Tukoleshangane patudi mu mudimu wa buambi
1 Tuetu bonso tutu ne disanka patubu batukolesha ku muoyo ne ‘dîyi diamba mu tshikondo tshiakane.’ (Nsu. 25:11) Patudi tuyisha, ntshinyi tshitudi mua kuenza bua miyiki yetu kubambuluisha?
2 Miyuki idi isankisha bantu: Tuetu tuyikila malu a bena Kristo patudi mu buambi, bidi bitukolesha mu mikolo bikole. (Mus. 37:30) Tudi mua kuyikila bua mushindu utudi tufuma ku diyisha muntu anyi bua bualu kampanda buimpe butuvua bapete mu buambi matuku adi panshi aa. (Bien. 15:3) Tudi mua kulonda bualu buimpe butuvua bapete patuvua babale Bible anyi bibejibeji bietu bipiabipia nansha patuvua mu bisangilu. Tudi mua kuyikila malu atuvua bumvue mu muyuki wa patoke utuvua bumvue matuku aa.
3 Tudi mua kumvua bibi padi muntu utudi tupeta mu buambi ujula mpata itudi katuyi mua kutua tshiadi. Se nebikale bimpe bua tuetu kuyikilaku minite mikese ne muena dietu patudi tushiyangana ne muntu au, pamuapa tubala nansha mukanda wa Comment raisonner bua kumanya mushindu utudi mua kutuisha muntu udi ne mpata ya buena eyi mukuabu musangu. Tuetu banyishe kabidi mushindu uvua muena dietu muakule, tuetu bamuelaku kalumbandi ne muoyo mujima, bidi mua kumukolesha mu maboko bikole be!
4 Banga wewe: Kudiku bana betu ba mu kasumbu ketu ka dilonga dia mukanda batudi benze matuku katuyi bayishaku nabu anyi? Tuetu badianjile kubalomba bua kutufilabu mu buambi, bidi mua kutuambuluisha bua ‘tuetu kukoleshangana nabu ku muoyo.’ (Lomo 1:12, MMM) Bampanda-njila ba pa tshibidilu ne bambuluishi batu basue kuyisha pamue ne bantu bakuabu nangananga mêba a mu dinda anyi ku dilolo menemene atu bamanyishi ba bungi kabayi bapatuka mu buambi. Tudi mua kuambuluisha bampanda-njila tuetu bakebaku dîba dia kuyisha nabu. Udiku mumanye muambi wa lumu luimpe udi mutekete mubidi bua disama, udi kayi ne mushindu wa kuyisha mêba a bungi anyi? Tuetu benze programe bua tuyishe nende bu mudi bua kulonga ne mulongi wetu kampanda, nebituambuluishe tuetu bonso babidi.—Nsu. 27:17.
5 Kuela muntu kalumbandi, kumuamba mêyi mimpe adi aleja dianyisha bua tshidiye wenza nansha mu malu makese, nekumukoleshe bikole ku muoyo. Tudi ne bua kulama malu aa mu lungenyi patudi tuyisha ne bantu bakuabu, bualu tshipatshila tshietu ntshia kutungunuka ne ‘kukoleshangana.’—1 Tes. 5:11, MMM.