Tshitupa 8
Dilongolola Dia Nzambi Nditangile Ku Dikumbana
1, 2. Mmunyi mudi Nzambi wenda wenza malongolola bua kujikija makenga?
BUKOKESHI bua bantu batomboke ne ba-demon mbutatshishe dîku dia bukua-bantu munkatshi mua siekele mivule. Pabi, Nzambi ki mmupue muoyo makenga etu nansha. Kadi, munkatshi mua siekele yonso eyi, mmuenze malongolola bua kupikula bantu ku buenzeji bua bubi ne makenga.
2 Mu tshikondo tshia buntomboji bua mu Edene, Nzambi wakatuadija kusokolola dilongolola diende dia kuenza mbulamatadi wavuija buloba ebu muaba wa mparadizu bua bantu. (Genese 3:15) Pashishe, bu mfumu tshikuma-mbila wa Nzambi, Yezu wakavuija mbulamatadi eu wa Nzambi udi ulua tshiena-bualu tshia dilongesha diende. Wakamba ne: ke tshivua ne bua kuikala ditekemena dimuepele bua bukua-bantu.—Danyele 2:44; Matayo 6:9, 10; 12:21.
3. Ntshinyi tshiakabikila Yezu ne: mbulamatadi udi ulua wa buloba, ne mbua tshinyi?
3 Yezu wakabikila mbulamatadi au wa Nzambi udi ulua ne: ‘bukalenge bua mu diulu,’ bualu uvua ne bua kukokeshila mu diulu. (Matayo 4:17) Wakamubikila kabidi ne: ‘bukalenge bua Nzambi,’ bualu Nzambi neikale Mubuenji. (Luka 17:20) Munkatshi mua siekele mivule Nzambi wakenzeja ku spiritu bafundi bende bua kufundabu milayi idi itangila aba bavua ne bua kuenza mbulamatadi au ne tshivuaye ne bua kukumbaja.
Mukalenge mupiamupia wa buloba
4, 5. Mmunyi muakaleja Nzambi ne: Yezu ke Mukalenge udiye muitabe?
4 Kukadi bidimu bitue ku binunu bibidi, Yezu wakakumbaja milayi mivule idi itangila eu uvua ne bua kuikala Mukalenge wa Bukalenge bua Nzambi. Wakaleja ne: uvua musungula wa Nzambi bu Mukokeshi wa mbulamatadi au wa mu diulu udi ukokesha bukua-bantu. Ne panyima pa lufu luende, Nzambi wakabisha Yezu bua kuikalaye ne muoyo mu diulu bu tshifukibua tshia bukole, tshia mu nyuma tshidi katshiyi tshifua nansha. Ku dibiishibua diende kuvua bantemu ba bungi.—Bienzedi 4:10; 9:1-9; Lomo 1:1-4; 1 Kolinto 15:3-8.
5 Nunku Yezu “wakasomba ku tshianza tshia balume tshia Nzambi.” (Ebelu 10:12, NW) Kuine aku wakindila dîba divua Nzambi ne bua kumupa bukole bua kuenzaye malu bu Mukalenge wa Bukalenge bua Nzambi bua mu diulu. Ebi biakakumbaja mulayi udi mu Musambu 110:1, mudi Nzambi umuambila ne: ‘Ushikame biebe ku tshianza tshianyi tshia balume too ne pangavuija badi nebe lukuna ditanda dia muinshi mua makasa ebe.’
6. Mmunyi muakaleja Yezu ne: uvua mukumbanyine kuikala Mukalenge wa Bukalenge bua Nzambi?
6 Patshivuaye pa buloba, Yezu wakaleja ne: uvua mukumbanyine muanzu wa mushindu’eu. Nansha muvuaku dikengeshibua, wakasungula bua kulama muoyo-mutoke wende kudi Nzambi. Pa kuenza nunku, wakaleja ne: Satana uvua mushime pakambaye ne: muntu nansha umue kêna mua kushala ne lulamatu kudi Nzambi padiye mu diteta. Yezu, muntu mupuangane, ‘Adama muibidi,’ wakaleja ne: Nzambi kavua mutupakane mu difuka bantu bapuangane.—1 Kolinto 15:22, 45; Matayo 4:1-11.
7, 8. Mmalu kayi mimpe akenza Yezu patshivuaye pa buloba, ne ntshinyi tshiakalejaye?
7 Mbukokeshi kayi bukadiku bukumbaje malu mavule mimpe bu muakenza Yezu mu bidimu bikese bia mudimu wende? Mupeshibue bukole kudi spiritu munsantu wa Nzambi, Yezu wakuondapa babedi, balema, bafofo, bena mapapa, tumama. Wakajula mene ne bafue! Wakaleja mu bualabale bukese tshivuaye ne bua kuenzela bukua-bantu pa buloba bujima paluaye mu bukokeshi bua Bukalenge.—Matayo 15:30, 31; Luka 7:11-16.
8 Yezu wakenza malu mimpe mapite bungi patshivuaye pa buloba akamba muyidi wende Yone se: “Yezu uvua muenze kabidi malu makuabo a bungi. Tuetu baafunde onso ku bumue ku bumue, ndi ngela meji ne: buloba bujima kabuena mua kuikala ne muaba wa kuteka mikanda yonso ivuabo mua kufunda.”—Yowanese 21:25, MMM.a
9. Bua tshinyi bantu bena mitshima milulame bakaya kudi Yezu?
9 Yezu uvua muena malu mimpe ne muena luse, muikale ne dinanga dia bungi menemene bua bantu. Wakambuluisha bapele ne bena tunyinganyinga, kadi kakasunguluja bena biuma peshi bantu banême. Bantu bena mitshima milulame bakandamuna ku dibikila dia Yezu diûle ne dinanga pakambaye ne: “Luayi kundi, nuenu bonso badi bakenga ne bazengele ne majitu, ne nennukankamije. Angatayi tshikokedi tshianyi ne nulongele kundi, bualu ndi mupole-malu ne mupuekele mu mutshima, ne nenupete dikankamija bua anyima yenu. Bualu tshikokedi tshianyi ntshinefuke ne bujitu buanyi mbupepele.” (Matayo 11:28-30, NW) Bantu badi ne ditshina dia Nzambi bakalua kudiye ne bakatekemena bukokeshi buende.—Yone 12:19.
Bakokeshi bindondi
10, 11. Mbanganyi benza mudimu pamue ne Yezu mu dikokesha pa buloba?
10 Anu bu mutu mbulamatadi ya bantu mikale ne bena mudimu bindondi, nunku ke mudi Bukalenge bua Nzambi bua mu diulu. Bakuabu badi ku luseke lua Yezu badi ne bua kuenzejangana mudimu mu dikokesha pa buloba, bualu Yezu wakalaya bindondi biende bia pabuipi ne: bavua ne bua kukokesha bukua-bantu pamue nende bu bakalenge.—Yone 14:2, 3; Buakabuluibua 5:10; 20:6.
11 Nunku, pamue ne Yezu, bantu bungi butshintshika mbabishibue pabu bua kuikala ne muoyo mu diulu. Badi benza Bukalenge bua Nzambi buatuadila bukua-bantu mabenesha a kashidi. (2 Kolinto 4:14; Buakabuluibua 14:1-3) Nunku mu bule bua bidimu, Yehowa mmuteke tshishimikidi bua bukokeshi buatuadila dîku dia bukua-bantu mabenesha a kashidi.
Bukokeshi budikadile bukadi ku tshibungubungu
12, 13. Ntshinyi tshikadi mpindieu Bukalenge bua Nzambi pa kuenza?
12 Mu siekele eu Nzambi mmubuele mu malu a pa buloba. Anu muikala tshitupa 9 tshia broshire eu mua kumvuija, milayi ya mu Bible idi ileja ne: Bukalenge bua Nzambi budi mu bianza bia Kristo buakajadikibua mu 1914 ne budi mpindieu budiakaje bua kuzaza ndongoluelu mujima wa Satana. Bukalenge abu budi pabuipi ne ‘kukokesha munkatshi mua badi lukuna ne [Kristo].’—Musambu 110:2.
13 Bua bualu ebu mulayi wa mu Danyele 2:44 udi wamba ne: ‘Mu matuku a bakalenge aba [badiku lelu’eu] Nzambi wa mu diulu neajadike bukalenge bukuabu [mu diulu] budi kabuyi bubutudibua tshiendelele. Bukokeshi buabu kabuena bupianyibua kudi bantu bakuabu [bukokeshi bua bantu kabuakupeshibua kabidi bukenji], kadi [Bukalenge bua Nzambi] nebutshibule makalenge aa onso bitupa bitupa, nebuabutule, ne buobu nebujalame tshiendelele.’
14. Ng’amue masanka kayi alua bu tshipeta tshia ndekelu wa bukokeshi bua bantu?
14 Bamane kubutula bukokeshi buonso budi budilamune kudi Nzambi, bukokeshi bua Bukalenge bua Nzambi pa buloba bujima nebutshimune tshishiki. Ne bu mudi Bukalenge bukokeshila mu diulu, kabena mua kubunyanga kudi bantu nansha. Bukole bulombodi nebuikale muaba uvuabu diambedi, mu diulu, pamue ne Nzambi. Ne bu muikala bukokeshi bua Nzambi bulombola buloba bujima, muntu nansha umue kadiakupambuishibua kudi bitendelelu bia dishima peshi nkindi ya bantu idi kayiyi ipetesha disanka ne malongesha a tshididi. Tshintu nansha tshimue tshia ku bintu abi katshiakuikalaku kabidi nansha.—Matayo 7:15-23; Buakabuluibua, nshapita wa 17 too ne wa 19.
[Mêyi adi kuinshi]
a Bua kumanya malu a bungi a nsombelu wa Yezu, tangila mukanda wa Muntu mutambe bunene wa katshia ne katshia, mupatula mu 1996 kudi Société Watchtower.
[Tshimfuanyi mu dibeji 18]
Patshivuaye pa buloba Yezu wakuondopa babedi ne wakabisha bafue bua kuleja tshikalaye ne bua kuenza mu bulongolodi bupiabupia
[Tshimfuanyi mu dibeji 19]
Bukalenge bua Nzambi bua mu diulu nebuzaze mishindu yonso ya bukokeshi idi midilamune kudi Nzambi