“Tshimanyinu tshia ‘matuku a ku nshikidilu’ anyi ‘bikondo bia ku nshikidilu’ ntshinyi?”

Diandamuna dia mu Bible

Bible udi umvuija malu, nsombelu, ne bikadilu bivua ne bua kuleja “nshikidilu wa ndongoluelu wa malu eu,” anyi “nshikidilu wa buloba.” (Matayi 24:3; Muanda Mulenga Lelu) Bible udi ubikila tshikondo etshi ne: “matuku a ku nshikidilu,” anyi ‘tshikondo tshia ku nshikidilu.’​—2 Timote 3:1; Danyele 8:19.

Mmilayi kayi ya mu Bible idi yakula bua “matuku a ku nshikidilu”?

Bible ukavua mumanyishe malu a bungi avua ne bua kuikala ‘tshimanyinu’ tshia matuku a ku nshikidilu. (Luka 21:7) Mona amue a kudiwu:

Mvita pa buloba bujima. Yezu wakamanyisha ne: “Tshisamba netshiluishe tshisamba tshikuabu, bukalenge nebuluishe bukalenge bukuabu.” (Matayi 24:7) Bia muomumue, Buakabuluibua 6:4 ukavua mumanyishe ne: muntu kampanda wa mu tshimfuanyi mubande pa kabalu udi uleja mvita uvua ne bua “kumbusha ditalala pa buloba.”

Biyole bia nzala. Yezu wakamanyisha ne: “Nekuikale biyole bia nzala.” (Matayi 24:7) Mukanda wa Buakabuluibua ukavua muakule pawu bua muendeshi wa kabalu wa mu tshimfuanyi udi uleja biyole bia nzala bidi bienzeka miaba ya bungi mishilashilangane.​—Buakabuluibua 6:5, 6.

Dikanka dikole dia buloba. Yezu wakamba ne: “buloba nebukanke ku muaba ne ku muaba.” (Matayi 24:7; Luka 21:11) Dikanka dikole dia buloba didi dienzeka pa buloba bujima adi divua ne bua kukebesha makenga a bungi ne lufu kupita kuonso eku.

Bipupu bia masama. Bilondeshile Yezu, kuvua ne bua kuikala bipupu bia masama, anyi “masama mabi.”​—Luka 21:11, Contemporary English Version.

Tshikisu. Nansha mudi bantu benze malu a tshikisu munkatshi mua bidimu nkama ne nkama, Yezu wakamanyisha ne: mu matuku a ku nshikidilu kuvua ne bua kuikala “divulangana dia dishipa dia mikenji.”​—Matayi 24:12.

Dinyangakaja buloba. Buakabuluibua 11:18 ukavua mumanyishe ne: bantu ‘nebanyangakaje buloba.’ Bavua ne bua kuenza nanku mu mishindu ya bungi, ki nganu ku tshikisu ne dikosa dia mishiku to, kadi kabidi ku dinyangakaja buloba.

Dinyanguka dia bikadilu. Mu 2 Timote 3:1-4, Bible ukavua mumanyishe ne: bantu bavua ne bua kuikala mu tshibungi tshiabu “kabayi ne dianyisha, kabayi ne lulamatu, . . . kabayi ne lungenyi lua kumvuangana, bashiminyinyanganyi ba malu, kabayi badikanda, bena luonji, kabayi banange malu mimpe, batungidianganyi, bena mutu mukole, badiuwuja ne lutambishi.” Bu muvua bikadilu abi ne bua kumueneka bikole mu bantu, ke bualu kayi Bible udi ubikila tshikondo etshi ne: “bikondo bia malu makole bidi bikole mua kupita nabi.”

Dinyanguka dia mêku. Mu 2 Timote 3:2, 3, Bible ukavua mumanyishe ne: bantu ba bungi bavua ne bua kuikala “kabayi banange [bena mu mêku abu]” ne bana bavua ne bua kuikala “kabayi batumikila baledi babu.”

Dinanga dia Nzambi dikepela. Yezu wakamanyisha ne: “Dinanga dia ba bungi nedikepele.” (Matayi 24:12) Yezu uvua usua kuamba ne: dinanga didi bantu ba bungi banange Nzambi nedikepele. Bia muomumue, 2 Timote 3:4 udi uleja ne: mu matuku a ku nshikidilu, bantu abu nebikale “banangi ba masanka pamutu pa kuikala banangi ba Nzambi.”

Lubombo lua bitendelelu. Mu 2 Timote 3:5, Bible ukavua mumanyishe ne: bantu bavua ne bua kuamba mudibu batendelela Nzambi kadi kabavua ne bua kutumikila mikenji yende to.

Ngumvuilu muimpe mutambe wa mêyi a buprofete a mu Bible. Mukanda wa Danyele ukavua mumanyishe ne: mu “tshikondo tshia ku nshikidilu,” bantu ba bungi bavua ne bua kupeta dimanya dimpe ditambe dia malongesha a mu Bible, bu mudi ngumvuilu mujalame wa mêyi a buprofete.​—Danyele 12:4.

Mudimu wa diyisha pa buloba bujima. Yezu wakamanyisha ne: “Nebayishe lumu luimpe elu lua Bukalenge pa buloba bujima budi bantu basombele.”​—Matayi 24:14.

Dibenga kuteleja mukenji wetu kudi ba bungi ne dituseka. Yezu wakamanyisha ne: bantu ba bungi kabavua ne bua kuteya ntema ku bijadiki bia bungi bidi bileja ne: nshikidilu wa ndongoluelu eu ukadi pabuipi to. (Matayi 24:37-39) Kupita apu, 2 Petelo 3:3, 4 wakamanyisha ne: bamue nebalue ne tuseku, babenga bijadiki abi ne muoyo mujima.

Dikumbana dia mêyi a buprofete onso. Yezu wakamba ne: mêyi a buprofete onso au avua ne bua kukumbana musangu umue mu matuku a ku nshikidilu; ki nganu amue a kudiwu anyi mene a bungi a kudiwu to.​—Matayi 24:33.

Tudi mu “matuku a ku nshikidilu” anyi?

Eyowa. Malu adi enzeka pa buloba bujima pamue dilondangana dia bidimu bia mu Bible bidi bileja ne: matuku a ku nshikidilu akabanga mu 1914, tshidimu tshiakatuadija mvita ya kumpala ya buloba bujima. Bua kumona mudi malu adi enzeka pa buloba bujima aleja ne: tudi mu matuku a ku nshikidilu, tangila filme eu:

Mu 1914, Bukalenge bua Nzambi buakabanga kukokesha mu diulu; dipata Satana Diabolo ne bademon bende mu diulu ne dibanyishila anu bua kuenza malu adi ne buenzeji pa buloba ke bumue bua ku malu adibu buenze. (Buakabuluibua 12:7-12) Buenzeji bua Satana kudi bantu budi bumuenekela ku mushindu mubi udi bantu badituala ne ku malu mabi adibu benza adi enza bua matuku a ku nshikidilu ikale ‘makole mua kupita nawu.’​—2 Timote 3:1.

Bikondo bia malu makole ebi bidi bikengeshisha bantu ba bungi. Ba bungi badi basamisha mutu, bualu bantu ki mbamanye kabidi mua kusomba ne bakuabu to. Bamue badi batshina too ne: bantu nebabutulangane butubutu.

Kadi bantu bakuabu badi bakenga pabu bua malu adi enzeka pa buloba bujima badi ne ditekemena bua matuku atshilualua. Mbatuishibue ne: Bukalenge bua Nzambi nebujikije ntatu idi pa buloba mu matuku makese emu. (Danyele 2:44; Buakabuluibua 21:3, 4) Mbindile ne lutulu luonso bua Nzambi akumbaje milayi yende; mêyi a Yezu aa adi abakolesha: “Muntu udi munanukile too ne ku nshikidilu neapandishibue.”​—Matayi 24:13; Mika 7:7.