Bakengeshibue bua buakane

Balunda anyi balela badi mua kuikala bakuambila ne: Bantemu ba Yehowa kabatu balonda mikenji ya ditunga, batu bakandike midimu yabo mu amue matunga peshi bua se: ki mbantu bimpe. Bua tshinyi batu babajana?

Bushuwa, ki mbua patu Bantemu bashipa mikenji, kadi bualu batu balonda mu dikasa dia Yezu. Yezu wakamanyisha balongi bende ne: nebabapende, nebabakengeshe ne nebabashiminyine malu a mishindu yonso. Bualu, Satana, muluishi munene wa Yehowa, udi nzambi wa bulongolodi ebu bua malu, kabidi utu ukeba kupambuisha bantu bua kabakumbaji mudimu wa Nzambi.​—⁠Matayi 5:10-12; 10:16-22, 34-39; 24:9, 10; Yone 15:17 too ne 16:3; 2 Timote 3:12; 1 Petelo 5:8; Buakabuluibua 12:17.

Pakakuatabo bapostolo bua kubateka ku tubadi, ki mbua pavuabo babunde bibawu, peshi bantu ba tshikisu anyi bapambuishi ba bakuabo nansha. Ng’anu bualu bavua bamanyisha lumu luimpe. Pakalombabo mupostolo Paulo bua kufika ku tubadi tunene tuvua ku mutu, uvua ujinga kuakuila ne kuleja kabidi patoke bukenji bua bena nkristo bua kumanyisha lumu luimpe.​—⁠Bienzedi 4:​18-20; 5:28-32; Filipoi 1:7.

Bantemu ba Yehowa ba mu tshikondo tshietu etshi mbena nkristo badi batumikila mikenji, bafuta bitadi biabo ne banemeka bamfumu. Batu bapingajila Kaisa bintu bia Kaisa ne bia Nzambi kudi Nzambi. Biabengabo kumvuangana ne mbulamatadi kampanda, mbua padi mbulamatadi kayi ujinga kumanya mudimu wabo wa buambi anyi bua dibenga diabo dia kubuelakana mu malu a matunga. Mu nsombelu wa mushindu’eu, Bantemu ba Yehowa badi ne bua kuikala ne ngikadilu uvua nende bapostolo bavua bambe ne: “Mbimpe kutumikila Nzambi, bu mfumu, pamutu pa kutumikila bantu.”​—⁠Bienzedi 5:29; Mako 12:17; Yone 18:36; Tito 3:​1, 2.

Bantemu ba Yehowa kabatu basue dikengeshibua nansha. Batu bajinga kuikala mu nsombelu wa ditalala ne bupole. Kadi, bikalabo bakengeshibue bua ditumikila dia mikenji ya Nzambi ne tshilejilu tshia Yezu Kristo, badi batantamana ne disanka.​—⁠Matayi 5:10-12; Bienzedi 5:40, 41; 1 Kolinto 4:12; 1 Timote 2:2; 1 Petelo 3:​14, 15; 4:​12-16.

• Bua tshinyi Bantemu ba Yehowa batu bapendibua ne bakengeshibua?

• Bua tshinyi bitu bifikila Bantemu ba Yehowa bua kuikalabo mu ntatu ne bamfumu?

• Mmuenenu kayi utu nende basadidi ba Yehowa kumpala kua makengeshibua?

[Miaku miumvuiji ya tshimfuanyi pa dibeji 29]

Yezu wakafikishibua kudi Pilato ne mupostolo Paulo wakedibua mu buloko bualu bavua bamanyisha Bukalenge bua Nzambi