Tshitupa 10
Bulongolodi Bupiabupia Bua Mpatshi Buajadika Nzambi
1, 2. Ntshinyi tshienzeka panyima pa mvita mikezudi ya Armagedone?
NTSHINYI tshienzeka panyima pa mvita mikezudi ya Armagedone? Apu ke patuadija tshikondo tshipiatshipia tshia mpatshi. Bapanduki ba ku Armagedone, bamane kuleja bulamatshi buabu ku bukokeshi bua Nzambi, nebababueje mu bulongolodi bupiabupia. Mmunyipu muikala tshikondo etshi tshipiatshipia tshia mu miyuki ya bantu tshia disanka divule bualu mabenesha a kudi Nzambi neapuekele dîku dijima dia bukua-bantu!
2 Muinshi mua bulombodi bua Bukalenge bua Nzambi, bapanduki nebatuadije kulongolola mparadizu. Nebikale mua kukuata mudimu ne makanda abu bua bipatshila bidi kabiyi bia budinangi biasankisha bantu bonso bikalaku mu tshikondo atshi. Nebatuadije kukudimuna buloba bua bulue muaba mulengele, wa ditalala, ne udi usankisha bua bukua-bantu.
Buakane budi bupingana bubi
3. Ndisulakana kayi dia buludiludi dikalaku katupa kîpi panyima pa Armagedone?
3 Bionso ebi nebienzeke pa kubutula bulongolodi bua Satana. Kakuakuikala kabidi bitendelelu bia dishima, ndongoluelu ya malu a mu nsombelu, peshi mbulamatadi bidi bilela diabulukangana. Kakuakuikala kabidi kampanye ka Satana kadi kapambuisha bantu; kumpanyi yonso idi yenza kampanye aka nebayibutule pamue ne ndongoluelu wa Satana. Anjibi kuela meji: kapepele konso ka mulùngu ka bulongolodi bua Satana kakatshiyiku! Ndisulakana kayipu!
4. Tela mashintuluka enzeka mu dilongesha.
4 Nunku ngenyi mibutudi ya bukokeshi bua bantu nebayipingane kudi dilongesha didi diibaka difuma kudi Nzambi. “Bana bebe bonso nebikale [“bantu balongesha kudi,” NW] Yehowa.” (Yeshaya 54:13) Ku diambuluisha dia dilongesha edi dimpe ku tshidimu ne ku tshidimu, “bushuwa buloba nebuule tente ne dimanya dia Yehowa bu mudi mâyi abuikila mbuu.” (Yeshaya 11:9, NW) Bantu kabakulonga kabidi tshidi tshibi, kadi ‘badi bashikame pa buloba badi bayila buakane.’ (Yeshaya 26:9) Ngenyi ne malu bidi biibaka nebikale muanda wa dituku dionso.—Bienzedi 17:31; Filipoi 4:8.
5. Ntshinyi tshiafikila bubi ne bantu babi bonso?
5 Nunku, kakuakuikala kabidi dishipangana, tshinyangu, diangatangana ku bukole, buivi, peshi dibunda dia bibawu kayi dikuabu dionso. Muntu nansha umue kakukenga bua bienzedi bibi bia bakuabu. Nsumuinu 10:30 udi wamba ne: ‘Muntu muakane kêna umushibua kashidi, kadi bantu babi kabena bashikama pa buloba.’
Makanda a mubidi makajilula
6, 7. (a) Mmalu malelela kayi adi abungamija ikala bukokeshi bua Bukalenge mua kujikija? (b) Mmunyi muakaleja Yezu ne: neajike patshivuaye pa buloba?
6 Mu bulongolodi bupiabupia, nebumbushe buenzeji buonso bubi bua buntomboji bua ku tshibangidilu. Tshilejilu, bukokeshi bua Bukalenge nebumbushe masama ne bukulakaje. Lelu’eu, nansha biwikala ne makanda a mubidi mimpe ndambu, bulelela budi bubungamija budi se: paudi wenda ukulakaja, mêsu ebe adi abuitshidila, mênu ebe adi anyanguka, lumvu luebe ludi lukepela, dikoba diebe didi diela minyengu, bia-munda biebe bidi binyanguka, ne ndekelu wa bionso udi ufua.
7 Kadi, mu katupa kîpi emu, malu aa adi anyingalaja atuakapiana kudi baledi betu ba kumpala neikale malu a kale. Udiku muvuluke tshiakenza Yezu pa bidi bitangila makanda a mubidi patshivuaye pa buloba anyi? Bible udi ulonda se: ‘Bisumbu binene bia bantu biakalua kudiye, bavua ne balema babu ne bafofo ne tumama ne batshibuke ne bakuabu ba bungi, bakabateka ku makasa ende, yeye wakabakolesha; nunku bantu bakakema, pakamonabu tumama tuakula, ne batshibuke balulama, balema benda, ne bafofo batabala.’ (Disendamija miaku ndietu.)—Matayo 15:30, 31.
8, 9. Tela masanka alua mu bulongolodi bupiabupia pakajilulabu makanda a mubidi.
8 Ndisanka kayipu bunene dialua mu bulongolodi bupiabupia pumbushabu masama etu onso! Ntatu idi ifuma ku makanda a mubidi mabi kayakutukengesha kabidi nansha. “Muena musoko kena wamba ne, Ndi ne disama.” ‘Mu dituku adi mêsu a mufofo neatabale, matshi a badi ne mapapa neajikuke. Mu dîba adi muntu mulema neatumpike bu ngulungu, ludimi lua kamama neluimbe misambu.’—Yeshaya 33:24; 35:5, 6.
9 Kabiakuikalaku bisankisha bua kubika mu dinda dionso ne kumona se: udi mpindieu ne makanda a mubidi malengele anyi? Kabiakuikalaku bia musangelu bua bakulakaje kumanyabu se: mbapetulule makanda a ku bunsonga menemene ne bafike ku bupuangane buvua nabu Adama ne Eva ku tshibangidilu anyi? Dilaya dia mu Bible didi ne: ‘Munyinyi wa pambidi pende neupite wa muana bulengele, udi upingana ku matuku a bunsongalume buende.’ (Yobo 33:25) Ndisanka kayipu dikalaku bua kuimansha maneta, biamu bia diteleja nabi mêyi, mabaya a kuenda nawu, makalu a balema, ne manga! Kabakukengela kabidi mpitadi, ba-minganga, ne buondapi ba mênu.
10. Tshiafikila lufu ntshinyi?
10 Bantu badi bapeta makanda malengele bu nunku kabakusua bua kufua. Ne kabakuikala ne bua kufua, bualu bukua-bantu kabuakuikala kabidi ku bukokeshi bua dipanga bupuangane dipiana ne lufu. Kristo ‘udi ne bua kukokesha [bu mukalenge] too ne pateka [Nzambi] bena lukuna nende bonso muinshi mua makasa ende. Muena lukuna wa ku nshikidilu udiye ujimija ndufu.’ ‘Dipa dia luse dia Nzambi mmuoyo wa tshiendelele.’—1 Kolinto 15:25, 26; Lomo 6:23; tangila kabidi Yeshaya 25:8.
11. Mmunyi mudi Buakabuluibua wakula mu tshikoso bua masanka a bulongolodi bupiabupia?
11 Wakula mu tshikoso bua masanka apetela dîku dia bukua-bantu mu Mparadizu kudi Nzambi udi ne ditabalela, mukanda wa ndekelu wa mu Bible udi wamba ne: “Ne yeye [Nzambi] neakupule tshinsonji tshionso ku mêsu abu, ne lufu kaluakuikalaku kabidi, nansha madilu, nansha miadi, nansha bisama kabiakuikalaku kabidi. Bintu bia kale biajiminyi.”—Buakabuluibua 21:3, 4, NW.
Bafue badi bapetulula muoyo
12. Mmunyi muvua Yezu muleje bukole bua dibiisha bantu bumupesha kudi Nzambi?
12 Yezu wakenza bia bungi kupita diondopa patupu babedi ne balema. Wakapatula kabidi bantu mu nkita. Wakaleja nunku bukole bua dikema bua dibiisha bantu ku lufu buvua Nzambi mumupeshe. Udiku muvuluke tshikondo tshiakalua Yezu kumbelu kua muntu kampanda muena muana wa bakaji uvua mufue anyi? Yezu wakambila nsongakaji uvua mufue ne: “Nsongakaji, ndi nkuambila ne: juka!” Ne tshiakenzeka ntshinyi? ‘Diakamue muana kujuka e kuenda.’ Pa kumona bualu abu, bantu bavua muaba au “kukemabo bikole.” Bivua bikole bua kukandabu disanka diabu!—Markuse 5:41, 42, MMM; tangila kabidi Luka 7:11-16; Yone 11:1-45.
13. Mbantu ba mushindu kayi babiishibua ku lufu?
13 Mu bulongolodi bupiabupia, “Dibika dia bafue nedikaleku, ne dia bakane ne dia babi [“bakena bakane,” NW].” (Bienzedi 24:15) Dîba adi Yezu neenze mudimu ne bukole bumupesha kudi Nzambi bua kujula bafue, mu diumvuangana ne tshiakambaye ne: ‘Meme ndi bianyi dibisha, ndi bianyi muoyo: udi ungitabuja, nansha biafuaye, neikale ne muoyo kabidi.’ (Yone 11:25) Wakamba kabidi ne: “Bonso badi mu nkita ya tshivulukilu [mu tshivulukidi tshia Nzambi] nebumvue dîyi diende [dia Yezu] ne nebapatuke.” —Yone 5:28, 29, NW.
14. Bu muikala lufu kalutshiyiku kabidi, mmalu kayi umbushabu?
14 Disanka dinene nedikale pa buloba bujima pikala bisumbu ne bisumbu bia bafue bipete muoyo tshiakabidi bua kupetangana ne banangibue babu! Mamanyisha pa bantu badi bafuma ku difua kaakutuadila kabidi bapanduki dibungama. Kadi, nekuikale pamu’apa bualu bushilangane: mamanyisha a bantu bapiabapia babiishibua bua kutuadila aba bavua babanange disanka. Nunku kakuakuikala kabidi dijiikangana, diosha dia bitalu, miaba ya dioshila bafue, peshi nkita nansha!
Bulongolodi bua ditalala dilelela
15. Mmunyi muakumbana mulayi wa mu Mika mu ngumvuilu wa tshishiki?
15 Nekuikale ditalala dilelela mu bitupa bionso bia mu nsombelu. Mvita, bajudi ba mvita, ne biapu bia bia-mvita nebikale malu a kale. Bua tshinyi? Bualu bipatshila bidi bikebesha bia ditapulukangana dia matunga, bisa, ne makoba nebijimine. Nunku, mu ngumvuilu wa tshishiki, “Tshisamba katshiakutudila tshikuabo muele wa mvita, bantu kabakulonga kabidi mua kuluangana mvita.”—Mika 4:3, MMM.
16. Mmunyi muatabalela Nzambi bua mvita kayenzeki?
16 Ebi bidi mua kumueneka bikemesha pa kutangila mudi miyuki ya bantu miûle tente ne mashi bua mvita milondangane. Kadi abi mbienzeke nanku bualu bukua-bantu buvua muinshi mua bukokeshi bua bantu ne ba-demon. Mu bulongolodi bupiabupia, muinshi mua bukokeshi bua Bukalenge, tshienzeka ntshiotshi etshi: ‘Luayi bienu, nutangile bienzedi bia Yehowa . . . Yeye udi ulekesha mvita bua ijike too ne ku mfudilu kua buloba; udi utshibula buta, udi ukosa difuma bitupa bitupa; udi wosha makalu a mvita mu kapia.’ —Musambu 46:8, 9.
17, 18. Mu bulongolodi bupiabupia, mmalanda kayi ikala pankatshi pa bantu ne nyama?
17 Bantu nebikale kabidi mu ditalala ne nyama, anu bu muvuabu mu Edene. (Genese 1:28; 2:19) Nzambi udi wamba ne: ‘Mu dituku adi kabidi nembapungile tshipungidi ne nyama ya mu mpata, nyunyu ya muulu ne bintu bidi bidikoka panshi . . . Nembaladike panshi kabayi ne ntatu.’—Hoshea 2:18.
18 Ditalala adi nedikale dia bualabale kayi? ‘Tshimungu netshilale mu nzubu umue ne muana wa mukoko, ne nkashama nealale pamue ne muana wa mbuji. Muana wa ngombe ne nyama wa ntambue ne nyama udi ne manyi neyidie mashinde mu muaba umue, ne muana mutekete neayilombole.’ (Disendamija miaku ndietu.) Nyama kayakuikala kabidi ne njiwu bua muntu peshi bua nyama mikuabu to. Nansha “nyama wa ntambue neadie mashinde bu ngombe”!—Yeshaya 11:6-9; 65:25.
Buloba bukudimuna Mparadizu
19. Nebakudimune buloba bulua tshinyi?
19 Buloba bujima nebuikale bukudimuna tshisombedi tshia mparadizu bua bukua-bantu. Ke bua tshinyi Yezu uvua mua kulaya muntu wakamuitabuja ne: ‘Newikale nanyi mu Mparadizu.’ Bible udi wamba ne: “Tshipela ne buloba buume nebikale ne disanka divule, mpata neasanke, neamene bilongo bu bia kapapankole . . . Bualu, mayi neapatuke mu tshipela, misulu neyipueke mu mpata.”—Luka 23:43; Yeshaya 35:1, 6, MMM.
20. Bua tshinyi nzala kayakukengesha kabidi bukua-bantu?
20 Mu Bukalenge bua Nzambi, nzala kayakutatshisha kabidi miliyo ya bantu nansha. “Nekuikale ntete mivule pa buloba; pa nsongo ya mikuna nepikale dibodiodioka dia biakudia.” ‘Mitshi ya mu budimi neyikuame mamuma ayi, buloba nebulue ne biakudia biabu, ne mikoko neyikale mu buloba buayi kayiyi ne ntatu.’—Musambu 72:16, NW; Yehezekele 34:27.
21. Nekuikale kabidi dipanga muaba wa kulala, biasasa, ne miaba mibi ya njiwu anyi?
21 Kakuakuikala kabidi bupele, bantu bapange muaba wa kusomba, biasasa, peshi miaba idi miûle tente ne dibunda dia bibawu. ‘Nebase nzubu, nebashikamemu; nebatentule mionji ya tumuma tua mvinyo mu madimi, nebadie tumuma tuayi. Kabena basa nzubu bua mukuabu abuelemu; kabena bakuna bintu bua mukuabu abidie.’ ‘Nebashikame, muntu ne muntu muinshi mua muonji wende wa tumuma tua mvinyo ne muinshi mua mutshi wende wa mfigi; kakuena muntu wabakuatshisha buôwa.’—Yeshaya 65:21, 22; Mika 4:4.
22. Mmunyi mudi Bible utela mabenesha a bukokeshi bua Nzambi?
22 Nebabeneshe bantu ne bintu ebi bionso mu Mparadizu, ne bikuabu bipite apa. Musambu 145:16 udi wamba ne: “Udi [Nzambi] ubulula tshianza tshiebe, tshintu tshionso tshidi ne muoyo udi utshiukutshisha ne diakalengele.” Kabiena bikemesha padi mulayi wa mu Bible wamba ne: ‘Badi ne mitshima mipuekele nebapiane buloba, mioyo yabu neyisanke mu ditalala dikumbane. . . . Bantu bakane nebapiane buloba, nebashikamemu tshiendelele.’—Musambu 37:11, 29.
Dijikija malu a kale
23. Mmunyi muajikija Bukalenge bua Nzambi makenga onso atudi bapete?
23 Bukokeshi bua Bukalenge bua Nzambi nebujikije malu mabi onso menzela dîku dia bukua-bantu munkatshi mua bidimu binunu bisambombo bikadi bipite. Masanka a mu tshikondo atshi neikale ne mushinga mukole kupita makenga kayi onso avua bantu bamone. Bivulukidi bibi bia makenga a kale kabiakusuya bantu. Ngenyi ne midimu mikankamiji ikala mu nsombelu wa dituku dionso wa bantu, neikupule ku kakese ku kakese bivulukidi bia makenga.
24, 25. (a) Ntshinyi tshivua Yeshaya mudianjile kuamba ne: netshienzeke? (b) Bua tshinyi tudi mua kuikala batuishibue ne: bivulukidi bia makenga a kale nebikupuke?
24 Nzambi udi ne ditabalela udi wamba ne: “Nemfuke diulu dipiadipia [mbulamatadi mupiamupia wa mu diulu bua bukua-bantu] ne buloba bupiabupia [nsangilu wa bantu wa buakane]; bantu kabakuvuluka malu avua menzeke kale, kaakubavuila kabidi mu lungenyi. Ikalayi ne disanka dia bungi, sankayi amu kusanka kashidi bua bionso bindi musue kufuka.” (Disendamija miaku ndietu.) ‘Ba pa buloba bonso badi ne dikisha, badi ne ditalala, badi babisha mêyi abu mu kuimba kua musambu.’—Yeshaya 14:7; 65:17, 18, MMM.
25 Nunku, ku diambuluisha dia Bukalenge buende, Nzambi neakudimune tshishiki nsombelu mubi udi mutambe kunenga. Nealeje kashidi ne tshiendelele ditutabalela diende dinene pa kulokesha mabenesha ikala mua kuakaja mu mushindu mualabale pa lutatu kayi luonso lutuvua bapete mu bikondo bietu bia kale. Nunku netuvuluke anu kakese ntatu ya kale ituvua bapete, kuamba mene mbituasua kuyivuluka.
26. Bua tshinyi Nzambi neatufute bua makenga onso a kale?
26 Ke mushindu wikala Nzambi mua kutufuta bua makenga atudi mua kuikala batantamene mu bulongolodi ebu. Mmumanye se: katshivua tshilema tshietu nansha bua mutuvua baledibue bapange bupuangane, bualu tuakapiana dipanga bupuangane edi kudi baledi betu ba kumpala. Katshivua tshilema tshietu nansha mutuvua baledibue mu bulongolodi bua Satana, bualu bu Adama ne Eva bikale bena lulamatu, tuvua mua kuikala baledibue mu mparadizu. Nunku ne luse luvule, Nzambi neenze bivule kupita diakaja patupu nsombelu wa lutatu wa kale utuvua nende.
27. Mmilayi kayi yakumbana mu mushindu wa dikema mu bulongolodi bupiabupia?
27 Mu bulongolodi bupiabupia, bukua-bantu nebupete budikadidi buvua budianjila kuamba mu Lomo 8:21, 22: ‘Bifukibua mene nebipikudibue kabidi ku bupika bua dibola diabi, nebibuejibue mu budishikaminyi bua butumbi bua bana ba Nzambi. Bualu bua tudi bamanye ne: Bifukibua bionso bidi bitua mikemu pamue ne bidi bidinyenga pamue too ne katataka.’ Nenku bantu nebamone dikumbana dia tshishiki dia disambila edi: ‘Bukalenge buebe bulue. Benze pa buloba muudi musue bu mudibu benza mu diulu.’ (Matayo 6:10) Nsombelu wa mpatshi mu Mparadizu wa pa buloba neafuane nsombelu udi mu diulu.
[Bimfuanyi mu dibeji 23]
Mu bulongolodi bupiabupia, bakulakaje nebapetulule makanda a ku bunsonga
[Tshimfuanyi mu dibeji 24]
Masama ne bulema buonso nebijimine mu bulongolodi bupiabupia
[Tshimfuanyi mu dibeji 25]
Mu bulongolodi bupiabupia, bafue nebabiishibue
[Tshimfuanyi mu dibeji 26]
‘Kabakulonga mvita kabidi’
[Bimfuanyi mu dibeji 27]
Bantu ne nyama nebikale mu ditalala dia tshishiki mu Mparadizu
[Tshimfuanyi mu dibeji 27]
‘Nzambi neabulule tshianza tshiende, tshintu tshionso tshidi ne muoyo neatshiukutshishe ne diakalengele’
[Tshimfuanyi mu dibeji 28]
Bukalenge bua Nzambi nebutambe kuenza bivule bua makenga onso atuvua batantamene