi mua kuenza

Keba malu adi enza bua wewe ne bantu baudi wangata bu bashadile abu nuikale bafuanangane. Tshilejilu, fuanyikija mudibu mua kumvua padibu

Diumvuila bakuabu didi dituambuluisha bua kumona ne: bantu bonso mbantu

badia tshiakudia ne bena mu mêku abu
bajikija mudimu mukole wa ku dituku
basombeshangana ne balunda babu
bateleja misambu itubu banange bikole

Mpindieu teta kuditeka pa muaba wabu. Diebeja ne:

‘Muntu yeye wenza bua ndiumvue tshiyi ne mushinga, ndi mua kumvua bishi?’
‘Ndi mua kumvua bishi bantu bobu bakula bibi buanyi pabu kabayi nansha banji kukeba bua kummanya bimpe?’
‘Meme muikale wa mu bantu abu, mmunyi mumvua mua kuikala musue bua bantu bangenzele malu?’

Mutoke au ne muena muena mu tshitendelelu tshia bena Sikh balejangana foto ya mu malu adibu bapetangana, bu mudi dîku, manaya a ndundu atubu basue kunaya, ne mudimu.

Tshilejilu tshia bualu budi buenzeke: Robert (Singapour)

“Kale mvua mmona bampudimatshi bu bantu ba wabu mushindu, ngela meji ne: kabavua ne lungenyi lujima to, ne bavua bafiika munda tshianana tshianana. Ke meme kutuadija kubepuka. Kadi tshivua mmona ne: meji amvua mbelela au avua mabi to, bualu kaavua enzela muntu bibi nansha.

“Diditeka pa muaba wa bampudimatshi diakangambuluisha bua kumbusha meji anyi mabi au. Tshilejilu, mvua ngela meji ne: bampudimatshi kabavua ne lungenyi lujima bualu pamvua nyukila nabu, bavua anu bantangila kabayi bumvua tshintu. Nunku ngakadiebeja ne: bu meme panyi tshiyi ngumvua, mpindieu muntu yeye ungambila bualu mvua si nenshale panyi anu mumutangile ne mêsu! Nansha meme ne tuamu tua kumvua natu, pangikala ntata bua kumvua bidi bantu bamba, si nebamuene nansha ku mpala wanyi ne: ‘tshiena anu ngumvua bimpe to.’

“Pangakaditeka pa muaba wa bampudimatshi, meji onso amvua mbelela au akajika.”