Bulongolodi buabu ne mudimu udibu benza pa buloba bujima

KUDI malu a bungi adi Bantemu ba Yehowa benza bua kuludika mudimu wa kuyisha lumu luimpe udi wenzeka mpindieu mu matunga mapite pa 230. Kasumbu Kaludiki kadi ku tshilombuelu tshia mudimu wa Bantemu ku Brooklyn (New York) ke kadi kaludika mudimu wabu wonso. Ku tshidimu ku tshidimu, Kasumbu Kaludiki ka Bantemu ba Yehowa katu katuma baleji-mpala baku mu bitupa anyi zone mishilangane ya pa buloba bujima bua kumonangana ne batangidi ba biro anyi filiale ya mu zone ayi. Mu filiale yonso mudi Komite wa filiale muenza ne bantu kutuadijila ku basatu too ne ku muanda-mutekete bua kulombola mudimu mu matunga adi filiale wabu utangila. Imue filiale idi ne nzubu ya dipatuila mikanda ku biamu, mikuabu idi ne biamu binene bia lubilu lukole bidi biambuluisha bua kupatula mikanda lukasa-lukasa. Ditunga anyi tshitupa tshidi ku bulombodi bua filiale ne filiale yonso ntshiabulula mu distrike, ne distrike payi mmitapulula mu bijengu. Tshijengu tshionso tshidi ne bisumbu bu 20 nanku. Mutangidi wa distrike udi ukumbula bijengu bia mu distrike didiye utangila. Ku tshidimu ku tshidimu, tshijengu tshionso tshidi tshienza mpuilu misangu ibidi. Kudi kabidi mutangidi wa tshijengu, utu yeye pa tshibidilu ukumbula misangu ibidi ku tshidimu tshisumbu tshionso tshia mu tshijengu tshidiye utangila; wambuluisha Bantemu bua kulongolola ne kuenza mudimu wa buambi mu teritware wa tshisumbu tshiabu.

Bua muaba uudi musombele, tshisumbu tshionso tshidi ne watshi Nzubu wa Bukalenge, muaba munene udibu batamba kumanyishila lumu luimpe. Bipapu peshi teritware ya bisumbu bionso mmikosolola mu teritware ya mikese mikese idibu babanyina Bantemu muntu ne muntu. Ne buobu pabu ku luabu luseke badi benza muabu muonso bua kuya kuyikila ne bantu ku nzubu yonso idi mu teritware idibu babapeshe eyi. Tshisumbu tshionso tshidi ne Bantemu muinshi peshi bafika ku 200. Tshidi ne bakulu badibu bateka bua kutangila midimu mishilangane. Mumanyishi wa lumu luimpe yonso mmuntu wa mushinga mukole mu bulongolodi bua Bantemu ba Yehowa. Ntemu yonso, nansha yeye usadila muaba udibu balombuela midimu yabu, mu filiale anyi mu tshisumbu, utu uya pende kudi bantu bua kumonangana nabu mpala ne mpala ne uyikila nabu malu a Bukalenge bua Nzambi.

Batu bafikisha malu adi atangila mudimu wabu wa buambi ku biro biabu bidi bilombola mudimu wa buloba bujima, pashishe balua kuapatula mu mukanda udibu babikila mu Mfualansa ne: Annuaire. Batu kabidi bapatula luapolo elu mu Tshibumba tshia Nsentedi tshia dia 1 Tshiongo wa tshidimu tshionso. Mikanda ibidi eyi itu ileja mu katoba mu katoba malu a ku tshidimu tshionso a mudimu udibu benza bua kumanyisha bantu malu adi atangila Yehowa ne Bukalenge buende budi Kristo Yezu ulombola. Mu bidimu biapitshi ebi, Bantemu ne bantu badi banange bulelela batue ku 14 000 000 mbabuele mu Tshivulukilu tshia lufu lua Yezu tshitu tshienzeka tshidimu tshionso. Bantemu ba Yehowa batu benza mêba mapite pa 1 000 000 000 tshidimu tshionso mu diyisha lumu luimpe, ne bantu bapiabapia bapite pa 300 000 batu batambula tshidimu tshionso. Kadi bua mikanda idibu bashila bantu, itu yoyi ifika ku miliyo nkama ne nkama tshidimu tshionso.