Malu mimpe adi akoleshangana ku muoyo

BADI babikila mukenji udibu batupeshe bua kumanyisha ne: lumu luimpe anyi mukenji mulenga. Yezu wakamba ne: “Nebambile bisamba bionso lumu luimpe diambedi.” (Mâko 13:10) Yezu wakafila tshilejilu tshiakane, e kuamba bikole ‘lumu luimpe lua bukalenge bua Nzambi.’ (Luka 4:43) Bapostolo bakamuangalaja pabu tshidibu babikila ne: “lumu luimpe lua Nzambi” ne ‘lumu luimpe lua Kristo.’ (1 Tes. 2:2; 2 Kol. 2:12) Lumu lua nunku nduimpe ne ludi lukoleshangana mu mikolo.

Bilondeshile “lumu luimpe lua tshiendelele” ludi ‘muanjelo udi upapala munkatshi mua diulu’ umanyisha, tudi tuambila bantu netu ne: “Nutshine Nzambi, numutumbishe.” (Buak. 14:6, 7) Tudi tuambila bantu ba miaba yonso malu a Nzambi mulelela, dîna diende, ngikadilu yende milenga, midimu yende ya kukema, malu malenga adiye mulongolole bua kuenza, mutudi ne bujitu kumpala kuende, ne tshidiye utulomba bua kuenza. Kuleja mudi Yehowa Nzambi ulua kushipa bantu babi badi kabayi banemeka Nzambi ne banyagila bantu nabu nsombelu ndumu luimpe palu. Kadi tuetu katuena ne bukenji bua kulumbuluisha bantu batudi tuyisha to. Dijinga dietu dinene ndia kumona bantu bavule bitaba mukenji wa mu Bible, bawangata menemene bu lumu luimpe.​—Nsu. 2:20-22; Yone 5:22.

Malu mabi ikale makese. Kakuyi mpata, malu atu amueneka mu nsombelu wa bantu. Katuena mua kupua bualu ebu muoyo to. Bua kutuadija muyiki ne muntu, udi mua kuakula bua bualu budi mukana mua bantu ba mu teritware wenu, kuanji kubuyikilaku katupa. Kadi kabitu bimpe kuyikidilapu mutantshi mule to. Bu mutu bantu bumvua anu kumvua ngumu mibi matuku onso, kuakula malu a dibungama a nunku kudi mua kubasaka bua kubenga kutuakidila anyi kubenga kututeleja. Anu ku mbangilu kua muyuki aku, keba bua kuleja muntu malu mimpe adi mu Dîyi dia Nzambi. (Buak. 22:17) Nenku, nansha muntu kayi musue bua nuenu kutungunuka, tshidibi ukadi mumane kumuambilaku tshintu tshidi tshimukoleshe mutshima, tshintu tshiashalaye welela meji. Bidi mua kumusaka bua kuteleja munga musangu.

Bia muomumue, paudi ne muyuki mu tshisumbu, kuambi anu malu mabi bualu adiku anu a bungi to. Bantu badi mua kuteketa mu maboko biwabambila anu bilema bidi bena tshididi benza, dishipangana ne bimvundu, ne buendenda budi butula bupuwe. Bueja malu a nunku mu muyuki anu paudi umona ne: adi mua kuambuluisha bantu. Malu makese a nunku adi mua kuleja bantu mudi muyuki webe muenza pa tshikondo tshiawu menemene. Malu a nunku aa adi mua kuleja bintu binene bidi bifikisha ku nsombelu kampanda ne nunku kulua kuleja bua tshinyi mibelu idi Bible ufila idi ne mushinga. Padiku mushindu, akula bualu patoke kadi kuyi ushalapu mutantshi mule to.

Kakutu mushindu ne kabitu bimpe kumusha malu mabi onso mu muyuki to. Tshilumbu tshitu tshikola bualu bitu bikengela kusangisha malu mimpe ne malu mabi ne ku ndekelu kupatula tshintu tshidi tshikoleshangana ku muoyo. Nanku bidi bilomba kumanya tshia kuamba, tshia kumusha, ne muaba wa kushindikila. Mu Muyuki wende wa pa Mukuna, Yezu wakambila bantu bua kuepuka njila mubi wa bafundi ne Bafalese wa batumone batuambe, ne wakatela bimue bilejilu bua kumvuija muanda eu. (Mat. 6:1, 2, 5, 16) Kadi, pamutu pa kushindamena pa bilejilu bibi bia balombodi ba bitendelelu aba, Yezu yeye wakakula bikole bua kuleja mudibi bikengela kumvua malu malelela a Nzambi ne kuatumikila. (Mat. 6:3, 4, 6-15, 17-34) Muyuki wende wa pa Mukuna eu wakambuluisha bantu bikole be!

Lama ngakuilu muimpe. Padibu bakupesha muyuki wa kuenza bua kuakula pa mudimu kampanda wa bena Kristo, keba bua kukankamija bantu pamutu pa kubamba mêyi mashile. Ujadike ne: malu audi wambila bantu bua kuenza, utu pebe uenza. (Lomo 2:21, 22; Eb. 13:7) Dinanga dikale dikusaka bua kuamba malu, kadi ki ntshiji to. (2 Kol. 2:4) Wewe mumanye se: bena Kristo nebe mbasue kusankisha Yehowa, malu audi wamba nealeje tshidi mu muoyo webe etshi, ne nebibambuluishe bikole. Tangila muakaleja mupostolo Paulo bualu ebu bilondeshile 1 Tesalonike 4:1-12; 2 Tesalonike 3:4, 5; ne Filemona 4, 8-14, 21.

Imue misangu, bitu bikengela bua bakulu kubelabu bantu pa ngikadilu kampanda mubi. Kadi nansha nanku, budipuekeshi nebubambuluishe bua kuakula ne bupole ne bana babu. (Gal. 6:1) Mushindu udi bangamba-malu bakula udi ne bua kuleja ne: badi banemeka bena mu tshisumbu. (1 Pet. 5:2, 3) Bible udi ubela nangananga bansonga bua kuikala ne kanemu ka bungi. (1 Tim. 4:12; 5:1, 2; 1 Pet. 5:5) Padibi bikengela kubela, kudimuisha, ne kulongesha, mbimpe kuamba anu tshidi Bible wamba. (2 Tim. 3:16) Bangamba-malu kabena ne bua kukeba bua kuleja mua kutumikila mvese bilondeshile mudibu buobu basue to. Nansha padibi bikengela kubela bantu bua kulekela tshilele kampanda, muyuki newikale muimpe wewe utamba kunemenena pa mushindu wa kuepuka ngikadilu mubi, mua kujikija malu, mua kujikija ntatu, mua kuakaja nsombelu mubi, ne mudi malu adi Yehowa utulomba atukuatshisha.​—Mus. 119:1, 9-16.

Paudi ulongolola muyuki, wele meji bua muudi mua kuya ngombo ku bualu bunene buonso ne ku muyuki wonso mujima. Malu audi wamba ku ndekelu ke adi bantu bakuata bikole, bashala baavuluke nansha kunyima kua matuku mavule. Neikale mimpe anyi?

Paudi uyikila ne bena Kristo nebe. Basadidi ba Yehowa batu bumvua disanka dia bungi bua kupetangana ne bakuabu mu bisangilu bia bena Kristo. Mbikondo bia dikoleshangana mu nyuma. Bible udi utulomba bua kuikala ne lungenyi lua ‘kukoleshangana mutshima’ patudi tuya miaba yetu ya ntendelelu. (Eb. 10:25) Tutu tukoleshangana mutshima, ki ng’anu patutu tuenza miyuki ne tuandamuna to, kadi kabidi nansha ne patutu tuyikila ne bakuetu kumpala ne kunyima kua bisangilu.

Nansha mutudi mua kuyikila pa malu makuabu a mu nsombelu, tumanyayi ne: kuyukila malu a mu nyuma ke kudi kutukankamija. Katuena tupua muoyo wa malu atutu bapetangane nawu mu buambi to. Kutabalelangana ne mutshima umue kudi paku kukoleshangana ku muoyo.

Bu mudiku malu mabi lelu’eu, tudi ne bua kuikala badimuke. Paulo wakafundila bena Kristo ba mu Efeso ne: “Lekelayi dishima. Muntu yonsu ambile mukuende bualu amu mudibu.” (Ef. 4:25, MMV) Kuamba bulelela pamutu pa dishima kudi kulomba kubenga kutumbisha bantu ne bintu bidi bantu ba tshianana banange bamba kufua. Yezu pende wakatubela bua kukandamena “mashimi a biuma.” (Mat. 13:22) Nanku patudi tuakula ne bakuetu, katuena ne bua kutumbisha dishima edi to, pa kuleja mudi biuma bienze bu bidi ne mushinga wa bungi.​—1 Tim. 6:9, 10.

Padi mupostolo Paulo utubela bua kukoleshangana, udi wamba bua kubenga kulumbuluisha anyi kupetula muanetu udi ubenga tshintu kampanda bualu udi ‘mutekete mu ditabuja diende.’ Mbuena kuamba ne: udi utshibenga bualu kêna umvua budikadidi buonso menemene budi nabu bena Kristo to. Eyowa, bua tuetu kukankamija bantu, bidi bikengela kumanya nkoleshilu wabu ne kudiunda kuabu kua mu nyuma. ‘Kuenza bualu budi mua kulenduisha muanetu, nansha kumufikisha ku bubi’ ki nkuimpe to!​—Lomo 14:1-4, 13, 19, MMV.

Bantu badi baluangana ne ntatu mikole (bu mudi: disama didi kadiyi dijika) batu basue kumvua anu malu adi abakolesha ku muoyo. Muntu wa nunku udi mua kuikala utata bikole bua kulua mu bisangilu. Badi bamanye mudiye utata badi mua kumukonka ne: “Udi bishi lelu?” Udi mua kuanyisha bikole mudibu bamutabalela bia nunku. Kadi, bumue kêna mua kuikala usanka bua kuyikila pa disama diende to. Kumuela kalumbandi ne tuasakidila pamuapa ke kudi mua kumusankisha bikole. Udi umona mudiye anu munange Yehowa ne mudiye utantamena ntatu anyi? Utu umvua bilenga patuye wandamuna anyi? Bua tshinyi kubenga kuakula bua malu mimpe adiye wenza aa ne bua mudiye wambuluisha tshisumbu, pamutu pa kuakula bua disama diende?​—1 Tes. 5:11.

Bua mayuki etu kukoleshanganawu, mbimpe nangananga kukeba mmuenenu wa Yehowa pa tshiena-bualu tshidi mu tshialu. Mu Isalele wa kale, bantu bakamba mêyi mabi bua baleji-mpala ba Yehowa ne bakadiabila bua mana, Nzambi wakabanyoka. (Nom. 12:1-16; 21:5, 6) Tudi mua kuleja mutudi bapete dilongesha ku malu au bituikala tunemeka bakulu ne tuleja dianyisha bua biakudia bidi kasumbu ka mupika wa lulamatu kafila.​—1 Tim. 5:17.

Patudi ne bena Kristo netu, kakutu lutatu lua kupeta malu mimpe adi akankamijangana to. Kadi padi muntu ubanga kujanangana, keba mushindu wa kutangija muyiki ku malu adi mimpe.

Tuikalayi ne busunguluji bua mianda bua tuamona mua kupatula mu mioyo yetu “anu miaku milenga idi mua kukolesha muntu ku muoyo pa bualu budiye nabu, ne kulengelela bantu badi bayiteleja” patudi tuyisha, tuenza muyuki anyi tuyikila ne bena Kristo netu.​—Ef. 4:29, MMM.