Tshitupa 9
Mushindu Utudi Bamanye Se: Tudi Mu “Matuku A Ku Nshikidilu”
1, 2. Mmunyi mutudi mua kumanya né tudi mu matuku a ku nshikidilu?
MMUNYI mutudi mua kuikala bajadike ne: tudi mu tshikondo tshikala Bukalenge bua Nzambi mua kubutula ndongoluelu’eu wa bukokeshi bua bantu? Mmunyi mutudi mua kumanya se: tudi pabuipi menemene ne tshikondo tshikala Nzambi mua kujikija bubi ne makenga onso?
2 Bayidi ba Yezu Kristo bakajinga bua kumanya malu au. Bakamuebeja tshivua ne bua kuikala “tshimanyinu” tshia dikalaku diende mu bukokeshi bua Bukalenge ne “tshia nkomenu wa ndongoluelu eu wa malu.” (Matayo 24:3, NW) Yezu wakandamuna pa kubala malu anyukula buloba ne nsombelu kabukabu yalondangana bua kuleja ne: bukua-bantu mbubuele mu ‘tshikondo tshia ku nshikidilu,’ ‘matuku a ku nshikidilu’ a ndongoluelu’eu wa malu. (Danyele 11:40; 2 Timote 3:1) Mu siekele eu, tukadiku bamone tshimanyinu atshi tshienza ne malu a bungi anyi? Eyowa, tukadi batshimone!
Mvita ya Buloba bujima
3, 4. Mmunyi mudi mvita ya mu siekele eu mikumbanangane ne mulayi wa Yezu?
3 Yezu wakadianjila kuamba ne: ‘tshisamba tshikuabu netshiluangane ne tshinga, bukalenge bukuabu nebuluangane ne bunga.’ (Matayo 24:7) Mu 1914 bantu bakaditua mu mvita yakajula bisamba ne makalenge kuulu mu mushindu uvua mushilangane ne mvita kayi yonso ya kumpala kuayi. Tshijadiki tshia muanda au tshidi ne: bashikuluji ba malu a kale ba mu tshikondo atshi bakayibikila ne: Mvita Minene. Ivua mvita ya kumpala ya pa buayi mu miyuki ya kale, mvita ya kumpala ya buloba bujima. Basalayi ne bantu ba tshianana batue ku miliyo 20 bakajimija mioyo yabu, bipite kule ne kule mvita kayi yonso yakenzeka kumpala.
4 Mvita ya Kumpala ya Buloba bujima ivua ntuadijilu wa matuku a ku nshikidilu. Yezu wakamba ne: mvita eyi pamue ne malu makuabu bivua ne bua kuikala “tshibangidilu tshia kanyinganyinga.” (Matayo 24:8) Abi biakamueneka bilelela, bualu Mvita Mibidi ya Buloba bujima yakashipa mene bantu bavule, basalayi ne bantu ba tshianana miliyo mitue ku 50 bakafua. Mu siekele eu wa 20, mbashipe bantu bapite pa miliyo 100 mu mvita, bapite misangu inayi bungi bua bantu bashipa mu bidimu 400 bisangisha biashadi ebi! Ndipila kayipu bunene dia bukokeshi bua bantu!
Bijadiki bikuabu
5-7. Mbimue bijadiki kayi bikuabu bidi bileja ne: tudi mu matuku a ku nshikidilu?
5 Yezu wakatela malu makuabu avua ne bua kuenzeka mu matuku a ku nshikidilu: “Bikumina bikole nebienzeke, masama a bipupu ne biyole bia nzala nebibuele miaba ne miaba.” (Lukase 21:11, MMM) Abi bidi biakanangana bimpe ne mianda idi yenzeka kumbukila mu 1914, bualu kudi divulangana bikole dia bipupu bia mushindu’eu.
6 Bikumina binene bidi bienzeka pa tshibidilu, bishipa bantu ba bungi. Disama dia gripe wa bena Espagne nkayadi ndishipe bantu batue ku miliyo 20 panyima pa Mvita ya Kumpala ya Buloba bujima—bamue badi batshinka se: bantu bavua miliyo 30 peshi bapite apu. SIDA mmushipe nkama ya binunu bia bantu ne udi mua kushipa miliyo mivule ya bantu mu matuku makese emu. Tshidimu tshionso miliyo ya bantu batu bafua masama a mioyo, kansere, ne masama makuabu. Miliyo mikuabu ya bantu badi bafua lufu lua ku kakese kakese lua nzala. Kakuyi mpata ‘bendeshi ba tubalu ba mu Buakabuluibua’ ne mvita yabu, biyole bia nzala, ne masama a bipupu badi benda batapa bantu bavule kumbukila ku 1914. —Buakabuluibua 6:3-8.
7 Yezu wakadianjila kabidi kumanyisha bua divulangana dia dibunda dia bibawu didi dimueneke mu matunga onso. Wakamba ne: “Dinanga nedikepele munkatshi mua bantu ba bungi bua divulangana dia bubi.”—Matewuse 24:12, MMM.
8. Mmunyi mudi mulayi wa mu 2 Timote nshapita 3 ukumbanangana ne tshikondo tshietu etshi?
8 Kabidi, milayi ya mu Bible yakadianjila kuamba bua dishimbuka dia malu a nsombelu wa tshitembu didi dimueneka lelu’eu mu buloba bujima: ‘Ku matuku a ku nshikidilu, [“bikondo bikole mua kupita nabi nebilue,” NW]. Bantu nebikale badisui, banangi ba biuma, baditumbishi, badileji, bapendi ba Nzambi, kabayi batumikila mêyi a baledi babu, kabayi ne kusakidila, kabayi ne tshijila, kabayi banangi ba bana babu, bashipi ba bipungidi, bena lunsonga, kabayi mua kudikanda, bena luonji, kabayi basue malu mimpe, nebikale batungidianganyi, bena lukuluku, buujibue ne diambu, banangi ba masanka, kabayi banangi ba Nzambi; nebikale ne tshimuenekelu tshia [“bulamate kudi Nzambi,” NW], kadi bamane kudiula bukole buabu . . . Bantu babi ne badingi ba bakuabu nebadiundadiunde mu malu mabi.’ (2 Timote 3:1-13) Bionso ebi mbienzekele anu mu mêsu muetu.
Tshijadiki tshikuabu
9. Ntshinyi tshiakenzeka mu diulu tshikondo tshimue ne tshia ntuadijilu wa matuku a ku nshikidilu pa buloba?
9 Kudi bualu bukuabu budi bukebeshe divulangana dia makenga mu siekele eu. Mu tshikondo tshimue ne tshia ntuadijilu wa matuku a ku nshikidilu mu 1914, bualu kampanda buakenzeka buakateka mene bukua-bantu mu njiwu minene. Mu tshikondo atshi, anu bu mudi mulayi wa mu mukanda wa ndekelu wa mu Bible ulonda: “Mvita yakabudika mu diulu: Mikaele [Kristo mu bukokeshi bua mu diulu] ne banjelu bende bakaluangana ne dragon [Satana], ne dragon ne banjelu bende [ba-demon] bakaluangana kadi yeye kakatamba bukole, ne kakutshivua kabidi muaba wabu mu diulu. Nenku dragon munene wakimanshibua panshi, nyoka wa ku tshibangidilu, yeye udibu babikila ne: Diabolo ne Satana, eu udi upambuisha buloba bujima budi buasa kudi bantu; wakimanshibua pa buloba, ne banjelu bende bakimanshibua nende pamue.”—Buakabuluibua 12:7-9, NW.
10, 11. Diela Satana ne ba-demon bende pa buloba didi ne buenzeji kayi kudi bukua-bantu?
10 Mbipeta kayi bivuaku bua dîku dia bantu? Mulayi eu udi utungunuka ne: “Diakabi kudi buloba ne mbuu, bualu Diabolo wapueki kunudi muikale ne tshiji tshikole, bu mudiye mumanye se: udi ne tshikondo tshîpi.” Eyowa, Satana mmumanye se: ndongoluelu wende mmutangile ku tshibungubungu, nunku udi wenza tshionso tshidiye mua kuenza bua kupambuisha bantu kudi Nzambi kumpala kua yeye ne bulongolodi buende kubutukabu. (Buakabuluibua 12:12; 20:1-3, NW) Mmunyipu mudi bifukibua ebi bia mu nyuma bipuekeshibue milongo bualu biakakuata mudimu bibi ne budisunguidi buabi! Nnsombelu kayipu mikuate buôwa idi pa buloba ku buenzeji buabi, nangananga kumbukila mu 1914!
11 Kabiena bikemesha bua pakadianjila Yezu kuamba bua tshikondo tshietu etshi ne: “Malu a buowa ne bimanyinu binene nebifume mulu.”—Luka 21:11.
Nshikidilu wa bukokeshi bua bantu ne bua ba-demon ukadi pabuipi
12. Ng’umue wa ku milayi kayi idi mishale ya ndekelu udi ne bua kukumbana kumpala kua nshikidilu wa ndongoluelu’eu?
12 Mmilayi bungi munyi ya mu Bible idi mishale bua kukumbana kumpala kua Nzambi kubutulaye ndongoluelu’eu? Mikese menemene! Umue wa ku ya ndekelu ng’eu udi mu 1 Bena Tesalonyika 5:3 (MMM), udi wamba ne: “Diba didi bantu bambilangana ne: mpindiewu tudi ne bupole ne dikisha, ke didi kabutu kabakuata.” Ebi bidi bileja ne: nshikidilu wa ndongoluelu’eu neatuadije “padibu bambilangana.” Kakayi kapangadija kudi bantu, kabutu nekafike mu tshikondo tshidibu kabayi batambe kukatekemena, padi bantu batume ntema yabu ku ditalala ne bupole bidibu batekemene.
13, 14. Ntshikondo kayi tshia tshimvundu tshiakadianjila Yezu kuamba, ne nkomenu neikale munyi?
13 Tshikondo ntshifimpakane bua bulongolodi ebu budi ku buenzeji bua Satana. Mu katupa kîpi emu budi bufika ku nshikidilu wabu mu tshikondo tshia tshimvundu tshiakamba Yezu ne: “Nunku nekuikale dikenga dinene ditu kadiyi dianji kuenzeka katshia ku ntuadijilu wa bukua-bantu too ne mpindieu, tòo, kadiakuenzeka kabidi.”—Matayo 24:21, NW.
14 Nkomenu wa “dikenga dinene” neikale mvita ya Nzambi ya Armagedone. Ke tshikondo tshitela kudi muprofete Danyele tshikala Nzambi mua ‘kutshibula ne kubutula makalenge aa onso.’ Ebi nebiumvuije nshikidilu wa makokeshi onso adiku a bantu badilamune kudi Nzambi. Bukokeshi bua Bukalenge buende budi bufumina mu diulu nebuangate bulombodi buonso mu malu a bantu. Anu bu muakadianjila Danyele kuamba, bukokeshi abu kabakubupesha kabidi “bantu bakuabu.”—Danyele 2:44; Buakabuluibua 16:14-16.
15. Ntshinyi tshiafikila buenzeji bua Satana ne ba-demon bende?
15 Dîba adi buenzeji buonso bua Satana ne ba-demon nebujike pabu. Bifukibua abi bitomboke bia mu nyuma nebilamibue bua se: kabimonyi mua ‘kudinga bisamba bia bantu kabidi.’ (Buakabuluibua 12:9; 20:1-3) Mbifundila tshibawu tshia lufu ne mbindile kabutu. Ndisulakana kayipu dikalaku bua bukua-bantu buikale kabutshiyi ku buenzeji buabi bubi!
Nnganyi wapanduka? Nnganyi wafua?
16-18. Nnganyi wapanduka ku nshikidilu wa ndongoluelu’eu, ne nnganyi wafua?
16 Padi malumbuluisha a Nzambi akumbana pa bulongolodi ebu, nnganyi wapanduka? Nnganyi wafua? Bible udi uleja ne: aba badi basue bukokeshi bua Nzambi nebakubibue ne nebapanduke. Aba badi kabayi basue bukokeshi bua Nzambi kabakukubibua kadi nebabutudibue pamue ne bulongolodi bua Satana.
17 Nsumuinu 2:21, 22 udi wamba ne: ‘Badi ne mitshima miakane [aba badi bakokela bukokeshi bua Nzambi] nebashikame mu buloba, badi ne mutshima umue mutoke nebajalame. Kadi nebajimije bantu babi [aba badi kabayi bakokela bukokeshi bua Nzambi] pa buloba, nebumushepu bena tshitungu.’
18 Musambu 37:10, 11 udi wamba pawu ne: ‘Tshitupa tshîpi katshiyi tshianji kulepa, muntu mubi kêna wikalaku kabidi . . . Kadi badi ne mitshima mipuekele nebapiane buloba, mioyo yabu neyisanke mu ditalala dikumbane.’Musambu 37 Mvese wa 29 udi usakidila ne: ‘Bantu bakane nebapiane buloba, nebashikamemu tshiendelele.’
19. Mmubelu kayi utudi ne bua kuangata ne mushinga?
19 Tudi ne bua kuangata ne mushinga mubelu wa mu Musambu 37:34, udi wamba ne: ‘Windile Yehowa, ulamate njila wende, yeye neakubandishe bua wewe kupiana buloba. Pabutulabu bantu babi, wewe neumone muanda eu.’Musambu 37 Mvese wa 37 ne wa 38 idi yamba ne: ‘Tangila muntu udi ne mutshima mutoke bimpe, mona muntu udi muakane; bualu matuku atshilualua a muntu au neikale a ditalala. Kadi bantu babi nebabutudibue, buonso buabu mene. Matuku atshilualua a bantu babi neajimijibue.’
20. Bua tshinyi tudi mua kuamba ne: tudi mu bikondo bia disanka?
20 Mmunyipu mudibi bikankamija, eyowa, mmunyipu mudibi bisonsola bua kumanya se: bushuwa Nzambi udi ne ditabalela ne se: mu katupa kîpi emu neajikije bubi ne makenga onso! Mmunyipu mudibi bisankisha bua kujingulula se: dikumbana dia milayi ya mpatshi ayi didi dienzeka mu katupa kîpi emu!
[Tshimfuanyi mu dibeji 20]
Bible wakadianjila kumanyisha mianda ivua ne bua kuenza “tshimanyinu” tshia matuku a ku nshikidilu
[Tshimfuanyi mu dibeji 22]
Mu katupa kîpi emu, ku Armagedone, aba badi kabayi bakokela bukokeshi bua Nzambi nebashipibue. Aba badi bakokela nebapanduke ne nebabuele mu bulongolodi bupiabupia