Badi Badisha Mikoko Ya Nzambi mu buobumue

Bamue badi badiebeja se: ‘Tshisumbu tshia pa buloba bujima tshia Bantemu ba Yehowa tshidi tshilombodibue mushindu kayi?’ Tudi tuandamuna ne: Ntshilombodibue pa tshilejilu tshishiya kudi tshisumbu tshia bena nkristo ba mu bidimu lukama bia kumpala.

Mu bidimu bia 1870, Charles Russell ne bakuende bakapangadika bua kupatula tshipeta tshia makebulula abo ne dilonga diabo dia Bible ku diambuluisha dia miyuki ne mikanda. Aba bavua badisanga nende mu mudimu eu, bena ditunga divuaye musombe, bavua bangata Russell ne bakuende bu tshisumbu tshia balume bavua bamonemone mianda mivule mu mudimu wa Mukalenge, balume bavua bakumbanyine kulomba mibelu pa bidi bitangila midimu yabo.

Mu tshidimu tshia 1884, Zion’s Watch Tower Tract Society wakashibua bilondeshile mikenji ya mu Commonwealth mu ditunga dia Pennsylvanie. Russell ne bena mudimu nende bavua balombola Société eu ne midimu ya Balongi ba Bible. Mu tshidimu tshia 1909, bakateka biro biabo ku Brooklyn, ku New York. Mu dipita dia bidimu, balombodi ba Société Watch Tower ne bakuabo bena mudimu nabo bavua ne ngikadilu ya mu nyuma, bela-manyi bakenza Kasumbu kaludiki ka Bantemu ba Yehowa.

Kasumbu kaludiki kenza ne bena nkristo bela-manyi (13 mu 1986), ba munkatshi muabo muanda-mutekete badi mu nzubu wa bafidi ba mibelu ya bulongolodi bua Société Watch Tower. Badi balombola midimu ya pa buloba bujima ya Bantemu ba Yehowa. Bu mudibo kabayi benzeja ku nyuma wa Nzambi, badi mua kutupakana; kadi, badi beyemena Dîyi dia Nzambi didi kadiyi mua kutupakana, diodi ke bukokeshi bupite bunene pa buloba, kabidi mbafile matuku abo wonso a muoyo mu butumike ku disua dia Nzambi. Yonso wa kudibo mmupitshishe bidimu bipite pa 40 mu mudimu wa Nzambi wa ku dîba ne ku dîba ne Bantemu ba Yehowa.

Kasumbu kaludiki kadi kalombola difunda dia mikanda ya Société. Badi basungula biena-bualu bilondeshile bidi mikoko ikengela mu nyuma, kabidi mikanda ntshipeta tshia dilonga dikumbane dia Dîyi dia Nzambi ne makebulula menza ku diambuluisha dia masambila. Bu mudi bantu aba balonga Bible ne disuminyina, badi balonda ku kakese ku kakese dikumbana dia malongolola a Nzambi, dia milayi mu mianda idi yenzeka pa buloba bujima ne mmuenenu wa tshisamba tshia Nzambi pa bidi bitangila bena bulongolodi ebu, bidi bibakengela pamue ne apa kuenza mashintuluka a meji pa bidi bitangila lumvu lua amue malongesha. Nunku, dimanya dia bulelela didi dienda divula.​—⁠Musambu wa 97:11; Nsumuinu 4:18; Danyele 12:4.

Mu yonso wa ku filiale mipite pa 90 pa buloba bujima, Kasumbu kaludiki nkateke komité muenza pamue apa ne bantu basatu bakole mu nyuma, badiye mupeshe bujitu bua kulombola midimu mienza mu matunga mapite pa 200 ne bidiila. Filiale idi mu diumvuangana disheme ne bisumbu bidi ku bukokeshi buayi. Kasumbu kaludiki kadi mu diumvuangana dîba dionso ne komité wa filiale, kabidi bena mu Kasumbu aka badi bakumbula ku tshidimu tshionso filiale mivule bua kumanyabo nsombelu wa mu yonso wa kudiyi.

Balume aba kabena bakokesha pa ditabuja dia bena mudimu nabo nansha; mbasadidi badi benza mudimu mukole bua bakuabo balonge mua kumanya Dîyi dia Nzambi. Kabena bakeba mua kunema; badi bapeta bintu bidibo bakengela mushindu umue ne bakuabo bena meku a Betele. Dienza diabo dia mudimu ne lulamatu, ndijadikibue ku tshisumi, buobumue, ngikadilu mulenga ne dilamata ku Bible didi Bantemu ba Yehowa baleja pa buloba bujima.​—⁠1 Kolinto 3:5-9; 4:1, 2; 2 Kolinto 1:24; 3:1-3; 1 Petelo 5:2, 3.

• Bisumbu bia Bantemu ba Yehowa mbilombodibue mushindu kayi?

• Lelu’eu, mbanganyi badi mu kasumbu kaludiki, balume aba badi ne majitu kayi?

• Mudimu mmulombodibue mushindu kayi mu makuabo matunga?

[Karte mu dibeji 26]

(Bua kumona malu bimpe, tangila mu mukanda)

Areas Where Jehovah’s Witnesses Are Doing God’s Will

[Miaku miumvuiji ya tshimfuanyi pa dibeji 26]

Balombodi ba Société Watch Tower

Charles Russell, 1884-1916

Joseph Rutherford, 1916-1942

Nathan Knorr, 1942-1977

Frederick Franz, 1977-1992

• Bijengu bidi Bantemu ba Yehowa benza disua dia Nzambi

[Miaku miumvuiji ya tshimfuanyi pa dibeji 27]

Imue ya ku filiale mipite pa 90 mudibo balombola midimu ya Bantemu ba Yehowa pa buloba bujima

Canada

Zambie

Allemagne

Japon

Australie

Brésil