Dibala dijalame

MIFUNDU idi yamba ne: Nzambi mmusue ne: bantu ba mishindu yonso “bafike ku dimanya dijalame dia bulelela.” (1 Tim. 2:4, NW) Bilondeshile mvese eu, dijinga dietu dia kupetesha bantu dimanya dijalame ke didi ne tshia kutuenzeja bua kubabadila Bible ne dîyi diumvuike.

Bakulumpe ne bana numanyayi ne: kumanya mua kubala Bible ne mikanda ya kumulonga nayi ne dîyi dikole kudi ne mushinga. Tuetu Bantemu ba Yehowa tudi ne bujitu bua kumanyisha bakuabu malu a Yehowa ne njila yende; nanku bitu bilomba imue misangu kubadila muntu anyi bantu malu kampanda. Tutu kabidi tubala nunku ne dîyi dikole mu dîku. Mu Kalasa ka Mudimu wa Nzambi, balume ne bakaji, bana ne bakulumpe batu bapeta mibelu ya kulengeja mushindu wa kubala.

Kubadila bantu anyi tshisumbu Bible kudi ne mushinga wa bungi be! Bualu Bible n’Dîyi dia Nzambi. Tuvuluke kabidi ne: ‘dîyi dia Nzambi didi ne muoyo ne bukole, didi dijingulula lukasa meji ne malu adi mutshima musue kuenza.’ (Eb. 4:12) Bible udi ne malu mimpe adi kaayi mu mukuabu mukanda nansha. Tshilejilu, Bible udi mua kuambuluisha muntu bua kumanya Nzambi umuepele mulelela, bua kulua mulunda wende ne bua kujikija bimpe ntatu idi imukuata. Udi umvuija mushindu wa kupeta muoyo wa tshiendelele mu Bukalenge bua Nzambi. Nunku tudifundilayi tshipatshila tshia kumubala bimpe menemene.​—Mus. 119:140; Yel. 26:2.

Mushindu wa kubala malu bijalame. Kudi mishindu mivule ya kubala bimpe, kadi wa kumpala ke dibala dijalame. Didi diumvuija kubala malu anu mudibu baafunde: udimuke bua kubenga kutumpika muaku anyi kuubala bibi bua mudiwu mufuanangane ne mukuabu.

Bua kumona mua kubala biakane, bidi bikengela kuanji kumvua malu adi mu tshiena-bualu. Bua nunku, bidi bikengela kudilongolola bimpe. Kunyima kua matuku, pawamanya mua kuela dîsu kumpala bua kumona mudi malu malondangane, neuabale bimpe bu mudiwu.

Bimanyinu bia mu difunda ne aksan bidi ne mushinga wa bungi. Bimanyinu bidi mua kuleja muaba wa kuimana katupa anyi katantshi ne wa kushintuluila dîyi. Mu imue miakulu, dishintulula dîyi bibi didi mua kuenza ne: lukonko lulue bu tshiambilu tshia tshianana, bishintulula ngumvuilu wa malu. Kadi imue misangu, bimanyinu ebi bitu amu bua mikenji ya muakulu tshianana. Mu minga miakulu, kakutu mushindu wa kubala malu bu mudiwu wewe kuyi mujingulule aksan idibu bele anyi mikuabu idi ikengela bua kudielela to. Aksan idi ishintuluisha dîyi pa maleta au. Umanye bimpe mudibu bakuata mudimu ne bimanyinu ebi ne aksan ya mu muakulu wenu. Atshi ke mamuende wa bualu bua kumanya mua kubala bilenga. Wavuluka ne: tshiudi ukeba nkupatula ngenyi, ki nkubala anu miaku to.

Kubala kubalulula ke kudi kuambuluisha bua kumanya mua kubala malu anu mudiwu. Utuadije ne tshikoso tshimue tshianana, ubale ubalulule too ne pawatshibala kuyi wenza tshilema. Mpindieu pita ku tshikuabu. Uditatshishe ku ndekelu bua kubala mabeji a bungi kuyi utumpika muaku, kuyi uubala misangu ibidi anyi uubala bibi. Wewe mumane kuenza nanku, ubikile muntu bua akuteleje ne akuambile muaba wonso uudi wenza tshilema.

Mu imue miaba, padiku bukenke bukese butuku ne mêsu adi kaayi amona bilenga, bitu bipangisha bantu bua kubala bimpe. Pikalaku mushindu wa kulongolola anyi kujikija ntatu eyi, bantu badi mua kutuadija kubala bimpe.

Mu bungi bua matuku, badi mua kusungula bana betu ba balume badi bamanye kubala bimpe bua kubala mu dilonga dia mukanda anyi dia Tshibumba tshia Nsentedi. Kadi bua kuikala mubadi mu bisangilu ebi, kubala bimpe nkayaku ki nkujikija bualu to. Eu udi ubala mu bisangilu udi ne tshia kuikala ne bibidilu bimpe mu didibadila pa nkayende. Bidi bikengela kujingulula ne: muaku wonso udi ne mudimu wawu mu tshiambilu. Wewe kuyi mumanye imue miaku, kuakumvua bimpe tshidibu bamba nansha. Paudi ubala miaku bibi nansha paudi nkayebe, kuakumvua tshiambilu atshi biakane to. Kubala bibi kudi mua kufuma ku dilengulula aksan peshi kupanga kumvua mudimu wa miaku muaba udiyi. Ditatshisha bua kumvua muaku bilondeshile muaba udiwu mu tshiambilu. Tangila kabidi mudi bimanyinu bifila ngumvuilu kampanda. Manya ne: kasumbu ka miaku katu kafila lungenyi kampanda. Nanku paudi ubala, ubale kasumbu ka miaku pamutu pa kubala muaku ku umue ku umue. Wewe umvua bimpe biudi ubala, bantu nebapete dimanya dijalame pawababadilabi.

Paulo wakafundila mukulu ukavua mumanye malu a bungi ne: ‘Unanukile kubala kumpala kua bantu bonsu.’ (1 Tim. 4:13, MMV) Nenku, tuakajayi buonso buetu mushindu utudi tubala!