Dipatula Dia Mikanda Idi Yumvuija Bible Bua Butumbi Bua Nzambi
Mbimanyike bua se: Bantemu ba Yehowa badi bamanyisha Bukalenge bua Nzambi ku diambuluisha dia mikanda. Biangatshile ku tshidimu tshia 1920, Société Watch Tower udi wenza mudimu ne bena budisuile, Bantemu bobo nkayabo, bua kututshisha bibejibeji ne mikanda bua kuyimuangalaja. Ke tshivua tshiambuluisha bua kupatula mikanda ku musangu ne ku musangu ku mushinga mukese.
Kukadi bidimu bu 60, Société mmudiundishe ne muvudije mikanda idi yumvuija Bible, kumpala-mpala ku Brooklyn, pashishe mu makuabo matunga. Midimu eyi yonso ivua mienjibue ku diambuluisha dia bena budisuile badi anu benda bavula.
Ku ndekelu kua tshidimu tshia 1970, bakalekela mishindu ya kale ya ntutshilu ne nkuatakajilu wa mikanda pakapetabo mashinyi manene a photocomposition pamue ne ordinateur bua kututa mikanda. Lutatu luvua lua se: mashinyi avuaku musangu awo kaavua malongolola bua miakulu mivule nansha. Kadi, Société ukavua mutuadije kututshisha mikanda mu miakulu 160 ne ukengela kuvudija mikuabo.
Nunku, kubikilabo bena budisuile bua kukebulula mua kuenza mashinyi a ordinateur avua ne bua kuambuluisha bua kututa mikanda mu miakulu mivule. Madikolela abo akapatula bipeta bilenga. Kutuadijabo kujikija ntatu ku kakese ku kakese e kupatulabo MEPS, mashinyi a ordinateur, bua kufundamu, kupatula bidi bifundamu pa mabeji. Mmuenza bua miakulu 200, bungi ebu kabuena bushikila apa to.
Lelu’eu, bifundidi ne bimuenenu bikuatakaja ku mashinyi aa bienza kudi Bantemu ba Yehowa, badi benza nabi mudimu mu matunga 25, makuabo pawo neabipete. Bena mudimu ba budisuile bafumine mu matunga aa bavua balongeshibue bua kufunda, kabidi bua kulongolola mashinyi aa manene. Société udi wenza mpindieu bibejibeji bipite pa miakulu 100 mu matunga 36, kabidi atanu a ku matunga aa adi aditutshila mikanda ne Bible.
Mudimu wa mushindu’eu udi ukengela bena mudimu: bafundi, bakudimunyi, balongolodi ba bilema, bendeshi ba biamu bia dipatula mikanda ne bayikuatakaji ne bambudi. Bamue badi bapeshibue midimu ya kufundilangana mikanda ne bisumbu. Bakuabo bua kusumba ne kulamba biakudia, bakombi ne basukudi ba bilamba, ne bikuabo. Nansha bobo mu ditunga kayi, mbena mudimu ba budisuile badi badilongolole bua mudimu eu. Mu tshidimu tshia 1985, pa buloba bujima bena budisuile 8 438 bavua benze mudimu mu biro, mu imprimerie, mu nzubu ya kulala ne mu bimunyinu bia Société.
Mbanganyi abo? Mbalume, bakaji, bajike, basele, bansongalume ne bansongakaji, banunu, buonso buabo Bantemu baditshipe kudi Yehowa. Bamue badi mu mudimu eu ne bidimu 40, 50 too ne ku 60. Badi bapitshisha moyenne wa mêba 44 ku lumingu, pamue apa bapitshisha apu bikalabi bikengedibua, bilondeshile mudimu udibo babapeshe. Mêba a dilolo ne disambombo ne dia lumingu mmalamina bua mudimu wa kuamba lumu luimpe ku nzubu ne ku nzubu ne midimu mikuabo ya mu tshisumbu.
Bena mudimu eu badi ne muaba wa kulala muakanyine ne badi badia biakudia mu nzubu ya kulala ya Société, idibo babikila ne: Betele. Badi bapeta kabidi diambuluisha dia makuta makese bua kufuta njila mu mudimu wa Nzambi ne kusumbabo bidibo bakengela.
Biangatshile ku tshidimu tshia 1920, bena mudimu aba ba budisuile mbapatule Bible, mikanda ne bibejibeji ne broshire mipite pa miliyare tshitema mu miakulu mipite pa 200 bua kuyimuangalaja pa buloba bujima. Badi benza muabo muonso bua lumu luimpe kumanyishibua ku ditunga dionso, tshisa tshionso ne muakulu wonso ne tshisamba tshionso.—Buakabuluibua 14:6, 7.
• Société udi ne imprimerie ya mushindu kayi, ne mbua tshinyi?
• Mbanganyi badi benza midimu eyi yonso, ne badi bapeta bia kudiambuluisha nabi mushindu kayi?
[Miaku miumvuiji ya tshimfuanyi pa dibeji 24]
Bena budisuile benza mudimu mu imprimerie, mu nzubu ya biladilu, mu biro ne ku tshimunyinu tshia ku Brooklyn ne ku Wallkill, Etats-Unis, midimu eyi idi bua dipatula mikanda idi yumvuija Bible
[Miaku miumvuiji ya tshimfuanyi pa dibeji 25]
Bena budisuile benza midimu mishilangane idi yambuluisha buludiludi anyi mu mushindu mukuabo bua kupatula Bible ne mikanda idi yumvuija Bible
Espagne
Allemagne
Finlande
Canada
Danemark
Suède
Afrique du Sud
Brésil
Pays-Bas
Australie