Makuta Bua Mudimu ku diambuluisha dia mapa a budisuile

Midimu yonso itudi tufuma ku diumvuija idi yenjibua kudi bena mudimu ba budisuile, ke tshidi tshipuekesha mushinga wa mikanda. Mudimu wa ku nzubu ne ku nzubu ne dimuangalaja dia mikanda yetu bidi bienjibua ku budisuile kudi Bantemu ba Yehowa, badi batula abo makuta. Bakulu badi balombola tshisumbu mbambuluisha kudi basadidi ba midimu, kabena bapeta difutu dia midimu yabo nansha. Badi badipetela bidibo bakengela ku mfranga yabo nkayabo.

Nansha bena mu Kasumbu kaludiki ne Bantemu bakuabo buonso badi benza mudimu wa Nzambi wa ku dîba ne ku dîba bua kulongolola ne kuvudija Bible ne mikanda mikuabo idi yumvuija Bible badi bapeta diambuluisha dikese bua kusumbabo bidibo bakengela, pa kumusha nzubu ne biakudia bidibo babapesha tshianana. Mbia muomumue kabidi bua batangidi bendakanyi.

Mapa makese adi afuma ku mikanda adi ambuluisha nangananga bua kusumba biamu, ditutshisha mikanda ne diyituma mu teritware. Makuta makuabo adi afuma ku mapa a budisuile kudi Bantemu ba Yehowa bobo nkayabo, anyi bumpianyi kampanda bufila kudi bamue ba kudibo mu matunga adi mikenji mianyishe.

Mu miaba yonso ya bisangilu anyi ya assemblée, kudi kashete bua mapa, bua muntu yonso udi ujinga afile dipa. Kamuena disangisha dia mfranga. Kamuena tshia dikumi anyi dienzejangana ku bukole bua kufila makuta. Anu bu mudi Mifundu Minsantu yamba, muntu yonso udi mua kufila bu mudiye mudifundile munda muende.​—⁠2 Kolinto 8:12; 9:⁠7.

• Mfranga idi itungunuja mudimu wa Bantemu ba Yehowa idi ifuma penyi?