Tuikalayi Biibakianganyi
1 Bu mutudi mu “bikondo bia njiwu ne bikole mua kupita nabi,” bonso buetu tudi tukengela kukankamijibua. (2 Tim. 3:1, NW) Bu muakamonaye dikengedibua edi mu tshikondo tshiende, Paulo wakatabalela bua kuvuija dipetangana diende ne bana babu bikondo bia “dikankamijangana.” Wakabasengelela bua ‘kuipatshilabu malu adibu mua kuibakangana nawu.’ (Lomo 1:11, 12; 14:19, NW) Madikolela aa ‘akakolesha anyima ya bayidi, abakankamija bua kushala mu ditabuja.’ (Bienz. 14:22, NW) Lelu’eu tudi tukengela menemene kupeta dikankamijibua dia mushindu’eu.
2 Mêyi etu adi mua kuibaka bakuabu ne kuikala “bu mamuma a ngolo mu tshitekelu tshia tshiamu tshitoke,” pikalawu mamba mu tshikondo tshiakane. (Nsum. 25:11, NW) Pa kufila mumvuija mu bisangilu, tudi ‘tukankamijangana umue ne mukuabu.’ (Eb. 10:25) Bua kutumika bimpe ne ludimi luetu netuanyishe bua kulonda malu mamona mu buambi, kuela binetu ka-lumbandi peshi kuyukidilangana malu a mu nyuma. Kuakula nunku ‘nkuimpe bua kuibaka, bua kutuadila aba badi batuteleja tshintu kampanda tshidi bua diakalenga diabu.’—Ef. 4:29, NW.
3 Tuakule malu adi ibaka: Mu Filipoi 4:8 Paulo wakafila mibelu miakanyine idi ileja mushindu wa kutumika biakane ne mêyi a mukana: tuteya ntema ku malu onso adi a bushuwa, adi makumbanyine kutabalela, adi makane, a bupeluke ne a kunanga, a lumu luakane, a ngikadilu mulenga ne a kutemba ku bantu. Tudi mua kuikala bashindike ne: malu atudi tuamba ng’a bushuwa ne miibaki bikalawu afuma mu Dîyi dia Nzambi. (Yone 17:17) Dilambula dia bu-muntu buetu kudi Nzambi, bitudi tulonga mu bisangilu bia mu tshisumbu, mitalu yetu mu buambi ne malu makuabu a mushindu’eu mmakumbanyine kutabalela. Mayuki pa bidi bitangila mêyi-makulu ne mêyi-maludiki bia mu Dîyi dia Nzambi nebituambuluishe bua kulua bushuwa ‘bena meji bua lupandu.’ (2 Tim. 3:15) Tulejayi dianyisha dietu bua ngikadilu wa bupeluke wa aba badi mu bulongolodi bukezuke bua Yehowa. Tuendeshe lumu bua bienzedi bia dikema bia dileja buimpe bia bana betu. (Yone 13:34, 35) Ku malu a lumu luakane netubale ngikadilu milenga eyi ya Buena-nkristo: ditabuja, disanka, ditalala ne muoyo mule, ngikadilu idi bana betu baleja. Kuyukila pa malu aa a ngikadilu mulenga ne a kutemba ku bantu ‘nkuimpe bua kuibaka’ bakuabu.—Lomo 15:2, NW.
4 Bidi bitekesha maboko bua kuakama matuku onso ntatu ya mu bulongolodi ebu. Mmushindu kayipu udibi bilenga bua kuanjiku kulekela malu aa ku luseke bua kulabula dinanga dia buena-muntu! Mêba a mushinga atudi tupitshisha pamue ntshiûma tshitudi ne bua kuanyisha bikole. Bituikala matuku onso bakankamijanganyi ne biibakianganyi, bakuabu nebikale mua kuamba buetu ne: ‘bakakankamija lungenyi luanyi.’—1 Kol. 16:18, NW.