Tukuatshishayi mudimu wa Bukalenge mu tshisumbu ne pa buloba bujima

BANTEMU BA YEHOWA mbayishe lumu luimpe “too ne ku miaba ya kule menemene ya pa buloba” bua kukumbaja mulayi wa Yezu udi utangila matuku a ku nshikidilu. (Bien. 1:8; Mat. 24:14) Bua kukumbaja bualu ebu, badi bafila dîba diabu ne bukole buabu ku budisuile bua kuambila bakuabu malu a Nzambi. Bu mudibu bamanye ne: Yehowa udi ubakuatshisha, badi batungunuka ne kuteka malu a Bukalenge bua Nzambi pa muaba wa kumpala. (Mat. 6:25-34; 1 Kol. 3:5-9) Bipeta bidi bimueneka bidi bileja patoke mudi Yehowa ubanyisha ne ubabenesha.

TUKUATSHISHAYI MUDIMU WA BUKALENGE PA BULOBA BUJIMA

² Padi bantu bamona mudi Bantemu ba Yehowa bayisha ne babanya mikanda yabu kabayi balomba makuta, bamue badi mua kudiebeja ne: “Mmunyi mudibu bafika ku dienza bionso ebi?” Bulelela, dipatula Bible ne mikanda eyi ditu dilomba makuta a bungi. Bidi bikengela kabidi makuta a bungi bua kuibaka Nzubu ya Betele ya kusombelabu kudi bana betu badi benza mudimu wa dipatula mikanda, wa kutangila mudimu wa diyisha ne midimu mikuabu bua kumuangalaja lumu luimpe ne kuyilama. Bualu bukuabu, bua kuambuluisha batangidi ba bijengu, bamisionere, bampanda-njila ba pa buabu, ne bana betu bakuabu badi mu mudimu wa pa buawu wa ku dîba ne ku dîba, batu babapesha kantu ka kudiambuluisha naku bua kutungunukabu ne mudimu wabu. Bushuwa, mudimu wa diyisha lumu luimpe lelu (muaba utudi anyi pa buloba bujima) udi ulomba makuta a bungi menemene. Makuta onso aa atu afuma penyi?

³ Bantu ba bungi batu banyisha mudimu udi Bantemu ba Yehowa benza bua kulongeshangana malu a mu Bible batu ne disanka dia kufila makuta anyi bintu bua mudimu wa pa buloba bujima eu. Nansha nanku, Bantemu nkayabu ke batu batamba kukuatshisha mudimu eu, bamue ba kudibu batu batuma mapa a budisuile ku biro bia filiale bia Bantemu ba Yehowa bia mu ditunga diabu. Batu ne lungenyi lua buena lua bantu ba Nzambi ba kale bavua bafile bintu biabu ne muoyo mujima bua kukuatshisha mudimu wa dibaka muaba wa kutendelela Yehowa. (Ekes. 35:20-29; 1 Kul. 29:9) Bulongolodi butu bupeta amue mapa kudi bantu batu babushila bintu biabu padibu bafua, eku mapa makuabu makese afumina misangu ya bungi kudi bantu, kudi bisumbu, ne kudi bijengu. Patubu basangisha mapa onso aa, atu akumbana bua kutungunuja mudimu eu.

⁴ Bantemu ba Yehowa batu bamona kufila makuta abu ne bintu biabu bikuabu bu diakalenga didibu nadi bua kutungunuja mudimu wa diyisha. Yezu ne bayidi bende bavua ne kashete ka makuta, muvuabu bangatshila makuta bua amue majinga. (Yone 13:29) Bible udi wakula bua bantu bakaji bavua bambuluisha Yezu ne bayidi bende. (Mâko 15:40, 41; Luka 8:3) Pavua bantu bavua bajinga kukuatshisha mudimu wa diyisha lumu luimpe ne basue kuambuluisha mupostolo Paulo mu mudimu wende bamutumina bintu, uvua ubiangata ne disanka dionso. (Filip. 4:14-16; 1 Tes. 2:9) Bantemu ba Yehowa badi pabu batungunuka ne kulonda bilejilu bia kale ebi bua kuenza mudimu ne tshisumi ne kufila bintu ne tshianza tshilekelela. Dîba adi, bantu badi basue malu makane ba miaba yonso badi mua kupeta “mâyi a muoyo tshianana.”​—Buak. 22:17.

TUKUMBAJAYI MAJINGA A TSHISUMBU TSHIETU

⁵ Midimu ya mu bisumbu itu payi yenzeka ne mapa a budisuile. Kabatu basanga makuta, bakosela muntu yonso bungi budiye mua kufila anyi benzeja muntu ku bukole bua kufila to. Kadi kutu tushete tua mapa miaba idibu benzela bisangilu bua muntu yonso elamu makuta “bu mudiye mupangadije mu muoyo wende.”​—2 Kol. 9:7.

⁶ Makuta atubu bela mu tushete etu atu ambuluisha tshia kumpala bua kuenzeja midimu ya ku Nzubu wa Bukalenge ne kumulama bimpe. Kasumbu ka bakulu kadi mua kuangata dipangadika dia kutumina biro bia filiale bia Bantemu ba Yehowa makuta bungi kampanda bua kukuatshisha mudimu wa pa buloba bujima. Tshisumbu ke tshidi ne bua kuanyisha dipangadika edi. Ke mushindu utu bisumbu bia bungi bitamba kutuma mapa bua mudimu wa pa buloba bujima. Kutu amue majinga atu amueneka ku musangu ne ku mukuabu; nunku bantu bonso bobu ne tshibidilu tshia kuela makuta mu tushete, kabiakuikala ne mushinga bua kumanyisha bualu bua mapa misangu yonso to.

DIENZA MUDIMU NE MAPA

⁷ Panyima pa bisangilu bionso, bana betu ba balume babidi badi babala makuta onso adi mu tushete tua mapa ne bafunda bungi buawu. (2 Bak. 12:9, 10; 2 Kol. 8:20) Kasumbu ka bakulu nekalongolole mushindu wa kulama makuta aa too ne tshikondo tshidibu mua kuatuma ku biro bia filiale anyi kukumbaja majinga a tshisumbu. Ngondo yonso, muanetu wa balume udi utangila malu a konte udi ulongolola luapolo lua kubadila tshisumbu, ne panyima pa ngondo isatu yonso mutangidi wa malu a kasumbu ka bakulu udi ulongolola bua bakonkonone konte eyi.

MAKUTA ADIBU BATULA BUA TSHIJENGU

⁸ Makuta adibu batula bua mpuilu ne bua majinga makuabu adi nawu tshijengu adi afumina ku mapa adi Bantemu badi mu tshijengu atshi bafila. Batu bateka tushete tua mapa miaba idi mpuilu yenzekela bua bantu bamone mua kuelamu mapa a budisuile bua tshijengu tshiabu. Bualu bukuabu, bua kujikija amue majinga atu amueneka, bisumbu bidi mua kufila mapa bikondo bikuabu.

⁹ Pa tshibidilu, mbimpe bijengu bikale bikokesha bua kujikija majinga abi, ne makuta a pa mutu badi ne bua kuatuma bua mudimu wetu wa buloba bujima. Bikalaku kakuyi makuta makumbane mu konte wa tshijengu bua midimu ivua mienzeke mu mpuilu mushale anyi bua kuenzeja midimu ya mpuilu udi kumpala (bu mudi a kufutshila muaba wa kumuenzela), mutangidi wa tshijengu udi mua kuenza bua bamanyishe bisumbu diakalenga didibi nadi dia kufila mapa. Kasumbu ka bakulu konso nekangate dipangadika dia bungi bua makuta adi tshisumbu mua kufila bua konte wa tshijengu. Pashishe, nebaleje tshisumbu dipangadika didibu bangate.

¹⁰ Padiku majinga a malu a makuta adi akengela bua bakulu ba mu tshijengu batangile, nebenze tshisangilu dituku dia mpuilu wa tshijengu. Pa kumbusha makuta atubu batula bua tshijengu, badi ne bua kumanyisha bakulu mapangadika makuabu onso bua bobu pabu baanyishe. Nunku misangu yonso idibu bapatula makuta a mu tshibutshilu tshia tshijengu badi ne bua kuleja bakulu bungi buawu menemene bua bobu kuanyisha.

¹¹ Batu balongolola bua kuikale dikonkonona dia luapolo lua konte ya tshijengu pa tshibidilu.

TUAMBULUISHAYI BAPELE

¹² Tshimue tshipatshila tshia makuta avua mu kashete kavua Yezu ne bayidi bende balame tshivua tshia kuambuluisha bapele. (Mâko 14:3-5; Yone 13:29) Bena Kristo batshitu anu ne bujitu ebu bualu Yezu wakamba ne: “Nudi ne bapele aba misangu yonso.” (Mâko 14:7) Mmunyi mutu Bantemu ba Yehowa bakumbaja bujitu ebu lelu?

¹³ Misangu mikuabu, bena Kristo ba lulamatu mu tshisumbu badi mua kukengela diambuluisha dia bintu bia ku mubidi bua bukulakaja, butekete bua mubidi anyi bua lutatu kampanda ludi lubapite makanda. Bena mu dîku, balela, ne bantu bakuabu badi bamona bana babu mu dikenga badi mua kudiumvua basakibue bua kubambuluisha. Kuenza nunku kudi kupetangana ne mêyi a mupostolo Yone aa: “Muntu yonso udi ne bintu bia pa buloba ebu ne umona muanabu ukengela tshintu kadi ubenga kumuleja luse, mmushindu kayi udi dinanga dia Nzambi mua kushala munda muende? Bana bakese, katuena ne bua kunangangana anu ne mêyi anyi ne ludimi patupu, kadi tunangangane mu bienzedi ne mu bulelela.” (1 Yone 3:17, 18; 2 Tes. 3:6-12) Ntendelelu mulelela udi ulomba kutangila bena lulamatu badi mua kuikala dijinga ne diambuluisha dia bintu bia ku mubidi.​—Yak. 1:27; 2:14-17.

¹⁴ Mu mukanda wa kumpala uvua mupostolo Paulo mutumine Timote, wakumvuija mushindu uvuabu mua kuambuluisha bantu badi mu dikenga. Udi mua kubala mibelu yende mu 1 Timote 5:3-21. Bujitu bua kumpala bua muena Kristo yonso mbua kutangila majinga a bena mu dîku diende. Bana ne bikulu anyi balela bakuabu badi ne bua kuambuluisha bakulakaje peshi bena mu mêku abu badi ne butekete bua mubidi. Bikala mbulamatadi anyi bulongolodi kampanda bua diambuluishangana bufila dikuatshisha kansanga, balela anyi bantu bakuabu badi mua kuenza bua bakengi aba bapete diambuluisha adi. Kudi mua kuikala nsombelu udi ulomba bua tshisumbu tshijima tshiambuluishe bena Kristo netu badi bakenga bakadi benzele Yehowa mudimu ne lulamatu bidimu bia bungi. Bikalaku kakuyi bena mu dîku anyi balela bakuabu badi mua kubambuluisha ne mbulamatadi kayi mulongolole bua kuambuluisha bakengi, kasumbu ka bakulu kadi mua kukeba mushindu wa kubambuluisha. Bena Kristo badi bamona dipesha bantu badi mu dikenga bintu bu diakalenga.

¹⁵ Bana betu ba bungi badi mua kupeta lutatu bua dikengeshibua, mvita, dikanka dia buloba, dipasalala dia mâyi, biyole bia nzala anyi ntatu mikuabu itu itamba kufikila bantu mu matuku makole aa. (Mat. 24:7-9) Padi bisumbu bia muaba au kabiyi ne bintu bia kupeshangana bua nsombelu eyi, Kasumbu kaludiki katu kalomba bana betu ba miaba mikuabu bua kuambuluisha bantu badi ntatu eyi mikuate. Ke tshivua bena Kristo ba mu Asia mukese benze pakafilabu biakudia bua bena Kristo nabu ba mu Yudaya mu tshikondo kampanda tshivuabu mu tshiyole tshia nzala. (1 Kol. 16:1-4; 2 Kol. 9:1-5) Patudi tulonda tshilejilu tshiabu, tudi tuleja mutudi banange bana betu ne mutudi bayidi balelela ba Yezu Kristo.​—Yone 13:35.

DIABANYA MIKANDA

¹⁶ Bible ne mikanda yetu mikuabu bidi ne mushinga wa bungi mu dimanyisha mukenji wa Bukalenge. Pa tshibidilu, kasumbu ka bakulu katu kasungula musadidi wa mudimu bua kutangila tshibutshilu tshia mikanda tshia tshisumbu. Bana betu badi ku mikanda badi bangata mudimu wabu ne mushinga. Badi benza bua kumanya bungi bua mikanda idibu nayi bua kuikale mikanda bungi bukumbane idi tshisumbu nayi dijinga.

¹⁷ Tuetu bena Kristo badilambule tudi bamanye ne: dîba dietu, makanda etu, meji etu, dimanya dietu, bintu bietu, nansha muoyo wetu mbifumine kudi Nzambi ne tudi ne bua kumuenzela nabi mudimu. (Luka 17:10; 1 Kol. 4:7) Tudi tuleja mutudi banange Yehowa bikole patudi tuenza mudimu bimpe ne bionso bitudi nabi. Tudi basue kutumbisha Yehowa ne bintu bietu bia mushinga, bualu tudi bamanye ne: udi usanka bua tshintu tshionso tshitudi tufila bua kuleja mutudi bamulamate anu yeye ne anyima wetu yonso. (Nsu. 3:9; Mâko 14:3-9; Luka 21:1-4; Kolos. 3:23, 24) Yezu wakamba ne: “Nuvua bapete tshianana, nufile tshianana.” (Mat. 10:8) Patudi tudifila tuetu bine ne tufila bintu bietu bua kuenzela Yehowa mudimu, tudi tupeta disanka dia bungi.​—Bien. 20:35.