Kupatula miaku miumvuike

BUA kuyikila ne bantu bimpe, bidi bikengela kuakula bintu biumvuika. Padi bantu kabayi bumvua miaku yebe bimpe, nebumvue anu malu makese nansha bikala biudi wamba bikale pamu’apa bilenga anyi mene ne mushinga wa bungi.

Malu adi bantu kabayi bumvua kaatu abasankisha to. Nansha wewe ne dîyi ditue, malu audi wamba kaakulenga bantu ku muoyo bikalabu kabayi bumvua miaku bimpe. Bidi anu bu udi wakula mu muakulu udi bantu kabayi bumvua. (Yel. 5:15) Bible udi utuambila ne: ‘Biadila mpungi ne dîyi didi kadiyi dijinguluka, mmuntu kayi wadilongolola bua kuluangana? Nunku nuenu kabidi, binuikala kanuyi nuakula ne ludimi dîyi didi diumvuika bimpe, nebamanye dîyi diudi wakula munyi? Bualu bua nenuele mêyi mu lupepele.’​—1 Kol. 14:8, 9.

Bitutu tuamba bidi mua kubenga kumvuika bimpe bua tshinyi? Pamu’apa mbualu katutu tubulula mukana bimpe to. Mifungu (anyi miskile) ya mbanga idi mikolakane ne mishiku idi kayiyi inyungakana bikole idi mua kukepeshisha dîyi ne bitudi tuakula kabiyi bilua kumvuika bimpe.

Kuakula lubilu kudi paku mua kupangisha bantu mua kumvua bitudi tuamba bimpe. Mbienze bu kuteka tshisanji bua kuakulatshi ne lubilu luvuabu kabayi batshienzele. Tshidi tshipatula miaku, kadi kakuena bua nsongo budi bumvuika.

Imue misangu, muntu udi mua kuikala ne disama anyi bulema bua kayi mua kuakula bimpe. Kadi nansha yeye muikale nanku, mibelu idi mu dilonga edi idi mua kumuambuluisha bikole yeye uyitumikila.

Bualu bukuabu mbua se: diambakaja dia miaku kakuyi dimina mata ke ditu nangananga dipangisha bantu bua kumvua bitudi tuamba. Kudi kabidi tshilumbu tshia ditumpika dia maleta. Padi muntu wakula wambakaja miaku, bantu badi mua kupanga kumvua imue ngenyi ne imue miaku, batuadija kubuka mikuabu. Nenku, dipanga kupatula miaku bipepele anyi diyishindumuna bibi didi mua kunyanga ndongeshilu wetu.

Mua kuakula malu mumvuike. Umue mushindu wa kupatula miaku miumvuike ng’wa kuanji kumanya mudiyi mienza. Mu miakulu mivule, miaku itu mienza ne bikosoluedi anyi tunungu (silabe), tuambe ne: dileta dimue peshi maleta a bungi atubu bashindumuna onso musangu anu umue. Mu miakulu eyi, kanungu konso kadi ne tshia kumvuika paudi wakula, nansha muditu tuonso katuyi tumvuika ne bukole bua muomumue. Paudi musue kutokesha tshiluba tshiebe, akula bitekete ne uditatshishe bua kushindumuna kanungu konso. Bidi mua kumvuika ku ntuadijilu bu udi unekesha, kadi kunyima kua matuku, newakule bilenga. Nansha mutubi bilomba bua kukuatakaja imue miaku, mbimpe kutulakajaku mikuabu bikalayi kayiyi yumvuika bilenga.

Manya ne: Bua kuakula bintu biumvuike, udi mua kuanji kudibidija bua kuakula ne kubala bijalame menemene ne kunekesha. Kadi kushadi mulame tshibidilu tshia kuakula nanku to. Bua tshianana nebimueneke ne: udi ubienza ku bukole.

Wewe muikale bu udi unungana paudi wakula, longa mua kuimanyika mutu, ne mua kubandulula mpala webe bua kumbusha tshibanga pa tshiadi. Paudi ubala Bible, umutekele kuulu ndambu bua paudi utangila bantu wikale winama anu kakese bua kumubala. Nanku miaku yebe neipatuke bipepele.

Kulonga mua kutukija mioyo kudi paku kuambuluisha. Batu bamba ne: padi mifungu ya mpala ne eyi itu yambuluisha bua kupuyakana itshintamana, itu itupangisha bua kupatula dîyi bimpe; idi ipangisha kabidi dikuatshishangana ditu dienzeka pankatshi pa lungenyi, bitupa bia mubidi bidi bipatula dîyi, ne dilama dia mueyelu, bintu bitu biambuluisha bua kupatula dîyi dimpe.

Misunyi ya ku mbanga idi ne bua kuikala minefuke bua kumona mua kulonda ne lukasa tshidi buongo bulomba. Mishiku ikale payi mipepele; ikale pabuipi bua kukangika ne kubululuka bua kupatula dîyi didi difumina mukana ne pa muminu. Padi tshibanga ne mishiku bikale ne bujitu, mukana kamuakubululuka bimpe to, ne dîyi padi nedikale ne lutatu bua kupatukila mu mênu. Nedikale diumakane, bienza bu udi unungana, ne kadiakumvuika bimpe to. Kadi kutekesha tshibanga ne mishiku kakuena kumvuija kuakula tshiakulakula to. Mbimpe kuikala ne nkatshinkatshi, kuikala ne tshibidilu tshia kupatula dîyi bua miaku yumvuike bimpe.

Imue misangu buebe wewe, kubala ne dîyi dikole kudi mua kuikala kuimpe. Utangile biakane muudi ukuata mudimu ne bitupa bia mubidi bidi biambuluisha bua kupatula dîyi. Utuku ukangula mukana bimpe bua dîyi kupatukadi kakuyi bualu anyi? Umanye ne: nansha mudi ludimi luenza mudimu wa bungi mu diakula, kudi bikuabu bitupa bia mubidi bu mudi: nshingu, lubanga, mifungu ya mu mpala ne ya muminu bidi pabi biambuluisha. Mpala webe utuku munefuke pautu wakula anyi? Yeye kayi nanku, udi mua kuikala ne tshilumbu mu diakula.

Pikalaku tshisanji, kuata dîyi diebe ku bande paudi wenda wakula muutu wakula pa tshibidilu ne bantu mu buambi; wakule minite ya bungi. Bande eu neakuambuluishe bua kumanya miaku idi ikengela kushindumuna bimpe. Ukebe miaba iudi kuyi wakula bintu bisunguluke, iudi unungana anyi ujikila peshi umina miaku ne pashishe utete kukeba kumanya kudibi bifumina. Wewe mulonde mibelu idi kuulu eku, malu adi mua kushintuluka.

Utu wakula ne lutatu anyi? Ikala ukangula mukana ndambu kupita muutu wenza pa tshibidilu ne uteta bua kushindumuna miaku bimpe menemene. Ikala uwuja bisulusulu ne kapepa paudi upuyakana, ne wakula bitekete bitekete; ngenzelu eu ukadi muambuluishe ba bungi. Nansha tshilumbu etshi katshiyi tshijike bimpe, kuteketshi to. Uvuluke ne: nansha muvua Mose mua kuikala ne lutatu lua kuakula, Yehowa wakamusungula bua kuambila Palô ne bena Isalele mikenji yende. (Ekes. 4:10-12) Biwikala pebe musue, Yehowa neakuate nebe mudimu ne neabeneshe mudimu webe wa budimi.